Views: 1
ដោយៈទេពកង្រី/កំពង់ឆ្នាំង៖សេចក្តីរាយការណ៍បានឱ្យដឹងថាគិតត្រឹមល្ងាចថ្ងៃទី២៧ខែកញ្ញាទឹកទន្លេសាបបានបន្តហក់ឡើងបណ្ដាលឱ្យផ្ទះប្រជាពលរដ្ឋរស់នៅតាមដងទន្លេចំនួន ១៥៣ខ្នងត្រូវលិចលង់។ក្នុងនោះនៅឃុំឆ្នុកទ្រូ ស្រុកបរិបូរណ៌ចំនួន ៤០ ខ្នងនិងនៅក្នុងឃុំផ្លូវទូក ស្រុកកំពង់លែង ចំនួន ១១៣ ខ្នង។
អាជ្ញាធរឃុំឆ្នុកទ្រូបានឲ្យដឹងថា នៅរសៀលថ្ងៃទី២៧ ខែកញ្ញា លោក ចេង ចាន់ដូណា អភិបាលអភិបាលស្រុក បរិបូរណ៌បានដឹកនាំក្រុមការងារចុះពិនិត្យមើលការរស់នៅរបស់ប្រជាពលរដ្ឋបម្លាស់ទីពីផ្ទះបណ្តែតទឹកឡើងគោកនៅក្នុងចំណុចអ្នកតាទាំងស្ថិតក្នុងភូមិឆ្នុកទ្រូឃុំឆ្នុកទ្រូ។គិតត្រឹមល្ងាចថ្ងៃទី២៧ខែកញ្ញានេះផ្ទះចំនួន៤០ខ្នងត្រូវបានលិចទឹក ។
ដោយឡែកនៅក្នុងឃុំផ្លូវទូក ស្រុកកំពង់លែងវិញ អាជ្ញាធរមូលដ្ឋានបានឲ្យដឹងថា គិតត្រឹមម៉ោង ៥ ល្ងាចថ្ងៃទី២៧ ខែកញ្ញានេះផ្ទះដែលបានបម្លាស់ទីពីផ្ទះបណ្ដែតទឹកឡើងមករស់នៅលើគោកចំនួន១១៣ខ្នងក៏ត្រូវបានលិចទឹកផងដែរ ។ដោយខ្លះបានលិចទាំងស្រុងខ្លះលិចអស់ពាក់កណ្ដាល និងខ្លះលិចបណ្តើរៗហើយ ។
អាជ្ញាធរឃុំផ្លូវទូកបានបញ្ជាក់ឲ្យដឹងទៀតថាកាលពីពីរឆ្នាំមុនទឹកទន្លេតូចពុំបានលិចខ្នងកោះទេ។ដូច្នេះផ្ទះរបស់ប្រជាពលរដ្ឋដែលសង់នៅលើ គោកក៏មិនត្រូវបានទឹកទន្លេលិចនោះដែរ។តែឆ្នាំនេះពេលទឹកទន្លេឡើងខ្ពស់ទើបផ្ទះ ពួកគាត់ត្រូវលិច។
លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំងកាលពីយប់ថ្ងៃទី២៧ ខែកញ្ញាបានឲ្យដឹងថា នៅថ្ងៃស្អែកទី ២៨ ខែកញ្ញាលោកនឹងចាត់តាំងក្រុមការងារពីរក្រុមដឹកនាំដោយអភិបាលរងខេត្តចុះទៅពិនិត្យមើលស្ថានភាពរបស់ប្រជាពលរដ្ឋរងគ្រោះដោយផ្ទះលិចទឹក ដើម្បីធ្វើការជម្លៀសទៅកាន់ទីទួលសុវត្ថិភាព។ ក្នុងនោះក៏ត្រូវនាំយកអំ ណោយកាកបាទក្រហមខេត្តជាស្បៀងអាហារទៅចែកជូនដើម្បីសម្រាលការលំបាករបស់ប្រជាជនដែលកំពុងតែរងគ្រោះដោយសារបញ្ហានេះ ៕សរន
