Views: 1
ដោយៈសុផល/ភ្នំពេញ៖ ពិព័រណ៍មុខរបរប្រចាំឆ្នាំ២០២២ ជាលើកដំបូង នឹងប្រារព្ធធ្វើឡើងនៅចុងឆ្នាំ២០២២នេះ ក្នុងគោលបំណងចង់ឃើញstartups កម្ពុជាមាន គំនិតរកស៊ីថ្មីៗច្រើន ដែលឈានដល់ការទាញបរទេសឱ្យចូលមកទស្សនាការតាំងពិព័រណ៍គំនិតរកស៊ី នៅកម្ពុជា នាពេលអនាគត” ។
ពិព័រណ៍មុខរបរប្រចាំឆ្នាំ២០២២ (Startup Expo 2022) នឹងធ្វើឡើងនាថ្ងៃទី២៩-៣០ ខែតុលា ដែលរៀបចំដោយស្ថាប័ន Business Cambodia ។
នៅក្នុងសន្និសីទសារព័ត៌មានស្តីពីការរៀបចំពិព័រណ៍នៅFactory Phnom Penh លោក សំ កុសល ស្ថាបនិក Baksey Media បានលើកឡើងថា “នេះគឺជាលើកទី១ហើយដែលក្រុមការងារចាបក្រហម (Business Cambodia) បានរៀបចំពិព័រណ៍មុខរបរប្រចាំឆ្នាំ២០២២នេះឡើង ។យើងមានគោលដៅធំ គឺចង់ឃើញកម្ពុជាមានគំនិតរកស៊ីថ្មីៗច្រើន ដែលឈានដល់ការទាញបរទេសឱ្យចូលមកទស្សនាការតាំងពិព័រណ៍គំនិតរកស៊ី នៅកម្ពុជា នាពេលអនាគត” ។
ស្ថាបនិក Business Cambodia រូបនេះ បានគូសបញ្ជាក់ថា ព្រឹត្តិការណ៍តាំងបង្ហាញគំនិតអាជីវកម្មថ្មីៗ នៅថ្ងៃទី២៩-៣០ ខែតុលាខាងមុខនេះ នឹងមានស្តង់អាជីវកម្មប្លែកៗ ពោរពេញដោយគំនិតច្នៃប្រឌិត ប្រមាណជា ៥០ស្តង់ ហើយនៅក្នុងថ្ងៃពិព័រណ៍នោះផងដែរ ក៏មានសិក្ខាសាលាដ៏ធំបំផុតមួយ ដែលមានសុទ្ធតែវាគ្មិនល្បីៗចំនួន១៦រូប មានបទពិសោធន៍ធ្វើអាជីវកម្មជោគជ័យច្រើនឆ្នាំ ឡើងធ្វើបទបង្ហាញស្តីពី “គំនិតរកស៊ីថ្មីៗ និងយុទ្ធសាស្ត្រនៅក្នុងការកៀរគរទុនសម្រាប់ធ្វើអាជីវកម្ម” ផងដែរ។
លោក សំ កុសល បានរំលេចឱ្យដឹងទៀតថានៅក្នុងការតាំងពិព័រណ៍ដ៏ធំខាងលើនេះ Business Cambodia ក៏បានរៀបចំឱ្យមានការផ្តល់រង្វាន់ចំនួន២,០០០ដុល្លារ និងការផ្សព្វផ្សាយដែលមានតម្លៃស្មើនឹង២,០០០ដុល្លារបន្ថែមទៀត សម្រាប់ម្ចាស់ស្តង់អាជីវកម្មណា ដែលមានភាពទាក់ទាញខ្លាំង អាចមានការលក់ដាច់ច្រើនជាងគេ នៅក្នុងថ្ងៃតាំងពិព័រណ៍មុខរបរឆ្នាំ២០២២ ផងដែរ។
បន្ថែមពីនេះ លោកបង្ហាញពីជំនឿយ៉ាងមុតមាំថា ការតាំងពិព័រណ៍មុខរបរប្រចាំឆ្នាំ២០២២នេះ នឹងក្លាយជាការតាំងបង្ហាញដែលមានតម្លៃបំផុតសម្រាប់ម្ចាស់អាជីវកម្ម ក៏ដូចជាអ្នកចូលរួមទស្សនា ដែលមានយ៉ាងតិចប្រមាណជាង ១៥០០០នាក់ ក្នុងរយៈពេលពីរថ្ងៃផងដែរ តាមរយៈសកម្មភាពប្លែកជាច្រើន ដូចជាការធ្វើប្រម៉ូសិនមហា អស្ចារ្យរួមគ្នារបស់ម្ចាស់ស្តង់ ការញ៊ាំប៉ូហ្វេ និងការប្រកួតញាំអាហារ ការចែកសៀវភៅដ៏ធំមិនធ្លាប់មានចំនួន៣ពាន់ក្បាល ដោយឥតគិតថ្លៃ ការចែករំលែកពីគំនិតរកស៊ីរបស់ម្ចាស់ស្តង់អាជីវកម្មនីមួយៗ និងវាគ្មិនល្បីៗជាច្រើនរូបទៀត ដោយឥតគិតថ្លៃ។ លើសពីនេះ យើងក៏មានការបើកសម្ពោធផលិតផល និងសេវាកម្មថ្មីៗ របស់ម្ចាស់ស្តង់អាជីវកម្មថែមទៀត។
ជាមួយគ្នានេះដែរ លោក ម៉ង់ វណ្ណឌី ដែលជាស្ថាបនិកក្រុមហ៊ុន BizAdvisor និងជាម្ចាស់ឧបត្តម្ភធំនៅក្នុងកម្មវិធីពិព័រណ៍មុខរបរឆ្នាំ២០២២ បានបង្ហាញពីអារម្មណ៍រីករាយដែលបានក្លាយជាចំណែកដ៏សំខាន់មួយរបស់ Business Cambodia ។ ដោយលោកបានសង្កត់ធ្ងន់យ៉ាងដូច្នេះថា “ខ្ញុំពិតជាជំរុញនិងលើកទឹកចិត្តឱ្យបងប្អូនទាំងអស់គ្នា ដែលជាម្ចាស់អាជីវកម្មខ្នាតតូចនិងខ្នាតមធ្យមចូលរួមទាំងគ្នាក្នុងការបង្ហាញផលិតផលដ៏អស្ចារ្យរបស់បងប្អូន ទៅកាន់សាធារណជនឱ្យយើងបានឃើញ បានស្គាល់ពីគុណតម្លៃនៃការប្រឹងប្រែងរបស់យើងទាំងអស់គ្នា ក្នុងការបង្កើតលទ្ធផលដ៏អស្ចារ្យមួយនេះ” ។
សូមបញ្ជាក់ថា ព្រឹត្តិការណ៍ពិព័រណ៍មុខរបរឆ្នាំ២០២២ និងសិក្ខាសិលាដ៏ធំអស្ចារ្យខាងលើនេះ នឹងប្រព្រឹត្តិទៅនៅថ្ងៃទី២៩-៣០ ខែតុលា ខាងមុខនេះហើយ។ ដូច្នេះសម្រាប់ម្ចាស់អាជីវកម្ម បងប្អូនសាធារណជនកុំឱ្យខកខានឱកាសដ៏មានតម្លៃ និងមានតែមួយដងនៅក្នុងមួយឆ្នាំនេះឱ្យសោះ៕Ph
