Views: 3
ដោយៈ ប.ខុន / ភ្នំពេញៈ ទឹកស្ទឹងពោធិ៍សាត់ ជន់ឡើងជិតដល់កម្រិតកម្ពស់ត្រូវប្រកាស ឱ្យមានការប្រុងប្រយ័ត្នហើយ នៅរសៀលថ្ងៃទី៦ ខែតុលានេះ គឺទឹកឡើងដល់កម្ពស់ ៤,៩៧ ម៉ែត្រ ហើយកទឹកស្ទឹងពោធិ៍សាត់ ដែលត្រូវប្រកាសឱ្យមានការប្រុងប្រយ័ត្ន នៅកម្ពស់ ៥ ម៉ែត្រ បើឡើងដល់កម្ពស់ ៥,១០ ម៉ែត្រនោះ គឺចាប់ផ្តើមលិចក្រុង នៅកន្លែងខ្លះហើយ ពេលនេះទឹក ស្ទឹង បានឡើងខ្ពស់ជាងផ្លូវ តែបានខឿនសួនច្បារទប់ ទើបមិនទាន់មានការលិចលង់។
លោក កែវ វ័យ ប្រធានមន្ទីរធនធានទឹក និងឧតុនិយម ខេត្តពោធិ៍សាត់ បានប្រាប់ឱ្យ រស្មីកម្ពុជាដឹង នៅថ្ងៃទី៦ ខែតុលា ឆ្នាំ២០២២ថាៈ ទឹកស្ទឹងពោធិសាត់ បានឡើងដល់ កម្ពស់ ៤,៩៧ ម៉ែត្រ ខ្វះតែ ០,០៣ ទៀត គឺឡើងដល់កម្ពស់ត្រូវប្រកាសឱ្យមាន ការប្រុងប្រយ័ត្នហើយ តែសន្ទុះទឹកឡើងមិនគំហុកនោះទេ។ កម្ពស់ទឹកស្ទឹងពោធិសាត់ ត្រូវប្រកាសឱ្យមានការប្រុងប្រយ័ត្ន នៅកម្ពស់ ៥ ម៉ែត្រ ។
ប្រធានមន្ទីរធនធានទឹក ខាងលើ បានបញ្ជាក់ថាៈ នៅរសៀលនេះ ទឹកស្ទឹង បានឡើង ខ្ពស់ជាងផ្លូវ នៅសងខាងស្ទឹងហើយ តែមិនទាន់មានការលិចលង់ទេ ដោយសារមាន ខឿនសួនខ្ពស់ទប់ តែបើទឹកបន្តឡើង ដល់កម្ពស់ ៥,១០ ម៉ែត្រនោះ មានការលិចលង់ កន្លែងខ្លះហើយ។ ទឹកជំនន់ពេលនេះ ហូរមកពីស្ទឹងអារ៉ៃ និងស្ទឹងស្លុង តែមិនមានទឹក ជំនន់ មកពីស្ទឹងធំទេ។
លោក ចាន់ យុត្ថា អ្នកនាំពាក្យនិងជារដ្ឋលេខាធិការ ក្រសួងធនធានទឹក និងឧតុនិយម បានប្រាប់ឱ្យរស្មីកម្ពុជាដឹង នៅថ្ងៃទី៦ ខែតុលាថាៈ ស្ថានភាពទឹកជំនន់ ដែលបាន និងកំពុងកើតមាន នៅពេលនេះ មាននៅស្ទឹងពោធិសាត់ ស្ទឹងសែន ស្ទឹងស្រែង ស្ទឹងមង្គលបូរី ស្ទឹងសិរីសោភ័ណ និង ស្ទឹងសង្កែ។ ទឹកស្ទឹងសង្កែ បានស្រកមកនៅ ក្រោមកម្រិតកម្ពស់ ដែលត្រូវប្រកាសឱ្យមានការប្រុងប្រយ័ត្នវិញហើយ៕/V.mara
