Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
Հայաստանում Ռուսաստանի դեսպանությունը բողոքի նոտա է հղել ՀՀ արտաքին գործերի նախարարությանը՝ «Սուրմալու»-ի դեպքերի հետ կապված, որտեղ մասնավորապես նշել է. «Վրդովված ենք տեղական տեղեկատվական դաշտում շրջանառվող ցինիկ նյութերից, որոնցում հայհոյական ու կեղծ մեղադրանքներ են հնչում ռուսական կառույցների հասցեին՝ այս տարվա օգոստոսի 14-ին «Սուրմալու» առևտրի կենտրոնի տարածքում տեղի ունեցած ողբերգության հետ առնչություն ունենալու վերաբերյալ: Մենք սա դիտարկում ենք որպես ուղղակի սադրանք քաղաքական ուժերի կողմից, որոնք կանգնած են նման ակնարկների հետևում։ Այս ամենի նպատակն է խաթարել ռուս-հայկական դաշնակցային հարաբերությունները։ Հայաստանի իշխանություններից ակնկալում ենք քայլեր՝ ուղղված նման անբարյացակամ դրսեւորումները ճնշելուն՝ ներառյալ անհրաժեշտ հանրային մեկնաբանությունները»:
Այսօր «Հայելի» ակումբում «Անվտանգություն եւ ժողովրդավարություն» ՀԿ-ի նախագահ, ԱԺ նախկին պատգամավոր Նաիրա Զոհրաբյանը, անդրադառնալով այդ հայտարարությանը, դիմեց ՌԴ դեսպանին. «Պարո՛ն Կոպիրկին, վերջապես զարթնեցիք, հա՞: Ես ձեզ ՀՀ-ում ԵՄ դեսպանի հետ միասին համարում էի ՔՊ անդամներից մեկը, որովհետեւ ես գիտեմ, թե դուք ինչպես եք բոլոր նրանց մասին, ովքեր պայքարում են Նիկոլի դեմ, կեղծ ինֆորմացիաներ փոխանցում ձեր իշխանություններին: Վերջապես զարթնեցիք, հա՞, վերջապես հասկացա՞ք, որ այն կենտրոնները, որոնք այսօր հակառուսականություն են տարածում, որոնք ասում են, որ «Սուրմալուի» պայթյունի հետեւում կանգնած է Ռուսաստանը, առանց Նիկոլ Փաշինյանի հրահանգի ո՛չ շնչում են, ո՛չ էլ արտաշնչում են: Էդ նո՞ր զարթնեցիք, ատամներով մինչեւ այսօր պաշտպանել եք Նիկոլ Փաշինյանի յուրաքանչյուր քայլ, կեղծ տեղեկատվություն տրամադրելով ձեր վերադասներին՝ Հայաստանի ընդդիմադիր քաղաքական ուժերի վերաբերյալ: Հրապարակային ասում եմ՝ ավելի թույլ դեսպան, քան այս դեսպանն է, անկախությունից ի վեր Ռուսաստանը չի ունեցել: Ցավոք, մեր ռազմավարական դաշնակիցը մեզ համար այս ճակատագրական պահերին ունի ամենաթույլ դեսպանը Հայաստանում»:
Հռիփսիմե ՋԵԲԵՋՅԱՆ
