Views: 5
ដោយ៖តារារិទ្ធ(ព្រះសីហនុ)៖នៅព្រឹកថ្ងៃទី១០ ខែធ្នូ ឆ្នាំ២០២២ស្អែកនេះសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុ ជានឹងអញ្ជើញជាអធិបតីបើកមហាសន្និបាតលើកទី ១៦ របស់ក្លឹបឆ្នេរសមុទ្រដែលស្អាតបំផុតលើសាកលលោក ។ ពិធីនេះធ្វើឡើងនៅសណ្ឋាគារសុខាក្នុងក្រុងព្រះសីហនុ ។
លោក ថោង ខុន រដ្ឋមន្ត្រីក្រសួងទេសចរណ៍បានឱ្យដឹងថាដោយមើលឃើញឱកាសផ្សព្វផ្សាយសក្តានុពលទេសចរណ៍ទៅកាន់ពិភពលោកតាមរយៈការធ្វើជាម្ចាស់ផ្ទះក្នុង ការរៀបចំមហាសន្និបាតរបស់ក្លឹបឆ្នេរសមុទ្រស្អាតបំផុតលើសាកលលោកនោះនៅឆ្នាំ ២០១៨ សម្តេចតេជោ ហ៊ុន សែន នាយករដ្ឋមន្ត្រីកម្ពុជាបានអនុញ្ញាតឱ្យក្រសួង ទេសចរណ៍ដាក់ពាក្យទទួលសិទ្ធិធ្វើជាម្ចាស់ផ្ទះរៀបចំមហាសន្និបាតនេះជាថ្មីម្តងទៀត។
តាមរយៈសំណើរបស់កម្ពុជាមហាសន្និបាតរបស់ក្លឹបលើកទី ១៥ ដែលរៀបចំនៅទីក្រុងឆ្នេរសមុទ្រតូយ៉ាម៉ា ប្រទេសជប៉ុន ឆ្នាំ២០១៩ក៏បានបោះឆ្នោតជាឯកច្ឆ័ន្ទផ្តល់សិទ្ធិឱ្យ កម្ពុជាធ្វើជាម្ចាស់ផ្ទះរៀបចំមហាសន្និបាតនេះជាលើកទី២នៅក្នុងឆ្នាំ២០២២ បន្ទាប់ពីពិនិត្យឃើញកម្ពុជាធ្វើជាម្ចាស់ផ្ទះដោយជោគជ័យនៅឆ្នាំ២០១៣។
មហាសន្និបាតលើកទី១៦ របស់ក្លឹបឆ្នេរសមុទ្រដែលស្អាតបំផុតលើសាកលលោកដែលរៀបចំឡើងនៅកម្ពុជានេះ មានរយៈពេលប្រមាណជា៦ ថ្ងៃ ចាប់ពីថ្ងៃទី៩ ដល់ ១៤ខែ ធ្នូ ឆ្នាំ២០២២ ។ មហាសន្និបាតនេះរៀបចំឡើងក្រោមប្រធានបទ «ឆ្នេរនៃសន្តិភាព ឆ្នេរនៃក្តីសង្ឃឹម»។
លោករដ្ឋមន្ត្រីក្រសួងទេសចរណ៍បានឱ្យដឹងថាការដាក់ចេញនូវប្រធានបទនេះគឺសមស្របទៅនឹងស្ថានភាពនាពេលបច្ចុប្បន្នដែលពិភពលោកទាំងមូលកំពុងប្រឈមនឹងវិបត្តិសាកលជាច្រើនបន្ថែមពីលើវិបត្តិជំងឺកូវីដ១៩ ជាពិសេសសង្គ្រាមរុស្ស៊ីនិងអ៊ុយក្រែនដែលបានជះឥទ្ធិពលយ៉ាងខ្លាំងដល់ពិភពលោកទាំងលើផ្នែកសេដ្ឋកិច្ចការអភិ វឌ្ឍសង្គមនិងសណ្តាប់ធ្នាប់ពិភពលោក។
