Views: 2
ដោយៈ មុនីរ័ត្ន / ភ្នំពេញៈ លិខិតអញ្ជើញជិត ៥ លានសន្លឹក ត្រូវបានចែកជូនដល់អ្នកមានឈ្មោះក្នុងបញ្ជីបោះឆ្នោតផ្លូវការ ឆ្នាំ២០២១ នៅតាមភូមិ ក្នុងឃុំ សង្កាត់ ទូទាំងប្រទេស រយៈពេល ១០ ថ្ងៃ គឺចាប់់ពីថ្ងៃទី ២០-២៩ ខែកញ្ញា ឆ្នាំ២០២២ ។ នេះបើ តាមការបញ្ជាក់របស់ គណៈកម្មាធិការជាតិរៀបចំការបោះឆ្នោត (គ.ជ.ប.) នៅថ្ងៃទី២៩ ខែកញ្ញា ឆ្នាំ២០២២។
ផ្អែកតាមចំនួននៃអ្នកមានឈ្មោះ ក្នុងបញ្ជីបោះឆ្នោតផ្លូវការ ឆ្នាំ២០២១ គណៈកម្មាធិការជាតិរៀបចំការបោះឆ្នោត (គ.ជ.ប.) បានផលិតលិខិតអញ្ជើញជាង ៩លាន ២សែនសន្លឹក ដើម្បីចែកជូនដល់អ្នកមានឈ្មោះ ក្នុងបញ្ជីបោះឆ្នោតផ្លូវការឆ្នាំ២០២១ នៅតាមភូមិក្នុងឃុំ សង្កាត់ ទូទាំងប្រទេស។ ការចែកនេះ បានចាប់ពីថ្ងៃទី២០ ខែកញ្ញា រហូតដល់ថ្ងៃទី១៩ ខែតុលា ឆ្នាំ២០២២។
អាជ្ញាធរចែកលិខិតអញ្ជើញ ជូនដល់អ្នកមានឈ្មោះ ក្នុងបញ្ជីបោះឆ្នោតផ្លូវការ ឆ្នាំ២០២១ (រូបថតៈគ.ជ.ប.)
គ.ជ.ប. បានបង្ហាញថា លទ្ធផលបណ្តោះអាសន្ន នៃការផ្តល់លិខិតអញ្ជើញ អ្នកមានឈ្មោះ ក្នុងបញ្ជីបោះឆ្នោតផ្លូវការ ឆ្នាំ២០២១ សម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២២ ចាប់ពថ្ងៃទី២០ ដល់ថ្ងៃទី២៩ ខែកញ្ញា ឆ្នាំ២០២២ បានចំនួន ៤.៥៨០.៦០៣ សន្លឹក ស្មើនឹង ៤៩,៧៦%។
គ.ជ.ប. បានបញ្ជាក់ថា យោងតាមប្រតិទិន នៃការពិនិត្យបញ្ជីឈ្មោះ និងការចុះឈ្មោះ បោះឆ្នោត ឆ្នាំ២០២២ ដំណើរការនៃការផ្ដល់លិខិតអញ្ជើញ ជូនអ្នកមានឈ្មោះ ក្នុងបញ្ជីបោះឆ្នោតផ្លូវការ ឆ្នាំ២០២១ នៅតាមភូមិក្នុងឃុំ សង្កាត់ ទូទាំងប្រទេស បានចាប់ផ្ដើមកាលពីថ្ងៃទី២០ ខែកញ្ញា ឆ្នាំ២០២២។
ការចែកលិខិតអញ្ជើញនេះ មានរយៈពេល ៣០ថ្ងៃ គឺចាប់ពីថ្ងៃទី២០ ខែកញ្ញា រហូតដល់ថ្ងៃទី១៩ ខែតុលា ឆ្នាំ២០២២ ហើយប្រសិនបើមានលិខិតអញ្ជើញនៅសល់ ត្រូវរក្សាទុកនៅសាលាឃុំ សង្កាត់ ដើម្បីផ្ដល់បន្ត រហូតដល់ថ្ងៃបញ្ចប់ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២២។
អាជ្ញាធរចែកលិខិតអញ្ជើញ ជូនដល់អ្នកមានឈ្មោះ ក្នុងបញ្ជីបោះឆ្នោតផ្លូវការ ឆ្នាំ២០២១ (រូបថតៈគ.ជ.ប.)
