Views: 1
ដោយៈ បាយ័ន / សៀមរាបៈ នៅរសៀលថ្ងៃទី២៥ ខែវិច្ឆិកា ឆ្នាំ២០២២ នៅសាលាឃុំខ្ចាស់ ក្នុងស្រុកសូទ្រនិគម ខេត្តសៀមរាប មានរៀបចំពិធីប្រកាសដាក់ឲ្យដេញថ្លៃ គម្រោងការដាក់លូ កាត់ផ្លូវចំនួន ៦ កន្លែង ក្រោមការដឹកនាំរបស់លោក ផាត់ ដា មេឃុំខ្ចាស់ ដោយមានការចូលរួម ពីសំណាក់លោក លោកស្រី ជាមន្ត្រីគណៈកម្មការលទ្ធកម្មឃុំ មន្ត្រីបច្ចេកទេស សាលាខេត្តសៀមរាប និងអ្នកម៉ៅការ ជាច្រើនរូបទៀត ។
លោក ប៊ិន រដ្ឋ មន្ត្រីបច្ចេកទេសសាលាខេត្តសៀមរាប បានឲ្យដឹងថាៈ យោងតាមច្បាប់ស្តីពី ការគ្រប់គ្រងរដ្ឋបាលឃុំ សង្កាត់ និងសៀវភៅណែនាំ ស្តីពីការអនុវត្តគម្រោងមូលនិធិឃុំ សង្កាត់ បានកំណត់ឱ្យក្រុមប្រឹក្សាឃុំ សង្កាត់ ធ្វើការអភិវឌ្ឍមូលដ្ឋានរបស់ខ្លួន តាមរយៈថវិកាមូលនិធិឃុំ សង្កាត់ ដែលបានវិភាជន៍ពីរាជរដ្ឋាភិបាល ជារៀងរាល់ឆ្នាំ តាមរយៈកិច្ចលទ្ធកម្ម ជាសាធារណៈ ហើយដែលនីតិវិធី នៃការអនុវត្តកិច្ចលទ្ធកម្មនេះ គឺបានកំណត់នៅក្នុងសៀវភៅណែនាំ ស្តីពីការអនុវត្តគម្រោងមូលនិធិឃុំ សង្កាត់ ដែលត្រូវបានចុះហត្ថលេខា ឱ្យប្រើប្រាស់ កាលពីថ្ងៃទី១៤ ខែមករា ឆ្នាំ២០០៩ ដោយសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ។
លោកបានបន្តថាៈ សម្រាប់រដ្ឋបាលឃុំ សង្កាត់ ទាំង១០០ របស់ខេត្តសៀមរាប ក៏បានអនុវត្ត កិច្ចលទ្ធកម្មគម្រោងមូលនិធិឃុំ សង្កាត់ ទៅតាមនីតិវិធី ដូចបានកំណត់នៅក្នុងសៀវភៅណែនាំ ខាងលើ ជារៀងរាល់ឆ្នាំផងដែរ ហើយថ្ងៃនេះ គឺជាការដេញមូលនិធិ ឆ្នាំ២០២២ របស់ឃុំខ្ចាស់ ដូច្នេះក្នុងឱកាសនេះ សូមណែនាំដល់អ្នកម៉ៅការ ចូលរួមដេញថ្លៃទាំងអស់ ត្រូវគោរព ក្រមសីលធម៌ ដែលមានចែង និងដាក់ក្នុងសំណើដាក់ឲ្យដេញថ្លៃ ពិសេសត្រូវអនុវត្ត តាមសំណើរបស់ឃុំ ដែលជាម្ចាស់គម្រោង ប៉ុន្តែប្រសិនបើអ្នកម៉ៅការ ចូលរួមដេញថ្លៃរូបណា ដែលមិនអនុវត្តតាមក្រមសីលធម៌នេះទេ ម្ចាស់គម្រោង នឹងស្នើសុំគោលការណ៍លុបលទ្ធផល គម្រោងដេញថ្ងៃនេះ ។
