Views: 3
ដោយ៖ ដេប៉ូ / ភ្នំពេញ៖ ហឹបវិញ្ញាសា សម្រាប់ដំណើរការសំណេរ នៃការប្រឡង សញ្ញាបត្រមធ្យមសិក្សាទុតិយភូមិ ឬហៅថា បាក់ឌុប សម័យប្រឡង ០៥ ធ្នូ ២០២២ ត្រូវបានដឹកជញ្ជូនពី រដ្ឋបាលសាលារាជធានី-ខេត្ត ទៅរក្សាទុកនៅតាមសាលាស្រុក នីមួយៗ ប្រកបដោយសុវត្ថិភាពហើយ។ នេះបើតាមការឱ្យដឹងពី សំណាក់ក្រសួងអប់រំ យុវជន និងកីឡានៅថ្ងៃទី៣ ខែធ្នូ ឆ្នាំ២០២២ ។
បើយោងតាមទំព័រហ្វេសប៊ុករបស់ ក្រសួងអប់រំ បានឱ្យដឹងថាៈ ក្នុងដំណើរការនៃការទុក ដាក់ហឹបវិញ្ញាសានេះ មានការចូលរួមពិនិត្យ យ៉ាងហ្មត់ចត់ ដោយស្មារតីទទួលខុសត្រូវ ខ្ពស់ ពីសំណាក់គណៈមេប្រយោគ គណៈកម្មការអប្បមាទ ជំនួយការអប្បមាទ អង្គភាពប្រឆាំងអំពើពុករលួយ ព្រមទាំងអាជ្ញាធរដែនដី ដែលពាក់ព័ន្ធ ដើម្បីរក្សាបាននូវ ស្តង់ដានៃការប្រឡង ដោយគោរពតាមគោលការណ៍ច្បាប់ យុត្តិធម៌ តម្លាភាព និងលទ្ធផល ទទួលយកបាន។
ជុំវិញការប្រឡងសញ្ញាបត្របាក់ឌុបនេះ ក្រសួងអប់រំ បានឱ្យដឹងដែរថាៈ វិញ្ញាសាទាំងអស់ ត្រូវបានជ្រើសរើស តាក់តែង រៀបចំ និងគ្រប់គ្រង ដោយក្រសួងអប់រំ យុវជន និងកីឡា។ វិញ្ញាសាប្រឡង ត្រូវបានកំណត់ សម្រាប់ថ្នាក់វិទ្យាសាស្ត្រ និងសម្រាប់ថ្នាក់វិទ្យាសាស្ត្រ សង្គម ដោយទម្រង់វិញ្ញាសា ត្រូវបានរៀបចំជាពីរ គឺទម្រង់វិញ្ញាសាចម្លងដាក់លើក្តារខៀន និងទម្រង់វិញ្ញាសា ជាសន្លឹកក្រដាស ចែកជូនបេក្ខជន។
គួរបញ្ជាក់ថា សម្រាប់ការប្រឡង សញ្ញាបត្រមធ្យមសិក្សាទុតិយភូមិ សម័យប្រឡង៖ ០៥ ធ្នូ ២០២២ មានបេក្ខជនចុះឈ្មោះប្រឡងសរុប ១២៨.១៣៤ នាក់ ស្រី ៦៨.៧៧១ នាក់ មណ្ឌលប្រឡងសរុប ២២១ មណ្ឌល ត្រូវជា ៥.១៧៤ បន្ទប់។ ក្រសួងអប់រំ យុវជន និងកីឡា គ្រោងនឹងប្រកាសលទ្ធផលប្រឡង នៅថ្ងៃទី២៧ ខែធ្នូ ឆ្នាំ២០២២ សម្រាប់ រាជធានីភ្នំពេញ និងខេត្តកណ្ដាល និងថ្ងៃទី២៨ ខែធ្នូ ឆ្នាំ២០២២ សម្រាប់ខេត្តផ្សេងទៀត ព្រមទាំងមានផ្សាយនៅលើទំព័រហ្វេសប៊ុកផ្លូវការ ក្រសួងអប់រំ យុវជន និងកីឡា៕/V
