Views: 9
ប្រែសម្រួល : កញ្ញាដាលីស (ដេល្លីម៉េល) ៖ អាជ្ញាធរបាននិយាយកាលពីថ្ងៃពុធទី១០សីហាថា ទាហានម៉ាលីចំនួន ៤២នាក់បានស្លាប់នៅក្នុងការវាយប្រហារដ៏ស្មុគស្មាញមួយកាលពីចុងសប្តាហ៍សង្ស័យធ្វើឡើងដោយពួកជីហាត ដែលប្រើប្រាស់កាំភ្លើងធំនិងដ្រូន ដែលជាឧបទ្ទវហេតុហិង្សាចុងក្រោយបំផុតដែលអង្រួនប្រទេសតំបន់សាហែល (Sahel)ពោរពេញដោយបញ្ហានេះ។
ចំនួនអ្នកស្លាប់ដ៏ច្រើននេះគឺជាការបង្ហូរឈាមធំបំផុតមួយនៅក្នុងការបះបោររយៈពេលមួយទសវត្សរ៍នៅប្រទេសម៉ាលីដែលបានរីករាលដាលពីភាគខាងជើងនៃប្រទេសទៅកាន់ភាគកណ្តាលនិងភាគខាងត្បូង ហើយចូលទៅក្នុងប្រទេសជិតខាងបួគីណាហ្វាសូនិងនីហ្សេ។
ឯកសារ ដែលដាក់ឈ្មោះអ្នកស្លាប់ជាក់លាក់ ត្រូវបានផ្ទៀងផ្ទាត់ដល់ទីភ្នាក់ងារសារព័ត៌មាន AFPដោយមន្ត្រីយោធាជាន់ខ្ពស់មួយចំនួនខណៈរដ្ឋាភិបាលក្រោយមកបានបញ្ជាក់ពីចំនួនអ្នកស្លាប់នៅក្នុងសេចក្តីថ្លែងការណ៍ ដែលនិយាយថាទាហាន ២២ នាក់បានរងរបួស និង “ភេរវករ ៣៧ នាក់” ត្រូវបានសម្លាប់។
ការវាយប្រហារនេះបានកើតឡើងកាលពីថ្ងៃអាទិត្យទី៧សីហានៅក្នុងទីប្រជុំជនតេសស៊ីត (Tessit) ក្នុងតំបន់ “ព្រំដែនត្រីកោណ” ពោរពេញដោយបញ្ហា ដែលប្រសព្វប្រទេសទាំងបី។
កាលពីថ្ងៃចន្ទ កងទ័ពបាននិយាយថា ទាហាន ១៧ នាក់ និងជនស៊ីវិលបួននាក់បានស្លាប់។
សេចក្តីថ្លែងការណ៍កាលពីថ្ងៃចន្ទបានស្តីបន្ទោសលើក្រុមរដ្ឋអ៊ីស្លាមនៅតំបន់ហ្គ្រេតធឺសាហារ៉ា (Greater Sahara) ឬ ISGS ដោយនិយាយថា សមាជិករបស់ក្រុមនេះបានប្រើ”ដ្រូននិងកាំភ្លើងធំ ហើយប្រើប្រាស់គ្រឿងផ្ទុះនិងរថយន្តផ្ទុកពេញដោយគ្រឿងផ្ទុះ”។
លើកចុងក្រោយ ដែលកងកម្លាំងប្រដាប់អាវុធរបស់ម៉ាលី រងការបាត់បង់ធំបែបនេះ គឺនៅក្នុងការវាយប្រហារជាបន្តបន្ទាប់នៅក្នុងតំបន់ដូចគ្នាកាលពីចុងឆ្នាំ ២០១៩ និងដើមឆ្នាំ ២០២០៕
ទាហានម៉ាលីកំពុងជួបការលំបាកក្នុងការទប់ទល់ក្រុមបះបោរក្នុងមួយទសវត្សរ៍ចុងក្រោយនេះ