លោក ផាត់ ដា មេឃុំខ្ចាស់ បានឲ្យដឹងថាៈ គម្រោងដាក់លូកាត់ផ្លូវ ចំនួន ៦ កន្លែងនេះ មានតម្លៃប៉ាន់ស្មាន ចំនួន ៥៨.៩២៧.៧០០ រៀល ដែលនៅពេលនេះ មានក្រុមហ៊ុនចំនួន ៤ បានចូលរួមដេញថ្លៃ រួមមាន ១. ក្រុមហ៊ុន ELHS , ២. អំ ឡូ , ៣. AMRL និង ៤. ហ៊ួរ ឆូយ ។
លោក ផាត់ ដា បានបន្តថាៈ អ្នកដេញថ្លៃដែលឈ្នះ ត្រូវអនុវត្តឱ្យបានត្រឹមត្រូវ ទៅតាមគំនូស ប្លង់បច្ចេកទេស ការបរិយាយ លម្អិតលក្ខណៈបច្ចេកទេស និងល័ក្ខខ័ណ្ឌ នៃកិច្ចសន្យា ហើយក្នុងករណីកិច្ចសន្យា ត្រូវបានបញ្ឈប់មុនកាលកំណត់ ដោយសារតែអ្នកទទួលការ មិនអនុវត្តតាមល័ក្ខខ័ណ្ឌ នៃកិច្ចសន្យានោះ អ្នកទទួលការ នឹងមិនទទួលបានការទូទាត់ឡើយ ហើយប្រាក់កក់ធានាការអនុវត្ត នឹងត្រូវបានរឹបអូស ផ្ទេរបង្វែរបង់ចូលថវិការដ្ឋ ដោយបង់ជា ចំណូលថវិការដ្ឋបាលឃុំ សង្កាត់ខណៈដែលចំពោះកិច្ចសន្យាសំណង់ អ្នកទទួលការ មានកាតព្វកិច្ចថែទាំលទ្ធផលកិច្ចសន្យា ក្នុងរយៈពេល ៦ ខែ បន្ទាប់ពីបញ្ចប់ការសាងសង់ បើមិនដូច្នេះទេ ថវិកា១០% សម្រាប់ការទូទាត់ចុងក្រោយ នឹងមិនត្រូវបានទូទាត់ឡើយ ។
បន្ទាប់មក គណៈកម្មការលទ្ធកម្មឃុំ បានបើកកញ្ចប់ឯកសាររបស់ អ្នកទទួលការដេញថ្លៃ ដោយពិនិត្យ និងពិភាក្សាទៅលើឯកសារទាំងអស់ ព្រមទាំងឲ្យកែតម្រូវឯកសារណា ដែលខុស ឲ្យត្រឹមត្រូវតាមគតិយុត្តិ ។
ក្រោយពីពិនិត្យ និងពិភាក្សារួច គណៈកម្មការលទ្ធកម្មឃុំ បានរកឃើញថា ក្រុមហ៊ុន AMRL ទទួលបានតម្លៃទាបទី១ ក្នុងទឹកប្រាក់ចំនួន ៥៨.៤០០.០០០ រៀល , ក្រុមហ៊ុន ELHS ទទួលបានតម្លៃទាបទី២ ក្នុងទឹកប្រាក់ចំនួន ៥៨.៧០០.០០០ រៀល និង ក្រុមហ៊ុន អំ ឡូ ទទួលបានតម្លៃទាបទី៣ ក្នុងទឹកប្រាក់ចំនួន ៥៨.៩០០.០០០ រៀល ។
ក្នុងឱកាសនោះដែរ លោក គី ពក តំណាងក្រុមហ៊ុន AMRL ដែលទទួលបានតម្លៃទាបទី១ នោះ បានប្ដេជ្ញាចិត្ត ដោយសន្យាធ្វើឲ្យបានត្រឹមត្រូវ តាមក្បួនច្បាប់បច្ចេកទេស ដូចមានចែង ក្នុងកិច្ចសន្យាស្រាប់ ៕/V