លោក ថោង ខុន បានឱ្យដឹងថាក្នុងនាមជាម្ចាស់ផ្ទះនៃមហាសន្និបាតនេះកម្ពុជានឹងចែករំលែកនូវបទពិសោធន៍និងការអនុវត្តល្អៗរបស់ខ្លួនទៅកាន់សមាជិកក្លឹបទាំង អស់និងពិភពលោកទាំងមូល ទាំងលើការគ្រប់គ្រងនិងអភិវឌ្ឍតំបន់ឆ្នេរសមុទ្រ ផ្តើមចេញពីសន្តិភាពដែលខ្លួនរកបានដោយកម្រជាមួយក្តីសង្ឃឹមប្រកបដោយសុទិដ្ឋិ និយមជាសត្យានុម័តនាពេលអនាគត។ លោកក៏បានបង្ហាញក្តីរំពឹងផងដែរថាតាមរយៈដំណើរទស្សនកិច្ចទៅកាន់គោលដៅទេសចរណ៍ពីសំណាក់ប្រតិភូនៃបណ្តាប្រទេស សមាជិកក្លឹបនោះនឹងជួយផ្សព្វផ្សាយពីគោលដៅទេសចរណ៍កម្ពុជាទៅកាន់ពិភពលោកផងដែរពីព្រោះក្លឹបឆ្នេរសមុទ្រដែលស្អាតជាងគេនៅលើសាកលលោកមានសមា ជិកមានប្រព័ន្ធផ្សព្វផ្សាយហើយក៏ដូចជាទីភ្នាក់ងារមួយក្នុងការផ្សព្វផ្សាយណែនាំចង្អុលបង្ហាញទៅកាន់ភ្ញៀវទេសចរប្រកបដោយប្រសិទ្ធភាព។
ប្រតិភូក្លឹបឆ្នេរសមុទ្រដែលស្អាតបំផុតលើសកលលោកដែលចូលរួមក្នុងមហាសន្និបាតនេះមានចំនួនសរុបប្រមាណ ១៣០រូបតំណាងឱ្យឆ្នេរសមុទ្រចំនួន ៣៤ឆ្នេរមកពីប្រ ទេសចំនួន២១ ជុំវិញពិភពលោក ។ ប្រតិភូដែលអញ្ជើញចូលរួមនេះមកពីវៀតណាម ចិន ជប៉ុន កូរ៉េខាងត្បូង ហ្វីលីពីន អ៊ីស្រាអែល តួកគី បារាំង អេស្ប៉ាញ ព័រទុយហ្កាល់ កាណាដា ប្រេស៊ីល ម៉ាទីនិក (នៅសមុទ្រការីបង់) ម៉ារ៉ុក ម៉ូសំប៊ិក សេណេហ្កាល់ អង់ហ្គោឡា។ ក្រៅពីនេះ ក៏មានប្រតិភូតំណាង ឱ្យឆ្នេរសង្កេតការណ៍៣ទៀត មកពីម៉ាឡេស៊ី ហ្វាំងឡង់ និងប៉ាពូយូហ្គីណេ។
បន្ទាប់ពីក្លាយជាសមាជិកក្លឹបឆ្នេរសមុទ្រដែលស្អាតបំផុតលើសាកលលោកនៅឆ្នាំ ២០១១ កម្ពុជាធ្លាប់បានធ្វើជាម្ចាស់ផ្ទះរៀបចំមហាសន្និបាតនេះរួចម្តង មកហើយកាលពី ឆ្នាំ ២០១៣ នៅរមណីយដ្ឋានឋានសួគ៌បូកគោក្នុងខេត្តកំពត។
គួរបញ្ជាក់ថាក្លឹបឆ្នេរសមុទ្រដែលស្អាតបំផុតលើសាកលលោកនៅឆ្នាំ ១៩៩៧ នៅទីក្រុងប៊ែរឡាំងប្រទេសអាល្លឺម៉ង់ ដែល ស្ថិតក្រោមការគាំទ្ររបស់អង្គការយូណេស្កូ (UNESCO)ក្នុងគោលបំណងសំខាន់ៗចំនួន៣រួមមានទី១-សំរួលការដោះដូរបទពិសោធន៍រវាងសមាជិក លើបញ្ហាបរិស្ថាន សង្គម សេដ្ឋកិច្ច និងទេសចរណ៍ និងធ្វើការចែករំលែកអំពីលទ្ធផលស្រាវជ្រាវ និងសិក្សាបែបវិទ្យាសាស្ត្រនានាទាក់ទងនឹងការអភិវឌ្ឍ និងការអភិរក្សដោយឈរលើគោលការណ៍និរន្តរភាពដល់សមាជិក ទី២-ជំរុញការដោះដូរបទពិសោធន៍ និងជំនាញរវាងសមាជិកលើការងារផ្សព្វផ្សាយទេសចរណ៍និងទី៣-ជំរុញឱ្យមានការភ្ជាប់ទំនាក់ទំនង និងផ្លាស់ប្តូររវាងប្រជាជន និងប្រជាជនដែលរស់នៅតាមឆ្នេរជាសមាជិក (លើការងារសង្គម វប្បធម៌ កីឡា។ល។) ។
