Views: 3
ប្រែសម្រួលៈបំណង(Xinhua)៖ ចិនបានទទូចសុំអាម៉េរិកនិងជប៉ុនបោះបង់ចោលគំនិតសង្គ្រាមត្រជាក់ព្រមទាំងការលម្អៀងមនោគមវិជ្ជា ឈប់បង្កើតសត្រូវតាមការស្រមៃនិងឈប់ព្យាយាមសាបព្រួសសង្គ្រាមត្រជាក់ថ្មីមួយនៅអាស៊ីប៉ាស៊ីហ្វិក ហើយក៏កុំប្រែក្លាយខ្លួនទៅជាអ្នកឆាឆៅតំបន់អាស៊ីប៉ាស៊ីហ្វិកដែលមានស្ថិរភាពមួយ នេះបើតាមអ្នកនាំពាក្យក្រសួងការបរទេសចិនបាននិយាយកាលពីថ្ងៃសុក្រ។
អ្នកនាំពាក្យលោក វ៉ាង វិនពីន (Wang Wenbin)បាននិយាយដូច្នេះនៅពេលត្រូវបានសួរអំពីសេចក្តីថ្លែងការណ៍រួមមួយចេញដោយអាម៉េរិកនិងជប៉ុននៅសប្តាហ៍នេះ។យោងតាមរបាយការណ៍ នៅក្នុងសេចក្តីថ្លែងការណ៍រួមនេះ អាម៉េរិកនិងជប៉ុនបានហៅចិនថាជា«ការប្រឈមយុទ្ធសាស្ត្រធំបំផុតនៅក្នុងតំបន់ឥណ្ឌូប៉ាស៊ីហ្វិកនិងហួសពីនេះ» ព្រមទាំងបានរិះគន់ចិនពាក់ព័ន្ធនឹងបញ្ហាតៃវ៉ាន់ ហុងកុងស៊ីនជាំង និងបញ្ហាសមុទ្រ។
លោកវ៉ាងបាននិយាយថា ការនិយាយសំដៅចិននៅក្នុងសេចក្តីថ្លែងការណ៍រួមនេះ ជាការបង្កើតគំនិតសង្គ្រាមត្រជាក់មានអ្នកចាញ់មានអ្នកឈ្នះមួយ និងបង្ហាញការមួលបង្កាច់គ្មានមូលដ្ឋាននិងការវាយប្រហារលើចិន។«យើងប្រឆាំងវាជាដាច់ខាត»។
លោកបានបន្តថា អាម៉េរិកនិងជប៉ុនអះអាងថាពួកគេជំរុញសន្តិភាពនិងសន្តិសុខតំបន់ តែអ្វីដែលពួកគេធ្វើគឺគ្រាន់តែជាការស្វះស្វែងរកលេសដើម្បីបង្កើនកម្លាំងយោធានិងការប្រើកម្លាំងបែបមនុស្សពាលប៉ុណ្ណោះ។ពួកគេអះអាងថាដឹកនាំតំបន់ឥណ្ឌូប៉ាស៊ីហ្វិកមួយសេរីនិងបើកចំហ តែអ្វីដែលពួកគេធ្វើគឺបង្កើតប្លុកផ្សេងៗគ្នាដើម្បីបង្កការបែកបាក់និងការប្រឈមមុខគ្នា។
«អាម៉រិកនិងជប៉ុនអះអាងថាជាអ្នកប្រកាន់ខ្ជាប់សណ្តាប់ធ្នាប់អន្តរជាតិផ្អែកលើច្បាប់ តែអ្វីដែលពួកគេបានធ្វើគឺជាន់ឈ្លីច្បាប់អន្តរជាតិនិងបទដ្ឋានគ្រឹះពាក់ព័ន្ធនឹងការគ្រប់គ្រងទំនាក់ទំនងអន្តរជាតិហើយជ្រៀតជ្រែកចូលកិច្ចការប្រទេសដទៃទាំងងងើល។អ្វីដែលពួកគេបានធ្វើបង្កការប្រឈមជាក់ស្តែងចំពោះសន្តិភាព សន្តិសុខនិងស្ថិរភាពតំបន់»។
លោកវ៉ាងបាននិយាយទៀតថា អាស៊ីប៉ាស៊ីហ្វិកជាយុថ្កាមួយសំរាប់សន្តិភាពនិងការអភិវឌ្ឍ មិនមែនជាសមរភូមិប្រកួតប្រជែងភូមិសាស្ត្រនយោបាយទេហើយប្រទេសក្នុងតំបន់ចង់បានយុត្តិធម៌និងប្រឆាំងអនុត្តរភាពនិយម ចង់បានកិច្ចសហការមិនមែនការប្រឈមមុខគ្នាទេ។ពួកគេមានចង់បានពហុភាគីនិយមពិត និងច្រានចោលការបង្កើតបក្ខក្រុមតូចៗ ដែលញុះញង់អោយមានការប្រឈមមុខរវាងប្លុក៕
អ្នកនាំពាក្យលោក វ៉ាង វិនពីន
