Համաձայն «Հեղինակային իրավունքի եւ հարակից իրավունքների մասին» օրենքի՝ լրատվական նյութերից քաղվածքների վերարտադրումը չպետք է բացահայտի լրատվական նյութի էական մասը: Կայքում լրատվական նյութերից քաղվածքներ վերարտադրելիս քաղվածքի վերնագրում լրատվական միջոցի անվանման նշումը պարտադիր է, նաեւ պարտադիր է կայքի ակտիվ հղումի տեղադրումը:
Բիշքեկում տեղի է ունեցել Հայաստանի վարչապետ Նիկոլ Փաշինյանի հանդիպումը Ռուսաստանի նախագահ Վլադիմիր Պուտինի հետ, հայտնում է Կրեմլի մամուլի ծառայությունը:
«Մենք վերջերս հանդիպեցինք Երևանում, որտեղ Դուք, կարծում եմ կհամաձայնեք, հաջողությամբ անցկացրիք ՀԱՊԿ գագաթնաժողովը: Եվս մեկ անգամ շնորհակալություն այն մթնոլորտի համար, որ Դուք ստեղծել էիք՝ մեծ թվով մեզ համար կարևոր հարցերի բաց քննարկման համար: Այսօր հանդիպում ենք այստեղ: Մենք, ինչպես միշտ, օգտագործում ենք բանակցությունների համար այսպիսի երկկողմ ձևաչափեր:
Եվս մեկ անգամ կցանկանայի ուշադրություն հրավիրել այն բանի վրա, որ Ռուսաստանը մնում է առաջատար առևտրային-տնտեսական գործընկեր (Հայաստանի ապրանքաշրջանառության ավելի քան 30 տոկոսը բաժին է ընկնում Ռուսաստանին) և ամենառաջատար ներդրողներից մեկը, թերևս անգամ հիմնական ներդրողը՝ ներդրումների 40 տոկոսով: Ընթացիկ տարվա առաջին տասը ամիսներին ապրանքաշրջանառությունը կազմել է 67 տոկոս: Դա շատ լուրջ, շատ, դրական ցուցանիշ է:
Այնուամենայնիվ, միշտ հարցեր կան, և ես ուրախ եմ նման հնարավորության համար՝ հանդիպելու Ձեզ հետ»,-ասել է Պուտինը:
Իր հերթին Փաշինյանն ասել է.
«Շնորհակալություն, Վլադիմիր Վլադիմիրովիչ:
Այսօր մենք անցկացրինք բավականին հաջող, կառուցողական նիստ, և փաստացի տնտեսական հարցերի ամբողջ շրջանակը մենք արդեն քննարկել ենք՝ և՛ նեղ կազմով, և՛ ընդլայնված կազմով:
Դուք արդեն խոսեցիք մեր փոխադարձ շրջանառության աճի մասին, որն իսկապես տպավորիչ է: Ես հույս ունեմ, որ Եվրասիական տնտեսական միության մեխանիզմների բարելավմամբ կհաջողվի պահպանել այն դինամիկան, որ արդեն գրանցվել է:
Իհարկե, մենք շատ հագեցած օրակարգ ունենք: Ես համոզված եմ, որ մենք այսօր կքննարկենք նաև տարածաշրջանային հարցեր: Մեզ մոտ, ցավոք, տարածաշրջանում իրավիճակը մնում է լարված, և ես ցանկանում եմ նշել, որ մեր տարածաշրջանում գլխավոր հարցը, իհարկե, մնում է Լեռնային Ղարաբաղի կարգավորումը:
Ցավոք, վերջերս մենք տեսանք նաև Լեռնային Ղարաբաղում լարվածություն ռուս խաղաղապահների պատասխանատվության գոտում: Ես վստահ եմ, Դուք տեղեկացված եք, որ վերջերս փակվել էր Լաչինի միջանցքը, և Լեռնային Ղարաբաղում շատ մեծ մտավախություններ կան այդ հարցի շուրջ: Իհարկե, մենք միշտ քննարկում ենք այս հարցերը: Ես հույս ունեմ, որ այսօր մեզ կհաջողվի քննարկել տարածաշրջանային անվտանգության բոլոր կարևոր հարցերը»:
Պատրաստեց Վիկտորյա ԱՆԴՐԵԱՍՅԱՆԸ
