Views: 6
ដោយៈ ភ្នំសន្ទុក /កំពង់ធំ៖ នៅព្រឹកថ្ងៃទី២៣ ខែកញ្ញា ឆ្នាំ២០២២ លោក ព្រឹម រដ្ឋា អភិបាលរងខេត្តកំពង់ធំ និងប្រធានមន្ទីរពាក់ព័ន្ធ និងរដ្ឋបាលស្រុកស្ទោង បានចុះពិនិត្យ មើលស្រែស្រូវចម្ការរបស់ប្រជាពលរដ្ឋ ដែលកំពុងលិចលង់ដោយសារ ជំនន់ទឹកភ្លៀង នៅឃុំប្រឡាយ ស្រុកស្ទោង។
លោក ព្រឹម រដ្ឋា បានឱ្យដឹងថាៈ ទីតាំងភូមិ និងស្រែចម្ការ ជាក់ស្ដែង ក្នុងនោះ ជាបឋម សង្កេតឃើញថា រងផលប៉ះពាល់រួមមាន ចំនួន ៦ ភូមិ ស្មើនឹង ៦១៥ គ្រួសារ គឺភូមិថ្មីចំនួន ៥៣ គ្រួសារ ភូមិព្រៃខ្លា ចំនួន ១៧៤ គ្រួសារ ភូមិកំពង់វាំង ចំនួន ១៣០ គ្រួសារ ភូមិក្រែកចំនួន ១១៥ គ្រួសារ និងភូមិឈូក ចំនួន ១៤៣ គ្រួសារ។ ជាមួយនេះ ដីស្រែដែលកំពុងលិច និងរងផលប៉ះពាល់ ជារួមមានចំនួន ៤៩៨ ហិកតា គឺ ភូមិថ្មីចំនួន ៩៨ ហិកតា ភូមិព្រៃខ្លា ៨៧ ហិកតា ភូមិក្រែក ៨៦ ហិកតា ភូមិកំពង់វាំង ១៥០ ហិកតា និងភូមិប្រឡាយ ចំនូន ៤៥ ហិកតា ។ ជាមួយគ្នានេះ ក៏មានសាលារៀន ចំនួន ៦ ត្រូវបានលិច និងបិទទ្វារជាបណ្តោះអាសន្ន និងវត្តចំនួនបី បានលិចនៅលើបរិវេណវត្ត ។
លើសពីនេះ លោក ព្រឹម រដ្ឋា បានឲ្យរដ្ឋបាលឃុំប្រឡាយ ត្រូវតាមដានស្ថានភាព ទឹកភ្លៀង និងទឹកជំនន់ជាក់ស្តែង ព្រមទាំងចុះពិនិត្យឲ្យបានជាក់ស្តែងថែមទៀត នូវមុខលូទាំងអស់ ដែលកំពុងកកស្ទះ និងត្រូវឆាប់បើក និងកាយរំដោះទឹកជាបន្ទាន់ និងត្រូវចុះស្រង់ស្ថិតិចំនួនគ្រួសារ និងផ្ទៃដីស្រែ ព្រមទាំងហេដ្ឋារចនាសម្ព័ន្ធនានា ដែលរងផលប៉ះពាល់ជាក់ស្តែង បន្ថែមទៀតជូន រដ្ឋបាលស្រុកស្ទោង និងរដ្ឋបាលខេត្តកំពង់ធំ ឲ្យបានឆាប់បំផុត៕/V