គ.ជ.ប. បានបញ្ជាក់ទៀតថាៈ គោលបំណងនៃការផ្ដល់លិខិតអញ្ជើញនេះ គឺដើម្បីជម្រាប ជូនដំណឹង ដល់ប្រជាពលរដ្ឋដែលមានឈ្មោះក្នុងបញ្ជីបោះឆ្នោត គឺប្រជាពលរដ្ឋ ដែលមានឈ្មោះ ក្នុងបញ្ជីបោះឆ្នោតផ្លូវការ ឆ្នាំ២០២១ ហើយដែលបានប្រើប្រាស់ អត្តសញ្ញាណប័ណ្ណសញ្ជាតិខ្មែរ (អ.ខ) ដែលអស់សុពលភាព ឬឯកសារបញ្ជាក់ អត្តសញ្ញាណ បម្រើឱ្យការចុះឈ្មោះបោះឆ្នោត (ឯ.អ) កន្លងមក ដើម្បីពិនិត្យផ្ទៀងផ្ទាត់ និងមកធ្វើបច្ចុប្បន្នភាពទិន្នន័យ ក្នុងបញ្ជីបោះឆ្នោតតាម អ.ខ ដែលមានសុពលភាព ក្នុងអំឡុងពេលពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២២ ។
ប្រជាពលរដ្ឋដែលមានឈ្មោះក្នុងបញ្ជីបោះឆ្នោតផ្លូវការ ឆ្នាំ២០២១ ហើយដែលបានប្រើ អ.ខ ដែលមានសុពលភាព ក្នុងការចុះឈ្មោះបោះឆ្នោតកន្លងមក ដើម្បីពិនិត្យផ្ទៀងផ្ទាត់ ឈ្មោះ និងទិន្នន័យរបស់ខ្លួន ក្នុងបញ្ជីបោះឆ្នោត។ ប្រសិនបើពិនិត្យ ឃើញថា មានការកត់ត្រាមិនបានត្រឹមត្រូវតាម អ.ខ ដែលមានសុពលភាព អាចស្នើសុំកែតម្រូវ ក្នុងអំឡុងពេលពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២២។
គួរបញ្ជាក់ថា បើទោះបីជាអ្នកបោះឆ្នោតមិនបានទទួលលិខិតអញ្ជើញ ដោយមូលហេតុ ណាមួយ ឬអ្នកបោះឆ្នោត ដែលទទួលបានលិខិតអញ្ជើញហើយ ប៉ុន្តែខកខានមិនបាន មកពិនិត្យផ្ទៀងផ្ទាត់ទិន្នន័យរបស់ខ្លួន តាមការអញ្ជើញ ក៏ឈ្មោះរបស់ពួកគាត់ នៅរក្សាដដែល ក្នុងបញ្ជីបោះឆ្នោត៕/V
អាជ្ញាធរចែកលិខិតអញ្ជើញ ជូនដល់អ្នកមានឈ្មោះ ក្នុងបញ្ជីបោះឆ្នោតផ្លូវការ ឆ្នាំ២០២១ (រូបថតៈគ.ជ.ប.)
អាជ្ញាធរចែកលិខិតអញ្ជើញ ជូនដល់អ្នកមានឈ្មោះ ក្នុងបញ្ជីបោះឆ្នោតផ្លូវការ ឆ្នាំ២០២១ (រូបថតៈគ.ជ.ប.)
