Views: 6
ដោយៈ ប.ខុន / ភ្នំពេញៈ នៅព្រឹកថ្ងៃទី២៧ ខែកញ្ញានេះ មានភ្លៀងធ្លាក់ច្រើនខ្យល់បក់បោកខ្លាំង និងមានរលកសមុទ្រខ្ពស់ៗ នៅខេត្តព្រះសីហនុ ទូកអ្នកនេសាទ និងទូកដឹក អ្នកដំណើរទៅតាមបណ្តាកោះ ត្រូវបានហាមឃាត់ ដោយអាជ្ញាធរ មិនឱ្យចេញពីផែ។
លោក ហេង សោភ័ណរិទ្ធ ប្រធានមន្ទីរធនធានទឹក និងឧតុនិយម បានប្រាប់ឱ្យរស្មីកម្ពុជាដឹងនៅថ្ងៃទី២៧ ខែកញ្ញា ឆ្នាំ២០២២ថាៈចាប់ពីម៉ោង ៩ ដល់ម៉ោង ១១និង៣០នាទីព្រឹកថ្ងៃ២៧ ខែកញ្ញា នៅក្រុងព្រះសីហនុ មានភ្លៀងធ្លាក់ដល់កម្រិត ៤៨ មីលីម៉ែត្រ ហើយភ្លៀងនៅតែបន្តធ្លាក់ជាមួយនឹងខ្យល់បក់បោកខ្លាំងលើផ្ទៃសមុទ្រ មានរលកខ្ពស់ៗ ចាប់តាំងពីព្រឹករហូតមកដល់ពេលរសៀលនេះ។
ប្រធានមន្ទីរជំនាញ ខាងលើ បាននិយាយឱ្យដឹងទៀតថាៈ បញ្ហាភ្លៀងធ្លាក់ច្រើន និងខ្យល់ខ្លាំងលើផ្ទៃសមុទ្រនេះ មន្ទីរបានជូនព័ត៌មានទៅរដ្ឋបាលខេត្តរួចហើយ។ ពេលនេះ គ្មានទូកណាហ៊ានចេញទៅនេសាទ ឬធ្វើដំណើរទៅតាមបណ្តាកោះនោះទេ បន្ទាប់ពីអាជ្ញាធរ បានជូនដំណឹង អំពីស្ថានភាពអាកាសធាតុ រួចមក។
ក្រសួងធនធានទឹក និងឧតុនិយម នៅថ្ងៃទី ២៧ ខែកញ្ញា ឆ្នាំ២០២២ បានជូនដំណឹង ស្តីពីស្ថានភាពធាតុអាកាស សម្រាប់ពីថ្ងៃទី២៨ ខែកញ្ញា ដល់ថ្ងៃទី៤ ខែតុលា ថាៈ នៅថ្ងៃទី២៨ និង ២៩ ខែកញ្ញា ប្រទេសកម្ពុជា បន្តទទួលរងឥទ្ធិពលពីព្យុះទី១៦ ឈ្មោះណូរុ (NORU) ។ ព្យុះនេះ នឹងចូលលើប្រទេសវៀតណាម ភាគកណ្ដាល នៅវេលាម៉ោង១យប់ថ្ងៃទី២៨ខែកញ្ញាក្នុងកម្រិតជា(STS) រួចបន្ថយឥទ្ធិពលទៅជាវិសម្ពាធ (TD) ដើរលើតំបន់អាងទន្លេមេគង្គមុននឹងថមថយឥទ្ធិពល ទៅជាសម្ពាធទាប (LOW) ។ បន្ទាប់មក ប្រទេសកម្ពុជា ទទួលរងឥទ្ធិពលពីជ្រលងសម្ពាធទាបឥណ្ឌា និងខ្យល់មូសុងនិរតី ក្នុងកម្រិតមធ្យម ។
សេចក្តីជូនដំណឹង ខាងលើ បានសរសេរទៀតថាៈ ស្ថានភាពអាកាសធាតុបែបខាងលើ ធ្វើឲ្យតំបន់ទំនាបកណ្តាល មានសីតុណ្ហភាពអប្បបរមាពី ២២ ទៅ ២៤ អង្សាសេ សីតុណ្ណភាពអតិបរមា មានពី ៣០ ទៅ ៣២ អង្សាសេ។នៅថ្ងៃទី២៨ និងទី២៩ ខែកញ្ញា បណ្ដាខេត្តក្នុងភូមិសាស្ត្រជាប់ព្រំដែនថៃ អាចមានភ្លៀង ក្នុងកំរិតពីបង្គួរទៅច្រើន លាយឡំទៅដោយផ្គរ រន្ទះនិងខ្យល់កន្ត្រាក់។ រីឯរាជធានី និងបណ្តាខេត្តដទៃទៀត អាចមានភ្លៀងធ្លាក់ ក្នុងកំរិតពីតិចទៅបង្គួរ។ បន្ទាប់ពីនោះ ភ្លៀងអាចធ្លាក់ក្នុងកម្រិតពីខ្សោយទៅមធ្យម ។
សម្រាប់តំបន់ខ្ពង់រាប មានសីតុណ្ហភាពអប្បបរមាពី ២១ ទៅ ២៣ អង្សាសេ សីតុណ្ហភាពអតិបរមា មានពី ២៩ ទៅ ៣១ អង្សាសេ ។ នៅថ្ងៃទី២៨ និងទី២៩ ខែកញ្ញា អាចមានភ្លៀងធ្លាក់ ក្នុងកម្រិតពីបង្គួរទៅច្រើន លាយឡំទៅដោយផ្គរ រន្ទះ និងខ្យល់កន្ត្រាក់ ។ ចាប់ពីថ្ងៃទី៣០ ខែកញ្ញាទៅ ភ្លៀងអាចធ្លាក់ក្នុងកំរិតពីខ្សោយទៅបង្គួរ។
នៅតំបន់មាត់សមុទ្រ មានសីតុណ្ហភាពអប្បបរមាពី ២២ ទៅ ២៤ អង្សាសេ សីតុណ្ណភាពអតិបរមាមានពី ២៨ ទៅ ៣០ អង្សាសេ ។ អាចមានភ្លៀង ក្នុងកំរិតពីមធ្យមទៅច្រើន លាយឡំទៅដោយផ្គរ រន្ទះ និងខ្យល់កន្ត្រាក់។នៅលើផ្ទៃសមុទ្រ អាចមានភ្លៀងលាយឡំ និងខ្យល់បក់បោកខ្លាំង រលកសមុទ្រខ្ពស់ៗ បន្តរហូតដល់ថ្ងៃទី៣០ ខែកញ្ញា។
យោងលើស្ថានភាពធាតុអាកាស ដូចបានជម្រាបជូនខាងលើ ក្រសួងធនធានទឹកនិងឧតុនិយម បានសូមអាជ្ញាធរដែនដី និងសាធារណជន ជ្រាបជាព័ត៌មាន និងបន្តប្រុងប្រយ័ត្ន ចំពោះបាតុភូតធម្មជាតិ ដែលអាចកើតមានឡើងជាយថាហេតុ ៕/V