Views: 11
ប្រែសម្រួល : កញ្ញាដាលីស (ដេល្លីម៉េល) ៖ ក្រុមមន្ត្រីបាននិយាយថា ការបាញ់ផ្លោងរបស់រុស្ស៊ីទៅលើទីក្រុងឃើសុនភាគខាងត្បូងប្រទេសអ៊ុយក្រែនបានសម្លាប់ជនស៊ីវិល១៥ នាក់កាលពីថ្ងៃសុក្រទី២៥វិច្ឆិកា ខណៈវិស្វករទូទាំងប្រទេសកំពុងព្យាយាមស្តារឡើងវិញនូវកម្តៅ ទឹក និងថាមពលដល់ទីក្រុងធំៗ។
នៅទូទាំងប្រទេស ការវាយប្រហារតាមផ្លូវអាកាសរបស់រុស្ស៊ីក្នុងរយៈពេលប៉ុន្មានសប្តាហ៍ថ្មីៗនេះបានធ្វើឱ្យហេដ្ឋារចនាសម្ពន្ធថាមពលរបស់អ៊ុយក្រែនដួលរលំ ខណៈរដូវរងាខិតចូលមកដល់និងសីតុណ្ហភាពកាន់តែត្រជាក់ ជាហេតុជំរុញឱ្យមានការបារម្ភអំពីវិបត្តិសុខភាពនិងការជម្លៀសមនុស្សបន្ថែមទៀត។
ប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី បាននិយាយថា គ្រួសារចំនួនប្រាំមួយលានបន្ថែមទៀតនៅក្នុងប្រទេសនៅតែរងផលប៉ះពាល់ដោយការដាច់ចរន្តអគ្គិសនីពីរថ្ងៃបន្ទាប់ពីការវាយប្រហាររបស់រុស្ស៊ីបានកំណត់គោលដៅលើហេដ្ឋារចនាសម្ពន្ធថាមពលរបស់អ៊ុយក្រែន។
ការបាញ់ផ្លោងដ៏សាហាវបំផុតរបស់រុស្ស៊ីក្នុងរយៈពេលប៉ុន្មានថ្ងៃថ្មីៗនេះបានវាយប្រហារលើទីក្រុងឃើសុន ដែលជាទីក្រុងសំខាន់មួយនៅភាគខាងកើតដែលទើបនឹងដណ្តើមបានមកវិញដោយកងកម្លាំងអ៊ុយក្រែន។
មន្ត្រីទីក្រុង លោកស្រី ហ្គាលីណា លូហ្គោវ៉ា (Galyna Lugova)បាននិយាយថា “អ្នកស្រុកសរុបចំនួន ១៥ នាក់ត្រូវបានសម្លាប់ និង ៣៥ នាក់បានរងរបួសក្នុងនោះមានកុមារម្នាក់ដោយសារតែការបាញ់ផ្លោងរបស់សត្រូវ”។ លោកស្រីបានបន្ថែមថា “ផ្ទះឯកជននិងអគារខ្ពស់ៗ” ជាច្រើនបានខូចខាត។
លោក យ៉ារ៉ូវស្លាវ យ៉ានូសូវិច (Yarovslav Yanushovich)ប្រធានរដ្ឋបាលយោធាក្រុងឃើសុន បាននិយាយថា”ពួកឈ្លានពានរុស្ស៊ីបានបើកការបាញ់ផ្លោងទៅលើតំបន់លំនៅឋានមួយជាមួយនឹងគ្រាប់រ៉ុក្កែតចម្រុះ។ អគារធំមួយបានឆាបឆេះ”។
កាលពីព្រឹកថ្ងៃសុក្រ អភិបាលតំបន់ឃើសុនបាននិយាយថា អ្នកជំងឺក្នុងមន្ទីរពេទ្យក្រុងនិងអ្នកជំងឺនៅអង្គភាពវិកលចរិកត្រូវបានជម្លៀសចេញ ដោយសារតែ “ការបាញ់ផ្លោងឥតឈប់ឈររបស់រុស្ស៊ី”។
ក្រុមប្រឹក្សាក្រុងឃើសុនបាននិយាយថា ខ្លួនកំពុងផ្តល់ការជម្លៀសជនស៊ីវិលទៅកាន់តំបន់ផ្សេងទៀត។
ការវាយប្រហារលើស្ថានីយថាមពលនិងធនធានហេដ្ឋារចនាសម្ពន្ធផ្សេងទៀតនៅទូទាំងប្រទេសអ៊ុយក្រែនគឺជាការប៉ុនប៉ងចុងក្រោយរបស់រុស្ស៊ី ដើម្បីបង្ខំឱ្យអ៊ុយក្រែនចុះចាញ់ បន្ទាប់ពីកងកម្លាំងរបស់រដ្ឋាភិបាលក្រុងមូស្គូបរាជ័យក្នុងការផ្តួលរំលំរដ្ឋាភិបាលអ៊ុយក្រែននិងដណ្តើមកាន់កាប់ទីក្រុងគៀវ៕
វិស្វករទូទាំងប្រទេសកំពុងព្យាយាមស្តារឡើងវិញនូវកម្តៅ ទឹក និងថាមពលដល់ទីក្រុងធំៗ
អ៊ុយក្រែនស្តារអគ្គិសនីវិញសន្សឹមៗ
