Views: 10
ប្រែសម្រួលៈបំណង(ស្ត្រេតថែមស៍)៖រដ្ឋធានីម៉ានីលដ៏លាតសន្ធឹងរបស់ហ្វីលីពីន បានចូលក្នុងស្ថានភាពបិទខ្ទប់តាំងពីថ្ងៃអាទិត្យទី២៥កញ្ញានៅពេលព្យុះធំមួយបក់កាត់កោះលូហ្សុនជាមួយនឹងខ្យល់និងភ្លៀងដ៏ខ្លាំង ដែលមុខជាបង្កការបាក់ដីដ៏អន្តរាយ។
ព្យុះ ណូរូ(Noru)បានធ្វើដំណើរចូលដីគោកនៅម៉ោងប្រមាណ៥កន្លះព្រឹកថ្ងៃអាទិត្យនៅទីប្រជុំជនបួរដេអូស( Burdeos)នៅលើកោះប៉ូលីលឡូ(Polillo)នៅចម្ងាយប្រមាណ១០០គីឡូម៉ែត្រខាងកើតរដ្ឋធានីម៉ានីល ជាមួយនឹងល្បឿនខ្យល់១៩៥គីឡូម៉ែត្រក្នុងមួយម៉ោង។
ណូរូ ដែលជាព្យុះទី១១និងជាព្យុះខ្លាំងបំផុតដែលវាយប្រហារហ្វីលីពីននៅឆ្នាំ២០២២នេះ បានចុះថយកម្លាំងបន្តិចនៅពេលវាមកដល់ដីគោកជាថ្មីនៅម៉ោងប្រមាណ៨និង២០នាទីយប់នៅក្នុងខេត្តអូរ៉ូរ៉ានៅប៉ែកខាងកើតកោះលូហ្សុន។វាបានវាយប្រហារកោះនេះទាំងកណ្តាលយប់ ដោយនាំមកទឹកភ្លៀងយ៉ាងច្រើននៅតំបន់ក្រុងម៉ានីល ទីក្រុងដែលប្រជុំដោយទីក្រុងតូចៗចំនួន១៦។កោះលូហ្សុនជាជម្រកនៃប្រជាជនពាក់កណ្តាលក្នុងចំណោមប្រជាជនហ្វីលីពីនប្រមាណ១១០នាក់។
រូបភាពក្នុងបណ្តាញសង្គមបានបង្ហាញមែកឈើនិងកំទេចកំទីនៅរាយប៉ាយតាមដងផ្លូវក្នុងទីប្រជុំជនមួយលើកោះប៉ូលីលឡូ ដែលរងការវាយប្រហារនៅពេលព្រឹកថ្ងៃអាទិត្យខណៈតំបន់ជាច្រើននៅលើកោះលូហ្សុនស្ថិតក្នុងស្ថានភាពប្រុងជើងការខ្ពស់បំផុត គឺកំរិតទី៥នៅពេលក្រុងម៉ានីលនៅក្នុងកំរិតព្រមានទី៤។
ក្នុងពេលជាមួយគ្នា ប្រធានាធិបតី ហ្វែរឌីណង់ ម៉ាកូស ជូនៀ បានបញ្ជាអោយបិទសាលារៀននិងការិយាល័យទាំងអស់នៅតំបន់ក្រុងម៉ានីល រួមទាំងតំបន់ចំនួនប្រាំពីរទៀតចាប់ពីថ្ងៃចន្ទទី២៦កញ្ញា។ការជម្លៀសមនុស្សក៏ត្រូវបានបញ្ជាសំរាប់តំបន់នៅតាមឆ្នេរ ទន្លេនិងតំបន់ទំនាប។
មនុស្សរាប់លាននាក់នៅចំផ្លូវព្យុះណូរូ ត្រូវបានប្រាប់អោយសម្ងំនៅក្នុងផ្ទះ ខណៈអាជ្ញាធរក៏ចេញការព្រមានអំពីទឹកជំនន់នៅទីក្រុងសំខាន់ៗនៅតំបន់ក្រុងម៉ានីល ដែលនៅតាមប្រព័ន្ធទន្លេចំនួនបី។ជើងហោះហើរក៏ត្រូវបានលុបចោលហើយកំពង់ផែនិងផ្លូវដែកទាំងអស់បានបិទ។
ព្យុះនេះត្រូវរំពឹងថានឹងថយកម្លាំងនៅថ្ងៃចន្ទ មុនពេលវាធ្វើដំណើរមកកាន់វៀតណាម។
សូមបញ្ជាក់ថា ហ្វីលីពីនជាប់ក្នុងចំណោមប្រទេសងាយនឹងរងគ្រោះខ្លាំងបំផុតពីការប្រែប្រួលអាកាសធាតុដោយក្នុងមួយឆ្នាំ ប្រទេសនេះជួបព្យុះជាមធ្យម២០ ។កាលពីឆ្នាំ២០១៣ ព្យុះហាយយ៉ាន(Haiyan)បានសម្លាប់មនុស្សអស់យ៉ាងតិច៦.០០០នាក់។
ណូរូ ស្រដៀងគ្នានឹងព្យុះកេតសាណា(Ketsana)កាលពីឆ្នាំ២០០៩ ដែលបានបង្កទឹកជំនន់លិចទីក្រុងម៉ានីលមួយភាគបី សម្លាប់មនុស្សរាប់រយនាក់នៅពេលទឹកឡើងបាក់ច្រាំងទន្លេហូរចូលពន្លិចសហគមន៍ទាំងមូលៗ៕