Views: 10
ដោយៈ សុផល / ភ្នំពេញ៖ ក្នុងការប្រកួត Cambodian Idol រដូវកាលទី៤ វគ្គ Live Show សហ្ដាហ៍ទី៤ នាយប់ថ្ងៃទី៧ ខែសីហា ឆ្នាំ២០២២ មានបេក្ខជនចំនួន ១០ រូប ។ ប៉ុន្តែដោយសារសំឡេងចំនួន បោះឆ្នោតគាំទ្រតិច ទើបបេក្ខជន ២ រូប ត្រូវប្រឈមនឹងការចាកចេញ ក្នុងនាទីចុងក្រោយ នៃសប្ដាហ៍ថ្មី ។
អ្នកទាំងពីរ មាន ណាន វីសារ និង ស្រស់ រ៉ូឡុង ត្រូវជួបនឹងពេលវេលាភ័យរន្ធត់ ដោយសារអ្នកទាំង ២ ត្រូវចាកចេញពីកម្មវិធី នៅសប្ដាហ៍ប្រកួតទី៤ ។ ប៉ុន្តែអ្វីដែលគួរ ឲ្យភ្ញាក់ផ្អើល ក្រោយមានការពិចារណា និងពិគ្រោះគ្នា យ៉ាងហ្មត់ចត់ គណៈកម្មការ (Judge) ក៏សម្រេចផ្ដល់ឱកាសពិសេសបំផុត ទៅឲ្យបេក្ខភាព ណាន វីសារ ដែលអាចបន្តទៅវគ្គ Live Show សប្ដាហ៍ក្រោយទៀតបាន ជាមួយនឹងបេក្ខភាព ៨នាក់ ផ្សេងទៀត ហើយមានការសាទរជាខ្លាំង។
ការកាត់សេចក្តីនេះ ត្រូវបានចាត់ទុកជាប្រវត្តិសាស្ត្រថ្មី របស់ Cambodian Idol រដូវកាលទី៤ ហើយ វីសារ ក៏ក្លាយជាបេក្ខភាពតែម្នាក់គត់របស់កម្មវិធី ដែលទទួលបាន ឱកាសពិសេសនេះ គឺប្រៀបដូចជា សុបិន។ ដូចប្រិយមិត្តជាច្រើន បានជ្រាបស្រាប់ហើយ ថា ក្នុងមួយរដូវកាល Judge មានសិទ្ធិ Save បានតែ ១ ដងគត់ ក្នុង ១នាក់ ហើយអស់ពេល ៣ សប្ដាហ៍មកហើយ ដែល Judge មើលការដើរចេញទាំងស្ដាយរបស់ បេក្ខភាព ដែលទទួលបានសំឡេងបោះឆ្នោត( Vote ) តិចជាងគេ កន្លងទៅ។ ប៉ុន្តែមកទើរត្រឹម វីសារ ពេលនេះ ក៏ព្រោះគណៈកម្មការ គិតថា លោកនៅមានសមត្ថភាព អាចបន្តទៅមុខទៀតបាន ទើបមិនដាច់ចិត្តឲ្យដើរចេញទៅ ត្រឹមសប្ដាហ៍នេះ។
វីសារ ក៏បានបង្ហាញអារម្មណ៍ពិតរបស់ខ្លួន កាលយប់មិញនេះ ដោយបានសរសេរបង្ហោះ លើបណ្ដាញសង្គម Facebook ព្រមទាំងសម្ដែងការដឹងគុណថាៈ «យប់មិញ គឺអារម្មណ៍ក្តុកក្តួល រន្ធត់ខ្លាំងមែនទែន ខ្ញុំអត់បានយំទេ តែទឹកភ្នែកវាហូរមកអត់ដឹងខ្លួន ហូរអត់ឈប់សោះ ហូរដោយសាររំភើបនឹងសំលេងហ៊ោគាំទ្ររបស់បងប្អូន។ ម្រាមដៃដប់ ក្បាលក្រាបដល់ឆាក សូមអរគុណ ចំពោះការផ្តល់ឱកាសដ៏ពិសេសពីបងៗ គណៈកម្មការ ដែលជួយសង្គ្រោះ save រូបខ្ញុំ ទៅសប្តាហ៍ទី៥ បន្តទៀត។ ខ្ញុំនឹងធ្វើឱ្យការ Save មួយនេះ ក្លាយទៅជាការ Save ដ៏មានតម្លៃបំផុត និងខិតខំប្រឹងដុះខាត់សមត្ថភាពរបស់ខ្ញុំ បន្ថែមទៀត ឱ្យកាន់តែល្អ។ អរគុណដល់បងៗ ក្រុមការងារទាំងអស់ និងបងពិធីករ ទាំង២ ជាពិសេសសូមអរគុណពុកម៉ែបងប្អូន ដែលចំណាយថវិកាផ្ទាល់ខ្លួន និងពេលវេលា ដ៏មានតម្លៃ ផ្ញើសារបោះឆ្នោតឱ្យរូបខ្ញុំ។ ខ្ញុំបាទសូមអរគុណ សម្រាប់ការអាណិត ស្រលាញ់ដ៏ធំធេងពីពុកម៉ែប្អូនទាំងអស់គ្នាដល់រូបខ្ញុំ គឺខ្ញុំទទួលបានភាពកក់ក្តៅយ៉ាងខ្លាំង ដែលខ្ញុំពុំធ្លាប់ទទួលបានពីមុនមក»។
ពេលនេះ សល់បេក្ខជនតែ ៩ នាក់ទេ ក្នុងនោះ មានតែបេក្ខនារីម្នាក់គត់ ដែលនៅតស៊ូជាប់បន្ត គឺកញ្ញា មាស នីតា មកពីខេត្តកណ្តាល ហើយមហាជន ក៏បាន ព្យាករណ៍ថា រដូវកាលទី៤ នេះ អ្នកមកដណ្តើមពានគ្នា នាវិនាទីចុងក្រោយគឺ ថុល សុភិទិ , លឹម តិចម៉េង , ស៊ឹម ច័ន្ទពន្លឺ និង ណាន វិ សារ ។ យ៉ាងណា អ្នកគាំទ្រ កំពុងគិតថា ថុល សុភិទិ អាចឈ្នះពាន ព្រោះកំពុងផ្ទុះការទាក់ទាញ ហើយល្បីណាស់ ពេលនេះ ទាំងសំឡេង និងរូបសម្បត្តិ ៕/V
