Views: 8
ដោយៈ ជា សីហៈ/ភ្នំពេញៈ ព្រឹត្តិការណ៍សប្តាហ៍វប្បធម៌កម្ពុជានៅវៀតណាមឆ្នាំ ២០២២កំពុងតែដំណើរការនៅក្នុងប្រទេសវៀតណាម ក្រោមការដឹកនាំដោយ លោក ឡុង ប៉ុណ្ណាស៊ីរីវត្ថ រដ្ឋលេខាធិការ និងជាប្រធានគណៈប្រតិភូថ្នាក់ដឹកនាំក្រសួងវប្បធម៌និងវិចិត្រសិល្បៈ ។
រូបភាពៈ( VNA )
ព្រឹត្តិការណ៍វប្បធម៌នេះ គឺបានរផបចំឡើងនៅក្នុងទីក្រុងហូជីមិញ និង ខេត្តត្រាវិញ នៅដែនដីសណ្តរទន្លេមេគង្គ ចាប់ពីថ្ងៃទី ២៧ ខែកញ្ញា ដល់ថ្ងៃទី០២ ខែតុលា ឆ្នាំ២០២២។
នៅក្នុងឱកាសស្នាក់នៅទីក្រុងហូជីមិញ លោក ឡុង ប៉ុណ្ណាស៊ីរីវត្ថ ក៏បានទទួលជួបពិភាក្សាជាមួយនឹង លោក ឌឿង អាញ់ឌុក (Duong Anh Duc) អភិបាលរងនៃគណៈកម្មាធិការប្រជាជនក្រុងហូជីមិញ។
លោកបានអះអាងថា ព្រឹត្តិការណ៍នេះ គឺរៀបចំឡើងដោយអនុលោមទៅតាមផែនការ សហប្រតិបត្តិការស្តីពីវប្បធម៌និងសិល្ប:ឆ្នាំ២០១៨-២០២២រវាងក្រសួងវប្បធម៌នៃប្រទេសទាំងពីរផង និងដើម្បីចូលរួមអបអរសាទរខួបទំនាក់ទំនងការទូតលើកទី៥៥រវាងប្រទេសទាំងពីរផងដែរ។
នៅក្នុងជំនួបនេះដែរ ភាគីទាំងពីរបានរំលឹកអំពីទំនាក់ទំនងនិងកិច្ចសហប្រតិបត្តិការល្អរវាងប្រទេសទាំងពីរ ទាំងក្នុងកាលៈទេសៈពិបាកកាលពីអតីតកាល និងក្នុងកាលៈទេសៈសន្ដិភាពនាពេលបច្ចុប្បន្ន នៅលើវិស័យជាច្រើន។
ទោះបីពិភពលោកនិងប្រទេសទាំងពីរទទួលរងផលប៉ះពាល់ពីការរីករាលដាលឆ្លងជំងឺកូវីដ-១៩កាលពីប៉ុន្មានឆ្នាំកន្លងទៅក៏ដោយ ប៉ុន្តែប្រទេសទាំងពីរនៅតែបន្តរក្សាបាននូវទំនាក់ទំនងនិងកិច្ចសហប្រតិបត្តិការជាទៀងទាត់ជាមួយគ្នា។
ភាគីទាំងពីរក៏បានផ្លាស់ប្ដូរយោបល់គ្នាលើបញ្ហាផ្សេងៗមួយចំនួន រួមមានការអភិរក្សបេតិកភណ្ឌទីក្រុង, ការរៀបចំស៊ីហ្គេម(SEA Games) ដែលភាគីវៀតណាមបានធ្វើជាម្ចាស់ផ្ទះរៀបចំកន្លងមក និងវេនសម្រាប់កម្ពុជាធ្វើជាម្ចាស់ផ្ទះបន្ត, គម្រោងបណ្តុះបណ្តាលនៅសាលាបេតិកភណ្ឌ រវាងកម្ពុជា ឡាវ និងវៀតណាម(CLV), ការផ្លាស់ប្ដូរគណៈប្រតិភូទៅវិញទៅមក…។ N
រូបភាព ( ក្រសួងវប្បធម៌ )
