Views: 1
ដោយៈ ចាន់តូ/ភ្នំពេញៈ បុរសម្នាក់បានបែកក្បាលស្លាប់និងម្នាក់ទៀតរងរបួសធ្ងន់ បន្ទាប់ពីជិះម៉ូតូឌុបគ្នាលឿនដូចហោះបានជ្រុលទៅបុក រថយន្តបែនដឹកខ្សាច់ចតស្ងៀមលើចិញ្ចើមផ្លូវពេញទំហឹង កាលវេលាម៉ោង១១:៣០នាទីយប់ថ្ងៃសៅរ៍ ទី៦ ខែសីហា ឆ្នាំ២០២២ ស្ថិតតាមបណ្ដោយផ្លូវជាតិលេខ៦A ចំណុចមុខ ច្រកចូលអង្គភាពទាហ៊ានជើងទឹក ក្នុងភូមិគៀនឃ្លាំង សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
តាមប្រភពពីកន្លែងកើតហេតុបានឲ្យដឹងថាមុនពេលកើតហេតុគេឃើញបុរសរងគ្រោះបានជិះម៉ូតូធុនធំមួយគ្រឿង ពាក់ស្លាកលេខ ភ្នំពេញ ១HW៦១០៥ ឌុបបុរសម្នាក់ទៀតធ្វើដំណើរតាមបណ្តោយផ្លូវជាតិលេខ៦A ទិសដៅពីជើងទៅត្បូងបោះពួយយ៉ាងលឿន ខណៈមកដល់ចំណុចកើតហេតុខាងលើបានជ្រុលទៅបុករថយន្តបែនដឹកខ្សាច់ពាក់ស្លាក ភ្នំពេញ ៣A ៨៤៣៨ កំពុងឈប់លើចិញ្ចើមផ្លូវពេញទំហឹងបណ្ដាលឲ្យអ្នកបើកស្លាប់ភ្លាមៗ និងអ្នករួមដំណើររងរបួសធ្ងន់។
ក្រោយកើតហេតុសមត្ថកិច្ចជំនាញមកវាស់វែង យកមធ្យោបាយទាំងពីរទៅរក្សាទុកនៅស្នងការដ្ឋានរាជធានីភ្នំពេញរងចាំដោះស្រាយគ្នាតាមផ្លូវច្បាប់។ចំណែកសពក្រោយពីសមត្ថកិច្ចធ្វើកំណាត់ហេតុរួចប្រគល់ឲ្យក្រុមគ្រួសារដឹកយកទៅធ្វើបុណ្យតាមប្រពៃណី៕