Kreu i SPAK, Arben Kraja është pyetur për një sërë çështjes nga deputeti Myslim Murrizi nga hetimet pasurore tek krimet zgjedhore . Kraja thotë se SPAK nuk del dot në rrugë e tu kërkojë njerëzve se ku e kanë blerë shtëpinë, por garanton se për çdo informacion që i vjen do të reagojë.

Sa për krimet zgjedhore, drejtuesi i SPAK thotë se kanë nisur 50 procedime penale për zgjedhjet e 25 prillit dhe kur të ketë rezultate përfundimtare do njoftohet publikisht.

Po ashtu hetimet pasurore sipas Krajës janë një prioritet i SPAK. Ndërkohë pyetjes se a ka qenë hetues në vitet 1987-1991, Karaja e pranoi teksa shtoi se është verifikuar dhe ka marrë lejen për të vijuar si prokuror.

MYSLIM MURRIZI: Keni 1 vit e gjysëm drejtues, e keni mandatin 3-vjeçar. Ndoshta ju ra barra e rëndë të ishit ju drejtues, pa hetues, pa paga, pa buxhetin e duhur e me radhë. Gjithsesi pritshmëria ka qenë shumë e madhe nga SPAK. 588 hetimet që ju raportuar e 260 persona të pandehur. Sa prej tyre i përkasin sferës së lartë, banorëve të kësaj salle, ish-të rreshtuarve pas kurrizit tënd dhe funksionarëve të Bashkive që unë jam i bindur se është objekti i punës tuaj. Çfarë ka patur në fokus nga njerëzit në pushtet, sa prej tyre? Personalisht shoh sa herë del në deklaratë publike Gaz Bardhi, ju i përgjigjeni. Unë jam Myslim Murrizi, të kam denoncuar një tender abuziv 27.3 milion euro të uniformës së Policisë, janë vjedhur mbi 10 milion euro. Kaq i rëndësishëm është Gaz Bardhi. Çfarë faze është hetimi, a ka filluar hetim a jo. Megjithëse është në raportin e vitit që vjen, ju takon juve. Krimet zgjedhore i përkasin SPAK, 108 kuti u hapën në Durrës, dolën se PD, PS e LSI kishin vjedhur, këta që kishin numërues. Çfarë pret SPAK, duhet deklaratë e Gazit?

Për dosjen 394, nuk e di sa jeni ndjerë mirë, unë nuk jam ndjerë mirë, shpallët urdhër arresti për 3 që kishin vdekur. A është kjo mungesë serioziteti apo informimi për ata që janë marrë me këtë punë?

Shoh sot, një lajm që SPAK ka kërkuar sekuestrimin e 32 pronave të Ylli Ndroqit me një emër tjetër, se nuk justifikon 3 milion euro. Ju inkurajoj, por besoj që Ylli mund të jetë bryma e fundit e kavallit që ka vënë dorë mbi taksat. Sa Yje të tjera ka ky vend. A ka marrë ndonjë nismë SPAK, me dy çuna e të presin Murrizi e ti thonë ku jeton, ke 3 muaj kohë të justifikosh këtë që ke 7 hale për macet.

Në 87-91 keni qenë hetues. Nga Gazi jeni stigmatizuar për të kaluarën tuaj kur jo pak kanë qenë dhe bashkëpuntorë sigurimi në KLP, KLGJ e Magjistraturë. Dua të shuaj një kureshtje, a keni qenë kandidat për deputet në 31 mars 1991?

ARBEN KRAJA: Për pyetjen e parë. Unë jam drejtues i SPAK. Në këtë cilësi kam detyrime ligjore, përparësore për të krijuar institucionin, jo se e krijoj unë, por për të krijuar kushte. Pjesë e punës sime ka qenë vënia sa më shumë në dispozicion. Kam bërë përpjekje të vazhdueshme, për plotësimin e boshllëqeve ligjore për pagat. Kam bërë komunikime të vazhdueshme, qoftë dhe asistencë të ngritjes së një institucioni. Fakti që është mandate 3 vjet është kushtetues. Brenda këtij mandate besoj do i bëj të gjitha, dhe institucioni më pas të bëhet produktiv.

Për Gaz Bardhin, prokurori apo unë s’kam bërë asnjë koment apo debat në media. Unë i përgjigjem atij që më sjell kërkesë zyrtare. Ju mund të na drejtoheni dhe ne ju kthejmë përgjigje.

Unë do them shkurt, SPAK është e përfshirë vetëm për korrupsionin aktiv e pasiv në zgjedhje. Kemi nisur mbi 50 procedime penale, kur të ketë rezultate do i japim.  Për hetimet pasurore, SPAK është strukturë ligjore, s’mund të dalë në rrugë e ti kërkoj dikujt sa e ke këtë shtëpi. Kemi fillaur dhe hetimet pasurore për krimin e organizuar dhe pastramin e parave. Ato pak raste, nga pikëpamja e vlerës janë me shumë rëndësi. E kemi përparësi hetimin pasuror. Në çdo rast që marrim informacion, do jetë objekt i ligjit.

Kam qenë hetues, është e deklaruar. I jam nënshtruar kontrolleve e veritifimeve, kam marrë vendimin që mund të vazhdoj.

(BalkanWeb)

Për t’u bërë pjesë e grupit "Balkanweb" mjafton të klikoni: Join Group dhe kërkesa do t’ju aprovohet menjëherë. Grupi Balkanweb