Views: 3
ដោយ៖ រ៉ាម៉ន / ភ្នំពេញ៖ លោកវេជ្ជបណ្ឌិត ងី មានហេង ប្រធានមន្ទីរសុខាភិបាល នៃរដ្ឋបាលរាជធានីភ្នំពេញ បានមានប្រសាសន៍ថាៈ កាលពីមុន ពោលគឺ ខណៈជំងឺកូវីដ-១៩ កំពុងផ្ទុះខ្លាំង នៅរាជធានីភ្នំពេញ យើងចាក់វ៉ាក់សាំង ជូនប្រជាពលរដ្ឋ ក្នុង១ថ្ងៃៗ បានចំនួនពី ១០.០០០ ទៅ ១៤.០០០ នាក់ លើទីតាំងចំនួន ៤១ ទីតាំង។ តែសម្រាប់ពេលនេះ ក្នុងមួយថ្ងៃៗ មិនបាន ៣.០០០ នាក់ផងទេ បើទោះបីយើង មានការផ្សព្វផ្សាយ និងរហូតដល់ក្រុមការងារស្ពាយវ៉ាក់សាំង ទៅចាក់ដល់ខ្នងផ្ទះ ពួកគាត់ក៏ដោយ។
លោក ងី មានហេង បានបញ្ជាក់ទៀតថាៈ យើងបានប្រើពេល ១០ ថ្ងៃ ដើម្បីចុះផ្សព្វផ្សាយ និងនាំយកវ៉ាក់សាំង ទៅចាក់នៅតំបន់ងាយរងគ្រោះ នៅក្នុងរាជធានីភ្នំពេញ ១វគ្គ ដំបូង យើងចាក់បាន ១០.០០០ នាក់ តែវគ្គក្រោយនេះ ថយចុះច្រើន ។ ប៉ុន្តែទោះបីជា យ៉ាងណាក្តី សម្រាប់ដូសទី៣ យើងចាក់បានជាង ១០០ ភាគរយហើយ ។
ការលើកឡើងបែបនេះ របស់លោកវេជ្ជបណ្ឌិត ងី មានហេង បានធ្វើឡើង នាព្រឹកថ្ងៃទី១១ ខែសីហា ឆ្នាំ២០២២នេះ ក្នុងកិច្ចប្រជុំសាមញ្ញលើកទី៣៩ របស់ក្រុមប្រឹក្សារាជធានីភ្នំពេញ អាណត្តិទី៣ ក្រោមអធិបតីភាពលោក ម៉ប់ សារិន ប្រធានក្រុមប្រឹក្សា រាជធានីភ្នំពេញ និងលោក មាន ចាន់យ៉ាដា អភិបាលរងរាជធានីភ្នំពេញ និងជាតំណាងលោក ឃួង ស្រេង អភិបាល នៃគណៈអភិបាល រាជធានីភ្នំពេញនៅសាលារាជធានីភ្នំពេញ ក្រោយពីក្រុមប្រឹក្សា រាជធានីភ្នំពេញ បញ្ជាក់ថាៈ ចំពោះការងារសុខាភិបាល តាមការពិនិត្យ ការចាក់វ៉ាក់សាំង អាយុ ១៨ ឆ្នាំឡើង ក្នុងខែកក្កដា បានចំនួន ៩៥.៩៦៩ នាក់ ប្រៀប នឹងខែមិថុនា មានការកើនឡើង ៧៣.៨៨៣ នាក់ តែបើប្រៀបនឹងដូសទី៤ ដែលត្រៀមបន្ត ចាក់ មានចំនួន ១.០១៦.៤២៦ នាក់។ ជាសំណូមពរ ស្នើបន្តយកចិត្តទុកដាក់ជំរុញឱ្យ ប្រជាពលរដ្ឋ ឡើងមកចាក់ បន្តបន្ទាប់ តាមកាលកំណត់៕/V