Views: 7
ដោយ៖ សុវណ្ណកុម្ភៈ/ភ្នំពេញ៖ក្នុងមហិច្ឆតាប្រជែងយកមេដាយនាស៊ីហ្គេមលើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះនោះ ក្រុមហែលទឹកជម្រើសជាតិហែលទឹកពាក់ជើងទា ចំនួនប្រាំមួយនាក់ក្នុងនោះកីឡាករបួននាក់ និងកីឡាការិនីពីរនាក់កំពុងបង្កើនហ្វឹកហាត់កាន់តែខ្លាំងក្លាជាងមុន។
លោក ហែមថុន ពន្លឺ គ្រូបង្វឹកជម្រើសជាតិផ្នែកហែលទឹកពាក់ជើងទា គូសបញ្ជាក់ ថា បច្ចុប្បន្ននេះក្រុមជម្រើជាតិហែលទឹកពាក់ជើងទាកំពុងសម្រុកហ្វឹកហាត់យ៉ាងសកម្មសម្រាប់ចំនួនកីឡាករ កីឡាការិនីទាំងប្រាមួយនាក់ ដោយមិនទាន់បានស្វែងរកបន្ថែមនោះនៅឡើយ។ ម្យ៉ាងទៀត ដោយសារខ្វះខាតសម្ភារៈហ្វឹកហាត់ លើវិញ្ញាសាហែលជើងទានេះផង។ ប៉ុន្តែនឹងបន្ថែមចំនួនកីឡាករ កីឡាការិនីមួយចំនួនទៀត ពេលសម្ភារហ្វឹកហាត់មានគ្រប់គ្រាន់។
សម្រាប់កម្មវិធីហ្វឹកហាត់វិញ ត្រូវបានគ្រូបង្វឹករូបនេះអះអាងថា មានរយៈពេលប្រាំមួយថ្ងៃ ក្នុងនោះបីថ្ងៃ គឺហែលទឹកសម្រាប់ត្រៀមចូលរួមប្រកួតកីឡាជាតិ លើកទីបី នាខែវិច្ឆិកា ឆ្នាំ២០២២ រីឯបីថ្ងៃទៀត ពីថ្ងៃព្រហស្បតិ៍ ដល់ថ្ងៃសៅរ៍ គឺហែលពាក់ជើងទា។ ក្នុងមួយថ្ងៃៗ ការហ្វឹកហាត់ធ្វើឡើងចំនួនពីរពេល ក្នុងមួយពេលៗ មានបីម៉ោង។ ដូច្នេះ ក្នុងមួយថ្ងៃ មានចំនួន ប្រាំមួយម៉ោង។
ក្រោយបញ្ចប់កម្មវិធីកីឡាជាតិការហ្វឹកហាត់នេះនឹងត្រូវកាត់ចោលការហែលទឹកបីថ្ងៃនោះដោយបង្កើនម៉ោងហ្វឹកហាត់សម្រាប់វិញ្ញាសាហែលជើងទាសុទ្ធ។តាមផែនការសហព័ន្ធខ្មែរកីឡាហែលទឹកកំពុងទាក់ទងជាមួយខាងភាគីវៀតណាមដើម្បីបញ្ជូនក្រុមជម្រើសជាតិហែលពាក់ជើងទា ទាំងប្រាំមួយនាក់ ទៅហ្វឹកហាត់នៅទីនោះ នាពេលខាងមុខ។
គ្រូបង្វឹករូបនេះ បានរំឭុកថា ជាមួយនឹងសមិទ្ធផលជាមេដាយពីរលើកកន្លងមក គឺមេដាយសំរឹទ្ធមួយវិញ្ញាសា ក្នុងការប្រកួតកីឡាស៊ីហ្គេម លើកទី៣១ នៅប្រទេសវៀតណាម កាលពីខែឧសភា ឆ្នាំ២០២២ និងការប្រកួតពានរង្វាន់ហែលជើងទាពិភពលោក (Finswimming’s World Cup) កាលពីខែកញ្ញា ឆ្នាំ២០២២ នៅប្រទេសថៃ គឺជាកម្លាំងរុញឲ្យក្រុមជម្រើសជាតិនេះខិតខំពុះពារកាន់តែខ្លាំងក្លាដើម្បីជាក្តីសង្ឃឹមកាន់តែ
ខ្ពស់ដើម្បីឈានទៅដណ្តើមមេដាយជូនជាតិជាប្រវត្តិសាស្ត្រជាលើកដំបូងក្នុងពេលកម្ពុជាទទួលរៀបចំធ្វើម្ចាស់ផ្ទះ ស៊ីហ្គេម លើកទី៣២ ឆ្នាំ២០២៣។
លោកសង្ឃឹមថាតាមរយៈការប្រឹងប្រែងអស់ពីកម្លាំងកាយចិត្តរួមគ្នានេះប្រភេទកីឡាហែលពាក់ជើងទាកម្ពុជា នឹងទទួលបានលទ្ធផលល្អជាក់ជាមិនខាន។ កាលពីត្រៀមស៊ីហ្គេម ២០២២ នៅវៀតណាម យើងទើបនឹងចាប់ផ្តើមរយៈពេលខ្លី ប៉ុន្តែយើងទទួលបានលទ្ធផលល្អ។ ការត្រៀមស៊ីហ្គេម ២០២៣ យើងនឹងមានពេលវេលាមួយវែងជាង ជាមួយនឹងការហ្វឹកហាត់ បង្កើនការហ្វឹកហាត់នៅប្រទេសវៀតណាមបន្ថែមដោយសារប្រទេសវៀតណាមគឺជាជើងឯកលើវិញ្ញាសាហែលជើងទានេះ។ ដូច្នេះ កត្តាត្រៀមខ្លួនរួមផ្សំទាំងអស់នេះ យើងរំពឹងថា យើងនឹងទទួលបានលទ្ធផលល្អជូនជាតិ ក្នុងពេលស៊ីហ្គេម ២០២៣ ជាក់ជាមិនខាន៕