បច្ចុប្បន្នក្លឹបនេះមានប្រទេសសមាជិកចំនួន២៦ប្រទេស (ទ្វីបអាហ្វ្រិកចំនួន៦ប្រទេស ទ្វីបអាមេរិកចំនួន៧ប្រទេស ទ្វីបអាស៊ីចំនួន៥ប្រទេស និងទ្វីបអឺរ៉ុបចំនួន៧ប្រទេ ស) ដែលក្នុងនោះរួមមាន៤៤ ឆ្នេរ និងមានទីស្នាក់ការអចិន្ត្រៃយ៍នៅទីក្រុងក្រុងវ្យែន(Vannes)ប្រទេសបារាំង ។ «ឆ្នេរសមុទ្រកម្ពុជា»បានក្លាយជាសមាជិកទី៣៣របស់ក្លឹបនេះ ។
ជាការពិតការជាប់ជាសមាជិកក្លឹបឆ្នេរសមុទ្រដែលស្អាតបំផុតលើសាកលលោកនេះនឹងផ្តល់ផលប្រយោជន៍ជាច្រើនដល់កម្ពុជាមានជាអាទិ៍ ទី១-ចូលរួមគាំទ្រដល់ការអភិ វឌ្ឍទេសចរណ៍ប្រកបដោយនិរន្តរភាពនិងការទទួលខុសត្រូវនៅតំបន់ឆ្នេរដោយកម្ពុជានឹងអាចដកស្រង់បទពិសោធន៍ល្អៗក្នុងការអនុវត្ត (Best Practices)ក៏ដូចជាទទួលជំនាញបច្ចេកទេស (Expertise)ក្នុងការគ្រប់គ្រងតំបន់ឆ្នេរពីឆ្នេរជាសមាជិកដទៃទៀត ពិសេសលើការអភិវឌ្ឍ និងការអភិរក្សតំបន់ឆ្នេរ ព្រមទាំងការបង្កើនប្រសិទ្ធភាពសេដ្ឋកិច្ចនៅតំបន់ឆ្នេរសមុទ្រ តាមរយៈការអភិវឌ្ឍវិស័យទេសចរណ៍ជាដើម ។ល។ ទី២-បង្កើនកំលាំងផ្សព្វផ្សាយសក្តានុពលទេសចរណ៍តំបន់ឆ្នេរសមុទ្រកម្ពុជាដោយយើងនឹងមានសិទ្ធិក្នុងការប្រើប្រាស់និមិត្តសញ្ញាផ្លូវការរបស់ក្លឹប«ឆ្នេរសមុទ្រដែលស្អាតបំផុ តលើសាកលលោក»ដែលនឹងចូលរួមគាំទ្រដល់យុទ្ធនាការផ្សព្វផ្សាយទេសចរណ៍ «កម្ពុជាៈ ព្រះរាជាណាចក្រអច្ឆរិយៈ»និងជួយលើកស្ទួយកិត្យានុភាពឆ្នេរសមុទ្រកម្ពុជា នៅលើឆាកអន្តរជាតិ (ដោយអាចភ្ជាប់ទៅនឹងវ៉េបសាយរបស់ក្លឹប www.world-bays.com)ពិសេសចូលរួមគាំទ្រគោលនយោបាយពង្រីកគោលដៅទេសចរណ៍ឱ្យមានភាពសំបូរបែប ពីតំបន់ទេសចរណ៍វប្បធម៌ (សៀមរាប- អង្គរ) ទៅកាន់តំបន់ឆ្នេរសមុទ្រផងដែរ ។ទី៣-ក្លឹបបានទទួលស្គាល់ឈ្មោះ «ឆ្នេរសមុទ្រកម្ពុជា»(Cambodia Bay-La Baie du Cambodge)ជាផ្លូវការដែលនេះនឹងផ្តល់អំណោយផលល្អសំរាប់តំបន់ឆ្នេរសមុទ្រកម្ពុជាលើឆាកអន្តរជាតិដែលជាទូទៅត្រូវបានស្គាល់ថាស្ថិតនៅតំបន់ឈូងសមុទ្រថៃ(Gulf of Thailand)៕
