Թուրքիայի նախագահ Ռեջեփ Թայիփ Էրդողանը և ՄԱԿ-ի գլխավոր քարտուղար Անտոնիո Գուտերեշը, ովքեր վաղը Լվովում հանդիպելու են Վլադիմիր Զելենսկու հետ, փորձելու են հասնել պատերազմի ավարտին դիվանագիտական ճանապարհով։ Ռազմական փորձագետ Օլեգ Ժդանովի կարծիքով՝ սա է ռուսական պլանը՝ հենց հիմա նստել բանակցությունների սեղանի շուրջ, գրում է ՈՒՆԻԱՆ-ը։
«Հավատացե՛ք, այս բանակցությունների առաջին պայմանը լինելու է ժամանակավոր զինադադարը: Ինչպես ասում են, ժամանակավորից ավելի մշտական բան չկա: Ռուսաստանը կփորձի ամրագրել այն ձեռքբերումները, որոնց հասել է մինչ օրս», ասել է փորձագետը:
Ժդանովի խոսքով, ՄԱԿ-ի գլխավոր քարտուղարը Պուտինի կողմից է և շահագրգռված է հացահատիկի «ապրանքափողային գործարքներով»։
«Ռեջեփ Էրդողանն ունի իր տեսակետն այս պատերազմի վերաբերյալ, նա ունի իր պայմանավորվածությունները Ռուսաստանի հետ: Նա պատժամիջոցներ չի կիրառում Ռուսաստանի դեմ, նրանք օգոստոսի 5-ին Սոչիում հանդիպեցին [Պուտինի հետ] և ինչ-որ բան պայմանավորվեցին», ասել է նա։
Ժդանովը Ռուսաստանի հետ զինադադարի կոչերը համարում է «վտանգավոր իրավիճակ». «Որքան ես հասկանում եմ, նախագահ Զելենսկիին համոզելու են Ռուսաստանի հետ խաղաղություն ստորագրել այն պայմաններով, որոնք կառաջարկի Ռուսաստանի Դաշնությունը»։
Ժդանովը հնարավոր է համարել, որ Ուկրաինայի դիրքորոշումը բանակցություններում կարող է լինել ռուսական զորքերը մինչև փետրվարի 24-ը դիրքերին վերադարձնելը։ Նա նաև ուշադրություն է հրավիրել այն փաստի վրա, որ ԵՄ-ն և ԱՄՆ-ն չեն մասնակցում այդ բանակցություններին, ինչը «տագնապալի է»։
«Սա շատ տագնապալի վիճակ է, Գուտերեշի եւ Էրդողանի այցը ոչ թե Կիև է, այլ Լվով, նրանք չեն ցանկանում ցույց տալ, որ աջակցում են Ուկրաինային, գալ Կիև»,- ասել է փորձագետը։
Նախօրեին Էրդողանի վարչակազմից ասել էին, որ Ուկրաինայի և Թուրքիայի նախագահների, ինչպես նաև ՄԱԿ-ի գլխավոր քարտուղարի մասնակցությամբ Լվովում կայանալիք գագաթնաժողովում խոսք կգնա ռուս-ուկրաինական պատերազմին «դիվանագիտական միջոցներով» վերջ տալու մասին։ Ավելի վաղ Էրդողանի առաջին օգնականը հայտարարել էր, որ աշխարհը «չի կարող վերջ տալ Ուկրաինայի պատերազմին՝ անտեսելով Ռուսաստանին»։
