Views: 1
ដោយៈ ភ្នំសន្ទុក/ កំពង់ធំ ៖ ទឹកជំនន់ទឹកភ្លៀង បានចាប់ផ្ដើមហូរកាត់ផ្លូវជាតិលេខ៦ នៅចន្លោះគីឡូម៉ែត្រលេខ ២៣៤ និង២៣៥ ត្រង់ចំណុចភូមិព្រៃខ្លា ឃុំប្រឡាយ ស្រុកស្ទោង ខេត្តកំពង់ធំ ហើយអាជ្ញាធរ សូមឱ្យមានការប្រុងប្រយ័ត្នខ្ពស់ ចំពោះការបើកបរ។
លោក ងួន រតនៈ អភិបាលខេត្តកំង់ធំ លោក ជូ កុល្លា ប្រធានមន្ទីរសាធារណការ និងដឹកជញ្ជូនខេត្ត លោកភិបាលស្រុកស្ទោង បានចុះត្រួតពិនិត្យស្ថានភាពជំនន់ទឹកភ្លៀង ដែលកំពុងលិចលង់យ៉ាងគំហុក នៅឃុំប្រឡាយ ស្រុកស្ទោង ខេត្តកំពង់ធំ។
ថ្លែងនៅក្នុងឱកាសនេះ លោកអភិបាលខេត្ត បានអំពាវនាវដល់អាជ្ញាធរមូលដ្ឋាន ត្រូវ បង្កើនការយកចិត្តទុកដាក់ ដល់ពលរដ្ឋកំពុងរងគ្រោះ ដោយជំនន់ទឹកភ្លៀង យ៉ាងគំហុក ដោយសារប៉ុន្មានថ្ងៃចុងក្រោយនេះ នៅក្នុងស្រុកស្ទោង ពិសេសនៅភូមិសាស្ត្រ ឃុំប្រឡាយ បានរងនូវឥទ្ធិពលទឹកភ្លៀងជាប់ៗគ្នាខ្លាំងជាងគេ ដែលបណ្ដាលឲ្យមាន ទឹកជំនន់ កំពុងជន់លិចភូមិឋាន និងផ្លូវលំ មួយចំនួនហើយ។
លោក ងួន រតនៈ បានបន្ថែមថាៈ ដោយសារស្ថានភាពអាកាសធាតុ នៅក្នុងតំបន់ ក៏ដូចជា នៅក្នុងព្រះរាជាណាចក្រកម្ពុជា កំពុងតែរងនូវឥទ្ធិពលទឹកភ្លៀង ជាបន្តបន្ទាប់ ថែមទៀត នៅប៉ុន្មានថ្ងៃខាងមុខ ហេតុនេះហើយ សូមបងប្អូនប្រជាពលរដ្ឋ ត្រូវបង្កើនការ ប្រយ័ត្នខ្ពស់ ពិសេសសូមប្រុងប្រយ័ត្ន ចំពោះកូនចៅក្មេងៗតូចៗ កុំបណ្ដោយឲ្យលេងទឹក និងប្រយ័ត្នសត្វអសិរពិស និងបានអំពាវនាវឲ្យបងប្អូន ប្រជាពលរដ្ឋ ត្រូវបង្កើន ការយកចិត្តទុកដាក់ខ្ពស់ លើផ្នែកសុខភាពនិងសុវត្ថិភាពចំណីអាហារ ត្រូវពិសាទឹកឆ្អិន គ្រប់ៗគ្នា។ រដ្ឋបាលស្ទោង ត្រូវសហការជាមួយ ខាងមន្ទីរសាធារណការ និងដឹកជញ្ជូន និងមន្ទីរធនធានទឹក និងឧតុនិយម ខេត្តកំពង់ធំ ត្រូវតាមដាន និងធ្វើរបាយការណ៍ ស្ថានភាពទឹនជំនន់នេះ ឲ្យបានជាប់ជាប្រចាំ រាល់ថ្ងៃ ដល់រដ្ឋបាលខេត្ត ដើម្បីបានជា មូលដ្ឋាន ក្នុងការជួយសង្គ្រោះ ឲ្យបានទាន់ពេលវេលា បើមានស្ថានភាពធ្ងន់ធ្ងរជាងនេះ និងធ្វើសេចក្តីជូនដំណឹងដល់សាធារណជន ជាពិសេសរថយន្តដឹកទំនិញធុនធ្ងន់ ត្រូវផ្អាកការធ្វើដំណើរជាបណ្តោះអាសន្ន បើស្ថានភាពទឹក នៅតែបន្តកើនជន់ខ្លាំង ។
លើសពីនេះ លោកបានកោតសរសើខ្ពស់ដល់ រដ្ឋបាលស្រុកស្ទោង និងមន្ទីរសាធារណការ និងដឹកជញ្ជូន និងមន្ទីរធនធានទឹក ខេត្តកំពង់ធំ ដែលបានសហការគ្នា ក្នុងការកាយរំដោះទឹក យ៉ាងទាន់ពេលវេលា នៅថ្ងៃនេះ។
ជាមួយគ្នានេះ លោកអភិបាលខេត្ត ក៏បានអំពាវនាវឲ្យបងប្អូនប្រជាពលរដ្ឋគ្រប់គេហដ្ឋាន សូមជួយកាយលូដែលស្ទះ នៅតាមភូមិឋានរបស់ខ្លួន ដើម្បីជួយបន្ធូរ និងរំដោះទឹក ឱ្យបានទាន់ពេលវេលា ដើម្បីកុំឲ្យមានការកកស្ទះយូរថ្ងៃ៕/V
