«Ակնհայտ է, որ այս պատերզմը դեռ շարունակվում է, հետևաբար՝ պարտություններն էլ են շարունակվում ու քանի երկրի ղեկին կան այս իշխանությունները, այս ամենը շարունակվելու է, մենք շարունակելու ենք պարտվել»,-Եռաբլուրում ասաց ԱԺ «Հայաստան» խմբակցության պատգամավոր Վահե Հակոբյանը և հավելեց. «Ինչին հիմա մեզ դրդում են, թե հանրությունն իր լուռ համաձայնությունը տա, որ Նիկոլ Փաշինյանը գնա այդ վերջնական կապիտուլյացիայի փաստաթղթի ստորագրման, այս ամենը խոսում է դրա մասին»:
Անդրադառնալով Լևոն Տեր-Պետրոսյանի վերջին հայտարարություններին՝ Վահե Հակոբյանն ասաց, որ երկրորդ և երրորդ նախագահներն իրենց դիրքորոշումները կհայտնեն, իսկ իր կարծիքով Տեր-Պետրոսյանը չափազանց վատատես է:
«Անհապաղ պետք է փոխել բանակցողին՝ երկրի ղեկավարին, այդ դեպքում մենք կունենանք՝ թեկուզ փոքր շանս չարյաց փոգրագույնով իրավիճակից դուրս գալու համար»,-ասաց ընդդիմադիր պատգամավորը և հավելեց, որ իշխանափոխությունից հետո պետք է բանակցողների խումբ ձևավորվի, քանի որ այն մեկ մարդու ուժերից վեր է:
Անդրադառնալով արտաքին քաղաքականությանը՝ ԱԺ պատգամավորը հայտնեց, որ պետք է ճկուն քաղաքականություն վարվի, քանի որ երկիրը, պատկերավոր ասած, ականապատված դաշտով է քայլում և պետք է չափազանց զգույշ լինել քայլերի, բառերի և ընդհանրապես քաղաքականության մեջ:
«Արտաքին վեկտորը կտրուկ այս ու այն կողմ տանելը ոչ մի լավ բանի չի բերի»,- ասաց Հակոբյանը:
Պատասխանելով ՀՀ-ին ԱՄՆ-ի զենք վաճառելու օրինագծի մասին տարածված տեղեկատվության վերաբերյալ հարցին՝ պատգամավորը հայտնեց, որ եթե մենք ունենք զենքի խնդիր, ապա պետք է այդ առումով բոլոր աջակցողների՝ մեզ մեկնած ձեռքը սեղմել:
«Մնում է, որ այդ ձեռք մեկնողի նպատակները լինեն անկեղծ և բարի»,-հայտարարեց Վահե Հակոբյանը՝ նկատելով, որ այդ առումով դեռ ոչինչ տեսանելի չէ և տպավորություն կա, որ գերպետությունները իրենց շահերից ելնելով Հայաստանը կռվախնձորի նման մասնատում են:
Նա բնական համարեց այդ պետությունների նման վարքը և հավելեց. «Այստեղ հիմնահարցն այն է, որ մենք մեր պետական և ազգային շահը չենք կարողանում առաջ տանել կամ բերել օրակարգ»
