ខេត្តពោធិ៍សាត់៖ មន្ទីរធនធានទឹក និងឧតុនិយម បានប្រកាស នៅថ្ងៃទី៦ ខែតុលានេះថា ស្ថានភាពទឹកស្ទឹងពោធិ៍សាត់ បានកើនឡើង លើសចំណុចប្រកាសអាសន្នហើយ គឺកម្រិតកម្ពស់ ៥,០៣ម៉ែត្រ។ ចំណែកកម្ពស់ទឹកស្ទឹងពោធិ៍សាត់ ដែលត្រូវប្រកាសអាសន្ន មានកម្ពស់ ៥ម៉ែត្រ។
តាមសេចក្តីប្រកាស ដើម្បីត្រៀមលក្ខណៈការពារគ្រោះធម្មជាតិទឹកជំនន់ តាមដងស្ទឹង ដែលអាចកើតមានក្នុងខេត្តពោធិ៍សាត់ មន្ទីរធនធានទឹក និងឧតុនិយមខេត្ត បានប្រកាសថា បន្ទាប់ពីបានធ្វើការសង្កេតតាមដាន លើស្ថានភាពអាកាសធាតុ រួចមក ឃើញថា មានភ្លៀងធ្លាក់ពីតំបន់ជួរភ្នំក្រវាញ ស្ទឹងអារ៉ៃ ស្ទឹងព្រៃខ្លុង និងស្ទឹងធំ មានកម្រិតខ្ពស់ មកលើដងស្ទឹងពោធិ៍សាត់។ ឥទ្ធិពលនៃស្ទឹងខាងលើនេះ នឹងធ្វើឱ្យទឹកស្ទឹងពោធិ៍សាត់ មានសម្ទុះកើនឡើង បន្តបន្ទាប់ និងអាចបង្កឱ្យមានទឹកជំនន់ នៅក្នុងខេត្តពោធិ៍សាត់។
មន្ទីរធនធានទឹក និងឧតុនិយម បានប្រកាសអំពាវនាវដល់អាជ្ញាធរ ក្រុង ស្រុក ឃុំ សង្កាត់ គ្រប់លំដាប់ថ្នាក់ និងប្រជាពលរដ្ឋទូទាំងខេត្តពោធិ៍សាត់ ពិសេសប្រជាពលរដ្ឋ រស់នៅតាមដងស្ទឹងពោធិ៍សាត់ និងស្ទឹងពាក់ព័ន្ធ សូមបង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីជៀសវាងនូវគ្រោះថ្នាក់ផ្សេងៗ ដែលអាចកើតមានឡើងដោយយថាហេតុ និងត្រៀមរកទីទួលសុវត្ថិភាព សម្រាប់ជម្លៀសប្រជាពលរដ្ឋ ដែលងាយរងគ្រោះ៕
