Views: 1
ដោយៈ ចាន់តូ/ភ្នំពេញ៖ ភោជនីយដ្ឋានយីហោ «កន្លែងថ្មី» ស្ថិតនៅក្រោយ សណ្ឋាគារ ដឺឡឺប្រេង ស៊ីដង់ នៅចំណុច ផ្ទះលេខ៨៨ និងផ្ទះលេខ៩០ តាមបណ្តោយ ផ្លូវលេខ១៣៨ ក្រុមទី៣ ភូមិទី២ សង្កាត់ផ្សារដេប៉ូទី២ ខណ្ឌទួលគោក រាជធានីភ្នំពេញ ត្រូវបានអគ្គីភ័យឆាប់ឆេះយ៉ាងសន្ធោរសន្ធៅ កាលពីវេលាម៉ោងប្រមាណ ១០កន្លះព្រឹក ថ្ងៃទី៣១ ខែមករា ឆ្នាំ២០២៣ បណ្តាលអោយបុរសជាបុគ្គលិកម្នាក់ស្លាប់នៅនឹងកន្លែង និងរងរបួសធ្ងន់ធ្ងរ២នាក់ត្រូវបានបញ្ជូន ទៅសង្គ្រោះបន្ទាន់ ។
ម្ចាស់ហាងដែលត្រូវភ្លើងឆេះ ឈ្មោះ ហុក ទ្រី ភេទប្រុស អាយុ៣១ឆ្នាំ មានទីលំនៅផ្ទះលេខ45F បូរីលឹមឈាងហាក់ សង្កាត់វាលស្បូវ ខណ្ឌច្បារអំពៅ រាជធានីភ្នំពេញ។ ជនរងគ្រោះថ្នាក់ដោយសារតែអគ្គីភ័យពុំទាន់ស្គាល់អត្តសញ្ញាណនៅឡើយ។
តាមសាក្សី បានអោយដឹងថានៅមុនពេលកើតហេតុគេឃើញភ្លើង បានឆាបឆេះចេញ ពីផ្ទះល្វែងលេខ ៨៨ យ៉ាងសន្ធោសន្ធៅហើយ ឆេះរាលដាល់យ៉ាងរហ័សទៅផ្ទះ លេខ៩០។ នៅក្នុងហេតុការណ៍នោះ បណ្តាលអោយមនុស្ស ចំនួន ៣នាក់ក្នុងចំណោម៤នាក់ ដែលនៅក្នុងផ្ទះល្វែង បានជាប់នៅខាងក្នុង។ ភ្លាមៗអាជ្ញាធរ និង សម្ថកិច្ច បានចេញរថយន្តពន្លត់អគ្គីភ័យ ជាច្រើនគ្រឿង ទៅអន្តរាគមន៍បាញ់ពន្លត់។
តាមព័ត៌មានអោយដឹងថា បុរសម្នាក់ ត្រូវភ្លើង ឆេះស្លាប់នៅក្នុងផ្ទះពេលរត់ចូលទៅក្នុងបន្ទប់ទឹក ហើយ ស្ត្រីម្នាក់ជាប់នៅ ឮជាន់លើ ត្រូវបានសមត្ថកិច្ចជួយ សង្គ្រោះ ដោយរងរបួសធ្ងន់សន្លប់ស្តូកស្តឹង និង បុរសម្នាក់ទៀត បានរត់ចេញទាំងរងរបួសធ្ងន់។ លុះក្រោយមកត្រូវបាននគរបាលហៅរថយន្តបញ្ជូន ទៅសង្គ្រោះ។
ទាក់ទិនការកើតមានអគ្គីភ័យនេះ តាមនគរបាលមូលដ្ឋាន បានឱ្យដឹងថា បណ្តាលមកពី ឆ្លងចរន្តអគ្គីសនី ។
បើតាមព័ត៌មានខ្លះអះអាងថា បណ្តាលមកពី ជាងផ្សារដែក នៅផ្ទះល្វែង ហើយកំទេចភ្លើងបានធ្លាក់ក្លាយជាអគ្គីភ័យតែម្តង៕/R
