Views: 3
ប្រែសម្រួលៈបំណង(ដេល្លីម៉េល)៖ ការវាយប្រហារតាមផ្លូវអាកាសដោយយោធាមីយ៉ាន់ម៉ាលើភូមិពីរដែលពួកជនជាតិភាគតិចការ៉េនរស់នៅ បានសម្លាប់ជនស៊ីវិលប្រាំនាក់ រួមមានម្តាយម្នាក់និងកូនស្រីអាយុ២ឆ្នាំរបស់នាង ហើយបានបំផ្លាញព្រះវិហារពីរ នេះបើតាមការបញ្ជាក់ពីអង្គការផ្តល់ជំនួយពីរកាលពីថ្ងៃសុក្រ។
ការស្លាប់ក្នុងការវាយប្រហារតាមអាកាសបានកើតឡើងកាលពីថ្ងៃព្រហស្បតិ៍ និងក៏រួមមានអ្នកបួសនិងអ្នកធ្វើការបីនាក់នៅព្រះវិហារគ្រិស្តសាសនាមួយ នេះបើតាមអង្គការស្ត្រីការ៉េននិងអង្គការកងទាហានភូមាសេរី។ស្ត្រីម្នាក់ទៀតនិងកូនរបស់នាងក៏បានរងរបួសក្នុងការវាយប្រហារនៅភូមិទីពីរ។
ក្រុមអង្គការស្ត្រីការ៉េនបាននិយាយក្នុងសេចក្តីថ្លែងការណ៍មួយថា «ការវាយប្រហារបានសម្លាប់ជនស៊ីវិលនិងបំផ្លាញផ្ទះ មជ្ឈមណ្ឌលព្យាបាលជំងឺ ព្រះវិហារ សាលារៀន បណ្ណាល័យនិងវត្តអារ៉ាម។
ការ៉េន ដែលភាគច្រើនរស់នៅតាមព្រំដែនខាងកើតជាប់ថៃ ជាក្រុមជនជាតិមួយដែលមានកងកម្លាំងឧទ្ទាមប្រដាប់អាវុធរៀបរយបំផុតនៅមីយ៉ាន់ម៉ា។ក្រុមនេះបាននិងកំពុងវាយប្រយុទ្ធទល់នឹងទាហានរដ្ឋាភិបាលកណ្តាលអស់ពេលរាប់ទសវត្សរ៍ដើម្បីស្វ័យភាពធំឡើង។ការវាយប្រយុទ្ធគ្នាកាន់តែកើនឡើងបន្ទាប់ពីរដ្ឋាភិបាលធ្វើរដ្ឋប្រហារទម្លាក់រដ្ឋាភិបាលស៊ីវិលកាលពីខែកុម្ភៈឆ្នាំ២០២១។
ក្រុមយោធាបានប្រើកម្លាំងប្រដាប់អាវុធដើម្បីបង្ក្រាបការតវ៉ាប្រឆាំងនឹងរដ្ឋប្រហារ ជាហេតុនាំអោយកម្លាំងគាំទ្រលទ្ធិប្រជាធិបតេយ្យមីយ៉ាន់ម៉ារួមដៃជាមួយក្រុមឧទ្ទាមជនជាតិ រួមមានក្រុមជនជាតិការ៉េន។រដ្ឋាភិបាលយោធាបានធ្វើការវាយប្រហារនៅតាមទីជនបទរួមទាំងតំបន់តាមព្រំដែនដើម្បីដណ្តើមការគ្រប់គ្រងទឹកដីនិងកំចាត់ក្រុមប្រឆាំង។
ការវាយប្រហារបានសម្លាប់ជនស៊ីវិលនិងបំផ្លាញផ្ទះ មជ្ឈមណ្ឌលព្យាបាលជំងឺ ព្រះវិហារ សាលារៀន បណ្ណាល័យនិងវត្តអារ៉ាម
រដ្ឋាភិបាលឯកភាពជាតិដែលជារដ្ឋាភិបាលស្រមោល បាននិយាយនៅសប្តាហ៍នេះថា ចាប់តាំងពីទាហានដណ្តើមអំណាចមក ជនស៊ីវិលស្លូតត្រង់៤៦០នាក់ ភាគច្រើនជាកូនក្មេង ត្រូវបានសម្លាប់ក្នុងការវាយប្រហាតតាមផ្លូវអាកាស។
វាជាការវាយប្រហារតាមផ្លូវអាកាសលើទីពីរនៅសប្តាហ៍នេះនៅក្នុងរដ្ឋការ៉េន។កាលពីថ្ងៃអង្គារនិងពុធ នៅក្នុងរដ្ឋជីនភាគខាងលិច យន្តហោះយោធាក៏បានទម្លាក់គ្រាប់បែកលើទីស្នាក់ការក្រុមឧទ្ទាមជនជាតិជីនដែលហៅខ្លួនឯងថា«រណសិរ្សជាតិជីន»។សមាជិកប្រាំនាក់នៃកងទ័ពជនជាតិជីនបានស្លាប់កាលពីថ្ងៃអង្គារ ហើយការទម្លាក់គ្រាប់កាលពីថ្ងៃពុធបានបំផ្លាញគ្លីនិចមួយនិងអាគារជាច្រើនក្នុងជំរំ៕