Views: 3
ប្រែសម្រួល : កញ្ញាដាលីស (ដេល្លីម៉េល) ៖ ក្រុមមន្ត្រីបាននិយាយថា បុរស ដែលបានបាញ់អ្នកបណ្តើរឆ្កែរបស់នាងឡេឌី ហ្គាហ្គា និង លួចយកឆ្កែតួពូជបារាំងរបស់នាងកាលពីឆ្នាំមុនបានទទួលយកកិច្ចព្រមព្រៀងសារភាពទោសមួយ ហើយត្រូវបានកាត់ទោសឱ្យជាប់គុក ២១ ឆ្នាំកាលពីថ្ងៃចន្ទទី៥ធ្នូ។
ជេមស៍ ហូវ៉ាដ ជែកសុន (James Howard Jackson) ជាបុរសម្នាក់ក្នុងចំណោមបុរសបីនាក់និងអ្នកសមគំនិតពីរនាក់ដែលបានចូលរួមក្នុងការប្លន់ដោយហិង្សានោះមិនបានជំទាស់ចំពោះការចោទប្រកាន់ពីបទប៉ុនប៉ងធ្វើឃាតនោះទេ នេះបើយោងតាមការិយាល័យមេធាវីក្រុងឡូសអាន់ជេឡេស។
មុននេះរដ្ឋអាជ្ញានិយាយថា ជែកសុននិងអ្នកផ្សេងទៀតបានបើកឡានជុំវិញសង្កាត់ហូលីវូដនៅថ្ងៃទី ២៤ ខែកុម្ភៈឆ្នាំ ២០២១ “ដើម្បីរកមើលឆ្កែបារាំងតឿ”។ពួកគេបានប្រទះឃើញអ្នកបណ្តើឆ្កែរបស់នាងឡេឌី ហ្គាហ្គា ឈ្មោះ រ៉ាយអែន ហ្វីសឺ (Ryan Fischer) អាយុ ៤១ ឆ្នាំ ជាមួយនឹងឆ្កែចិញ្ចឹមទាំងបីក្បាលរបស់តារាប៉ុបរូបនេះ ដែលមានឈ្មោះថា អេស៊ា (Asia) កូជី (Koji) និង ហ្គូស្តាវ (Gustav)។
ឈ្មោះ រ៉ាយអែន ហ្វីសឺ (Ryan Fischer) អាយុ ៤១ ឆ្នាំ អ្នកមើលឆ្កែរបស់នាងឡេឌី ហ្គាហ្គា ត្រូវបានបាញ់អោយរបួស
ជែកសុនបានបាញ់ហ្វីសឺក្នុងអំឡុងពេលប្លន់នៅជិតមហាវិថីសាន់សេត (Sunset Boulevard) ដែលក្នុងអំឡុងពេលនោះសត្វឆ្កែពីរក្បាលត្រូវបានយកទៅ។ កាមេរ៉ាកណ្ដឹងទ្វារក្បែរនោះបានថតសំឡេងអ្នកបណ្តើរឆ្កែនោះស្រែកថា “អូព្រះអើយ! ខ្ញុំត្រូវគេបាញ់ហើយ! ជួយខ្ញុំផង! ខ្ញុំកំពុងហូរឈាមចេញពីទ្រូងរបស់ខ្ញុំ!”។
ហ្វីសឺបានបាត់បង់ផ្នែកមួយនៃសួត។ ប្រហែលមួយខែបន្ទាប់ពីឧក្រិដ្ឋកម្មនេះ គាត់បានបង្ហោះនៅលើ Instagram ថា ការជាសះស្បើយរបស់គាត់បានដំណើរការយ៉ាងរលូន។
សត្វឆ្កែរបស់តារាប៉ុបនេះត្រូវបានប្រគល់មកវិញនៅពីរថ្ងៃក្រោយមកដោយស្ត្រីម្នាក់ដែលអះអាងថានាងបានរកឃើញពួកវាចងជាប់នឹងបង្គោលភ្លើង ហើយបានសុំរង្វាន់លើកទឹកចិត្ត ៥០០.០០០ដុល្លារពីនាងហ្គាហ្គា ប្រសិនបើចង់ឱ្យប្រគល់ឆ្កែទៅវិញ ដោយពោលពាក្យថា “កុំសួរសំណួរច្រើន”។ តារាចម្រៀងរូបនេះកំពុងនៅទីក្រុងរ៉ូមថតកុននៅគ្រានោះ។
ស្ត្រីរូបនេះត្រូវបានចោទប្រកាន់ពីបទទទួលផលចោរកម្ម ហើយឪពុករបស់ជនសង្ស័យម្នាក់ទៀតត្រូវចោទប្រកាន់ពីបទជួយឱ្យកូនខ្លួនរួចពីការចាប់ខ្លួន។
ប៉ូលិសនិយាយថា ចោរមិនបានស្គាល់ថាឆ្កែបារាំងតឿជារបស់នាងហ្គាហ្គាទេ ហើយថាឆ្កែគឺជាគោលដៅរបស់ពួកវា ព្រោះឆ្កែបារាំងតឿមួយក្បាលមានតម្លៃរាប់ពាន់ដុល្លារ៕
ជេមស៍ ហូវ៉ាដ ជែកសុន ត្រូវបានកាត់ទោសជាប់គុក២១ឆ្នាំពីបទបាញ់អ្នកបណ្តើឆ្កែរបស់នាងឡេឌី ហ្គាហ្គា ឈ្មោះ រ៉ាយអែន ហ្វីសឺ
នាងឡេឌី ហ្គាហ្គា