Views: 4
ប្រែសម្រួល : កញ្ញាដាលីស (ដេល្លីម៉េល) ៖ ប្រាក់ជាង ២១.០០០ ដុល្លារអាម៉េរិកបានជះនៅភោជនីយដ្ឋានមួយ ក្នុងនោះ ១០.៧០០ ដុល្លារបានចំណាយនៅហាងនំប៉័ងក្នុងពេលតែមួយថ្ងៃ។ការចេញផ្សាយជាសាធារណៈកាលពីថ្ងៃសុក្រទី១៣មករាអំពីការចំណាយលើកាតឥណទានផ្លូវការរបស់អតីតប្រធានាធិបតី ជែរ បូលសូណារ៉ូ (Jair Bolsonaro) កំពុងបង្កការភ្ញាក់ផ្អើលនៅក្នុងប្រទេសប្រេស៊ីល។
ប្រាក់ជាង ២៧,៦ លានរៀល (Real)ឬជាង ៥ លានដុល្លារនៅអត្រាប្តូរប្រាក់បច្ចុប្បន្ន ត្រូវបានគិតចេញពីកាតឥណទានរបស់ប្រធានាធិបតីស្តាំនិយមរូបនេះក្នុងអំឡុងពេលអាណត្តិបួនឆ្នាំរបស់គាត់ នេះបើយោងតាមសេចក្តីថ្លែងការណ៍គណនីដែលបានចេញផ្សាយកាលពីថ្ងៃសុក្រនៅលើវេបសាយមួយរបស់រដ្ឋាភិបាល។
ខុសពីអ្នកកាន់តំណែងមុនៗរបស់គាត់ លោកបូលសូណារ៉ូបានលាក់បាំងការសម្ងាត់ ១០០ ឆ្នាំអំពីការចំណាយលើកាតឥណទានរបស់ប្រធានាធិបតីក្នុងចំណោមព័ត៌មានផ្លូវការផ្សេងទៀតជាច្រើនដែលអ្នកស្នងតំណែង លោក ល្វីស អ៊ីណាស៊ីអូ លូឡា ដា ស៊ីលវ៉ា (Luiz Inacio Lula da Silva) បានចាប់ផ្តើមដកចេញវិញ។
លោកបូលសូណារ៉ូនិងសមាជិក ២១ នាក់នៃក្រុមរបស់គាត់មានសិទ្ធិចូលប្រើកាតឥណទានរបស់រដ្ឋ។
ដោយកែតម្រូវសម្រាប់អតិផរណា ចំនួនទឹកប្រាក់ពេញដែលគិតពីក្នុងកាតគឺស្មើជិតពាក់កណ្តាលនៃទឹកប្រាក់ដែលបានចំណាយក្នុងអំឡុងអាណត្តិបួនឆ្នាំដំបូងរបស់លោកលូឡា ដែលចាប់ផ្តើមក្នុងឆ្នាំ ២០០៣ ទោះបីជាគាត់បានប្រើកាតជាចម្បងសម្រាប់ការស្នាក់នៅពេលធ្វើដំណើរទៅក្រៅប្រទេសក៏ដោយ។
លោកបូលសូណារ៉ូជារឿយៗបានអះអាងថាមិនបានដកប្រាក់ “មួយកាក់មួយសេន” ពីកាតនោះទេ។
ប៉ុន្តែការវិភាគនៃកំណត់ត្រាដែលទើបនឹងបើកកកាយថ្មីៗដោយវេបសាយព័ត៌មាន Uol បានរកឃើញថាប្រាក់ដែលសព្វថ្ងៃស្មើនឹងជាង២៣៥.០០០ដុល្លារអាម៉េរិកត្រូវបានចំណាយដោយលោកបូលសូណារ៉ូអំឡុងវិស្សមកាលក្នុងឆ្នាំ ២០១៩, ២០២០ និង ២០២១។
ប្រាក់ជិត ១៤.០០០ ដុល្លារត្រូវបានចំណាយលើការទៅចាក់សាំងនៅស្ថានីយប្រេងឥន្ធនៈមួយ និងប្រាក់ ២៨៦.០០០ដុល្លារផ្សេងទៀតសម្រាប់ការទៅដេកច្រើនដងនៅសណ្ឋាគារប្រណីតនៅរមណីដ្ឋានមាត់សមុទ្រ ហ្គារូចា (Guaruja) នៅជិតទីក្រុងសៅប៉ូឡូ (Sao Paulo)។
យោងតាមវេបសាយ G1 សណ្ឋាគារប្រណីតគឺសម្រាប់សមាជិកក្រុមរបស់លោកបូលសូណារ៉ូ ខណៈរូបលោកស្នាក់នៅក្នុងបរិវេណបន្ទាយយោធា។
ការចំណាយលើអាហារគឺស្ថិតក្នុងចំណោមទំនិញដែលគិតលុយច្រើនដ៏គួរឱ្យភ្ញាក់ផ្អើលបំផុត។
ក្នុងដំណើរទៅកាន់ភោជនីយដ្ឋានមួយនៅទីក្រុងបាវវីស្តា (Boa Vista) ក្នុងរដ្ឋរ៉ូរ៉ៃម៉ា (Roraima) នៃតំបន់ព្រៃអាម៉ាហ្សូន កាតរបស់ប្រធានាធិបតីត្រូវបានប្រើប្រាស់ដើម្បីបង់វិក្កយបត្រជាង ២១.០០០ ដុល្លារអាម៉េរិក។
នោះនឹងគ្រប់គ្រាន់សម្រាប់ការបញ្ជាទិញម្ហូបថ្លៃបំផុតរបស់ភោជនីយដ្ឋានចំនួន ២.០០០ ចាន។
កាតនេះក៏ត្រូវបានប្រើដើម្បីគិតថ្លៃជាង ៧១.០០០ ដុល្លារក្នុងពេលចំណាយនៅឯហាងនំប៉័ងមួយក្នុងអំឡុងរយៈពេលបួនឆ្នាំក្នុងទីក្រុងរីយ៉ូផងដែរ។
ក្នុងចំណោមទឹកប្រាក់នេះ លុយជិត ១១.០០០ ដុល្លារត្រូវបានចំណាយក្នុងពេលតែម្តងប៉ុណ្ណោះ នោះគឺនៅថ្ងៃបន្ទាប់ពីពិធីមង្គលការកូនប្រុសរបស់លោកបូលសូណារ៉ូ។
លុយជាង ១.៦០០ ដុល្លារត្រូវបានចំណាយនៅហាងការ៉េមមួយ៕
លោកបូលសូណារ៉ូ ចាកចេញទៅអាម៉េរិកក្រោយលោកចាញ់ឆ្នោតលោក ល្វីស អ៊ីណាស៊ីអូ លូឡា ដា ស៊ីលវ៉ា