Views: 3
ប្រែសម្រួល : កញ្ញាដាលីស (ដេល្លីម៉េល) ៖ កងទ័ពអាកាសអាម៉េរិកគ្រោងនឹងបង្ហាញយន្តហោះទំនើបបំផុតមិនធ្លាប់មានក្នុងសប្តាហ៍នេះ បន្ទាប់ពីចំណាយប្រាក់ជិត ២០៣ពាន់លានដុល្លារលើកម្មវិធីយន្តហោះនេះ។
យន្តហោះទម្លាក់គ្រាប់បែកបំបាំងកាយ B-21 Raider នឹងត្រូវដាក់បង្ហាញនៅឯរោងចក្រ Northrop Grumman ក្នុងទីក្រុងផាមឌែល (Palmdale) រដ្ឋកាលីហ្វ័រញ៉ានៅថ្ងៃសុក្រ ទី២ ខែធ្នូ។វាត្រូវបានរចនាឡើងដើម្បីអនុវត្តការទម្លាក់គ្រាប់បែករយៈចម្ងាយឆ្ងាយនិងបេសកកម្មនុយក្លេអ៊ែរ ដោយប្រើប្រាស់បច្ចេកវិជ្ជាបំបាំងកាយទំនើបបំផុត។
បច្ចុប្បន្ន យន្តហោះទម្លាក់គ្រាប់បែកប្រភេទនេះចំនួន ៦ គ្រឿងកំពុងត្រូវបានសាងសង់នៅទីក្រុងផាមឌែលក្នុងតម្លៃប្រហែល ២ ពាន់លានដុល្លារក្នុងមួយគ្រឿង។ គេរំពឹងថាពួកវានឹងហោះហើរនៅឆ្នាំ ២០២៣។
កងទ័ពអាកាសនិងក្រុមហ៊ុន Northrop បានចាប់ផ្តើមអភិវឌ្ឍយន្តហោះទម្លាក់គ្រាប់បែកនេះក្នុងឆ្នាំ ២០១៥ បន្ទាប់ពីក្រុមហ៊ុនផលិតយន្តហោះនិងផលិតអាវុធការពារជាតិនេះ បានទទួលបានកិច្ចសន្យាក្នុងការរចនានិងផលិតយន្តហោះនេះ។
យន្តហោះទំនើបនេះត្រូវគេដាក់ឈ្មោះតាមក្រុមបើកយន្តហោះ Doolittle Raiders ដែលជាក្រុមបើកយន្តហោះទម្លាក់គ្រាប់បែក B-21 ពីសង្គ្រាមលោកលើកទី ២ ដែលគេស្គាល់ខាងភាពក្លាហានមិនចេះតក់ស្លុតរបស់ពួកគេ។
ក្រុមអ្នកតំណាងរបស់ក្រុមហ៊ុន Northrop បានហៅយន្តហោះ B-21 ថាជា “ការត្រួសត្រាយផ្លូវ” និង “ឧត្តមភាពខាងបច្ចេកវិជ្ជា”។
អនុប្រធានផ្នែកនិងជាអ្នកគ្រប់គ្រងទូទៅរបស់ក្រុមហ៊ុន Northrop លោក ដូក យ៉ាំង (Dough Young) បាននិយាយថា “យន្តហោះ B-21 គឺជាយន្តហោះយោធាទំនើបបំផុតមិនធ្លាប់មានពីមុនមក ហើយជាផលិតផលនៃការត្រួសត្រាយខាងការច្នៃប្រឌិតនិងឧត្តមភាពបច្ចេកវិជ្ជា”។
លោកបានបន្ថែមថា “ក្រុម The Raider បានបង្ហាញពីការយកចិត្តទុកដាក់និងជំនាញរបស់មនុស្សរាប់ពាន់នាក់ ដែលធ្វើការជារៀងរាល់ថ្ងៃដើម្បីដំណើរការយន្តហោះនេះ”។
ព័ត៌មានលម្អិតអំពីយន្តហោះ B-21 Raider មិនត្រូវបានបញ្ចេញឱ្យដឹងនោះឡើយ៕
យន្តហោះ B-21 Raider នឹងដាក់បង្ហាញនៅថ្ងៃទី២ធ្នូ