Views: 9
ប្រែសម្រួលៈបំណង(ស្ត្រេតថែមស៍,ដេល្លីម៉េល)៖ ចំនួនអ្នកឆ្លងកូវីដ១៩ថ្មីនៅចិនបានកើនឡើងដល់ចំនួនខ្ពស់បំផុតធៀបនឹងការឆ្លងប្រចាំថ្ងៃនៅរយៈពេលប្រមាណមួយខែមកនេះ ជំរុញដោយការធ្វើដំណើររបស់ប្រជាជនក្នុងអំឡុងបុណ្យជាតិមួយសប្តាហ៍ ដោយបង្កអោយមានការបិទខ្ទប់ជុំថ្មីមួយដើម្បីទប់ការរីករាលដាលជំងឺនៅមុនសមាជបក្សដ៏សំខាន់។
តេស្តិ៍រកកូវីដ១៩នៅរដ្ឋធានីប៉េកាំង ចំពេលអាជ្ញាធររឹតបន្តឹងវិធានការប្រឆាំងកូវីដ១៩នៅមុនសមាជបក្សនាពាកើកណ្តាលខែនេះ
ចិនបានរាយការណ៍អ្នកឆ្លងក្នុងស្រុកថ្មី១.១៣៨នាក់សំរាប់ថ្ងៃពុធ ជាចំនួនឆ្លងខ្ពស់បំផុតគិតចាប់តាំងពីថ្ងៃ០៩កញ្ញា ក្នុងនេះ ៤៥៧នាក់ឆ្លងនៅតំបន់ម៉ុងហ្គោលីខាងក្នុងដែលកំពុងបិទខ្ទប់។
ក្រុងសៀងហៃ បានរកឃើញអ្នកឆ្លងថ្មី១១នាក់សំរាប់ថ្ងៃពុធ ដែលក៏ជាចំនួនឆ្លងប្រចាំថ្ងៃច្រើនបផុតក្នុងរយៈពេលមួយខែមកនេះផងដែរ។
ផ្នែកខ្លះនៃខេត្តហៃណានភាគខាងត្បូង ក៏ត្រូវបានបិទខ្ទប់សាជាថ្មី ដោយអាជ្ញាធរទីក្រុងហៃកូ( Haikou)បញ្ជាអោយអ្នកស្រុកទាំងអស់នៅក្នុងផ្ទះនិងផ្អាកការធ្វើដំណើរតាមមធ្យោបាយគមនាគមន៍សាធារណៈនៅថ្ងៃព្រហស្បតិ៍ក្រោយការរកឃើញអ្នកឆ្លើងបួននាក់នៅពីរថ្ងៃមកនេះ។ក្នុងពេលជាមួយគ្នាទីក្រុងទេសចរណ៍សាន់យ៉ា ដែលទើបបប្ចប់ការបិទខ្ទប់កាលពីពីរសប្តាហ៍មុន បានធ្វើតេស្តិ៍រកកូវីដទ្រង់ទ្រាយធំនិងបិទតំបន់ខ្លះ ក្រោយរកឃើញអ្នកឆ្លងពីរនាក់កាលពីថ្ងៃចន្ទ។
តំបន់ស៊ីនជាំងដ៏ធំរបស់ចិនកំពុងជួបការរឹតត្បិតការធ្វើដំណើរដើម្បីទប់ស្កាត់កូវីដ១៩ ។រថភ្លើង និងរថយន្តក្រុងចេញនិងចូលតំបន់ដែលមានប្រជាជន២២លាននាក់នេះត្រូវបានផ្អាកនៅថ្ងៃ៦តុលា និងចំនួនអ្នកដំណើរតាមយន្តហោះត្រូវបន្ថយមកនៅត្រឹម៧៥ភាគរយនៃចំណុះរបស់វា។
នៅកន្លែងផ្សេងទៀត ទូរទស្សន៍រដ្ឋ CCTV បានរាយការណ៍ថា អ្នកស្រុកនៅក្រុងហ្កាងហាន(Guanghan)ក្នុងខេត្តស៊ីឈ័ន ត្រូវបានបញ្ជាអោយនៅក្នុងផ្ទះចាប់ពីព្រឹកថ្ងៃព្រហស្បតិ៍។
ការផ្ទុះកូវីដជាច្រើនកន្លែងនេះជាការប្រឈមមួយសំរាប់អាជ្ញាធរដែលខិតខំទប់ស្កាត់ការរីករាលដាលជំងឺឆ្លងនេះនៅមុនសមាជបក្សនៅពាកើកណ្តាលខែតុលា នៅពេលប្រធានាធិបតីស៊ី ជីនភីង ត្រូវរំពឹងថានឹងទទួលបានការគាំទ្រសំរាប់អាណត្តិទីបី ជាអ្វីដែលមិនធ្លាប់មានប្រធានាធិបតីចិនណាធ្វើបាននាពេលកន្លងមក។
យុទ្ធសាស្ត្រសូន្យកូវីដជាឆ្អឹងខ្នងមួយនៃភាពជាអ្នកដឹកនាំរបស់លោកស៊ី ហើយវិធានការដូចជាការបិទខ្ទប់ភ្លាមៗគួបផ្សំនឹងចត្តាឡីស័ក ត្រូវបានគេមើលឃើញថាចាំបាច់ដើម្បីបញ្ចៀសការស្លាប់មនុស្សច្រើនដូចនៅផ្នែកផ្សេងៗនៃពិភពលោក ទោះជាត្រូវចំណាយ និងប៉ះពាល់សង្គមនិងសេដ្ឋកិច្ចបន្តិចក្តី៕
អ្នកក្រុងតម្រង់ជួរនៅក្រុងក្វាងចូវ កាលពីថ្ងៃ៣១កក្កដាដើម្បីតេស្តិ៍រកកូវីដ១៩
