Views: 11
ដោយៈ ទេព មង្គល / ក្រចេះ ៖ នៅថ្ងៃទី១៦ ខែសីហា ឆ្នាំ២០២២ នេះ អាជ្ញាធរមូលដ្ឋាន និងក្រុមការងារបច្ចេកទេស ផ្លូវជនបទ នៃមន្ទីរអភិវឌ្ឍន៍ជនបទ ខេត្តក្រចេះ បានចុះពិនិត្យ សិក្សា និងវាយតម្លៃ អំពីការបាក់ស្រុតស្ពានអូរភ្នំខ្នែង ស្ថិតក្នុងភូមិយាវ ឃុំកំពង់ចាម ស្រុកសំបូរ ដើម្បីកសាងឡើងវិញ នាពេលឆាប់ៗ ខាងមុខនេះ បន្ទាប់ពីស្ពានួយកន្លែងនេះ បានបាក់ស្រុត អស់រយៈពេលជិត មួយសប្តាហ៍ កន្លងមក ។
លោក ឈិត ណន មេឃុំកំពង់ចាម បានឱ្យដឹងថាៈ ដោយសារស្ថានភាពភ្លៀង រលឹមជោក ជាំពេក ឥឡូវនេះ មិនអាចធ្វើការជួសជុលស្ពាននេះ បានភ្លាមៗនោះទេ ក៏ប៉ុន្តែអាជ្ញាធរ អនុញ្ញាតឱ្យអ្នកភូមិក្បែរនោះ រៀបចំទូកព្យាង រុញឆ្លងជាបណ្ដោះអាសន្នសិន។ គេអាចយក កម្រៃតិចតួច ប៉ុន្តែអាជ្ញាធរឃុំ មិនអនុញ្ញាតឲ្យយកលុយ ពីសិស្សសាលា ឬមន្ត្រីរាជការនោះទេ ។
លោកមេឃុំ បានឱ្យដឹងដែរថាៈ ស្ពាននេះ ត្រូវបានកសាងឡើង ដោយឈើ តាំងពីឆ្នាំ ២០០២ មកម្ល៉េះ ឥឡូវ ត្រូវបានពុកផុយ ហើយមិនអាចជួសជុលបាននោះទេ ពីព្រោះ ប្រសិនបើនៅតែបន្តជួសជុលប្រើប្រាស់ទៀត អាចប្រឈមនឹងមានបញ្ហាគ្រោះថ្នាក់ ។
លោកមេឃុំ បានបន្តថាៈ អាជ្ញាធរ គ្រោងនឹងរៀបចំចាក់ដី ដាក់លូ ដើម្បីប្រើប្រាស់ជា បណ្តោះអាសន្នសិន រង់ចាំរហូតដល់ស្ងួតដី មន្ទីរជំនាញ នឹងចាប់ផ្ដើមសិក្សាបន្ត ដើម្បីសាងសង់ស្ពាន ចំនួន ៦ កន្លែង នៅក្នុងឃុំកំពង់ចាម ដែលជាជំនួយរបស់ប្រទេសកូរ៉េ តាមរយៈមន្ទីរអភិវឌ្ឍន៍ជនបទខេត្ត ។
លោក ឈិត ណន ក៏បានឱ្យដឹងដែរថាៈ ទោះបីជាស្ពាន ដែលគ្រោងនឹងសាងសង់ថ្មី ដោយជំនួយរបស់កូរ៉េ តាមរយៈមន្ទីរអភិវឌ្ឍន៍ជនបទ ក៏ដោយ ក៏អាជ្ញាធរ ត្រូវតែរៀបចំ ធ្វើយ៉ាងណា រៀបចំដើម្បីជួយសម្រួលដល់មធ្យោបាយ យានយន្តគ្រប់ប្រភេទ អាចចរាចរបានឡើងវិញ ជាបណ្ដោះអាសន្នសិន ៕/V