Views: 11
ប្រែសម្រួលៈបំណង(ស្ត្រេតថែមស៍)៖នាយករដ្ឋមន្ត្រីម៉ាឡេស៊ីថ្មីលោក អាន់វ៉ា អ៊ីប្រាហ៊ីម បានបន្តទាក់ទាញការរិះគន់ចំពោះគណៈរដ្ឋមន្ត្រីរបស់លោក ក្រោយពីពួករដ្ឋមន្ត្រីថ្មីបានស្បថចូលកាន់តំណែងនៅចំពោះមុខព្រះមហាក្សត្រកាលពីថ្ងៃសៅរ៍។
គូប្រជែងនយោបាយនិងពលរដ្ឋខ្លះបានរិះគន់ការតែងតាំងលោក ហ្សាហ៊ីដ ហាមីឌី(Zahid Hamidi)ប្រធានគណបក្សUmnoជាឧបនាយករដ្ឋមន្ត្រី ទោះជាលោកប្រឈមការចោទប្រកាន់ពីបទប្រព្រឹត្តអំពើពុករលួយដល់ទៅ៤៧ករណីនៅតុលាការក្តី។
(ពីស្តាំ)នាយករដ្ឋមន្ត្រីអាន់វ៉ា អ៊ីប្រាហ៊ីម ឧបនាយករដ្ឋមន្ត្រី ហ្សាហ៊ីដ ហាមីឌីនិងឧបនាយករដ្ឋមន្ត្រី ហ្វាឌីលឡា យូសូហ្វ ក្រោយការស្បថចូលកាន់តំណែងនៅវាំងស្តេចកាលពីថ្ងៃសៅរ៍
លោកអាន់វ៉ា ក៏ត្រូវបានរិះគន់ដោយសារលោកច្បាមយកតំណែងរដ្ឋមន្ត្រីហិរញ្ញវត្ថុមួយទៀតបន្ថែមលើមុខតំណែងនាយករដ្ឋមន្ត្រី។
អាន់វ៉ា កាន់តំណែងរដ្ឋមន្ត្រីហិរញ្ញវត្ថុមួយទៀត
គូប្រជែងដ៏សំខាន់របស់លោកគឺប្រធានាគណបក្សPerikatan Nasional (PN)លោក មូយីតឌីន យ៉ាសស៊ីន(Muhyiddin Yassin) ដែលជាមេដឹកនាំប្រឆាំង បាននិយាយថាការដណ្តើមច្បាមកាន់កាប់តំណែងដូច្នេះនឹងនាំដល់ការប្រមូលផ្តុំអំណាចនិងការប្រព្រឹត្តអំពើពុករលួយ។
លោកមូយីតឌីន បាននិយាយកាលពីថ្ងៃសៅរ៍ថា «អំពើរបស់អាន់វ៉ាដូចគ្នានឹងការលក់សេចក្តីថ្លៃថ្នូរជាតិ ដោយសារតែបំណងចង់ក្លាយជានាយករដ្ឋមន្ត្រីខ្លាំងពេក»។
សូមបញ្ជាក់ថា ការអះអាងតំណែងនាយករដ្ឋមន្ត្រីរបស់មូយីតឌីន ត្រូវរារាំងក្រោយបាត់បង់សម្លេងភាគច្រើនក្នុងសភាដោយសារសមាជិកសភាUmnoងាកទៅគាំទ្រលោកអាន់វ៉ា ដើម្បីមេដឹកនាំរបស់ខ្លួនបានតំណែងឧបនាយករដ្ឋមន្ត្រី។
ក្រុមចំរុះBarisan NasionalដឹកនាំដោយUmnoជាក្រុមចំរុះមួយដែលបានព្រមព្រៀងបង្កើតរដ្ឋាភិបាលឯកភាពមួយជាមួយក្រុមចំរុះPakatan Harapan (PH)របស់លោកអាន់វ៉ាតាមការស្នើសុំរបស់ព្រះមហាក្សត្រក្រោយការបោះឆ្នោតសកលកាលពីថ្ងៃ១៩វិច្ឆិកា មិនមានគណបក្សណាមួយទទួលបានសម្លេងគាំទ្រដាច់គេដើម្បីបង្កើតរដ្ឋាភិបាលតែឯង។
លោកមូយីតឌីន បានបដិសេធមិនចូលរួមក្នុងរដ្ឋាភិបាល និងជ្រើសយកការនៅជាក្រុមប្រឆាំង។
គណបក្សDAPដែលជាផ្នែកមួយនៃក្រុមចំរុះរបស់អាន់វ៉ា បាននិយាយថាការតែងតាំងលោក ហ្សាហ៊ីដ មិនមានន័យថាជំហរប្រឆាំងអំពើពុករលួយរបស់គណបក្សនឹងត្រូវផ្លាស់ប្តូរទេ ព្រោះ«បើយើងមិនបង្កើតរដ្ឋាភិបាល គណបក្សផ្សេងនឹងបង្កើតវា»៕