Views: 9
ប្រែសម្រួលៈបំណង(ដេល្លីម៉េល)៖រដ្ឋាភិបាលទីក្រុងសេអ៊ូលបាននិយាយកាលពីថ្ងៃពុធទី៥តុលាថាយោធាកូរ៉េខាងត្បូងនិងអាម៉េរិកបានបាញ់កាំជ្រួចស្រោចចូលក្នុងសមុទ្រជាការឆ្លើយតបនឹងការបាញ់កាំជ្រួចផ្លោងរំលងជប៉ុនមួយគ្រាប់ដោយកូរ៉េខាងជើងកាលពីមួយថ្ងៃអង្គារ ។
កូរ៉េខាងជើងដែលមានសព្វាវុធនុយក្លេអ៊ែរបានសាកល្បងកាំជ្រួចផ្លោងចម្ងាយមធ្យមមួយកាលពីថ្ងៃអង្គារ ដោយវាបានហោះពីលើជប៉ុនជាលើកដំបូងក្នុងរយៈពេលប្រាំឆ្នាំមកនេះ និងបណ្តាលអោយអ្នកស្រុកជប៉ុនស្វែងរកកន្លែងការពារខ្លួន។
ទាហានកូរ៉េខាងត្បូងនិងអាម៉េរិកបានធ្វើសមយុទ្ធបាញ់កាំជ្រួចរបស់គេផ្ទាល់ជាការឆ្លើយតបនឹងអំពើរបស់កូរ៉េខាងជើង នេះបើតាមនាយសេនាធិការកងទ័ពចំរុះកូរ៉េខាងត្បូងបាននិយាយកាលពីថ្ងៃពុធ។វាបាននិយាយថា ភាគីនីមួយៗបានបាញ់កាំជ្រួចផ្លោងចម្ងាយខ្លីATACMS ផលិតនៅអាម៉េរិកចំនួនពីរគ្រាប់។
យោធាកូរ៉េខាងត្បូងក៏បានរាយការណ៍ថា ការបាញ់កាំជ្រួចហ្យុនមូ-2(Hyunmoo-2)ផលិតនៅកូរ៉េខាងត្បូងបានបរាជ័យនិងបានធ្លាក់តែមិនបង្កគ្រោះថ្នាក់ដល់មនុស្សទេ។
សូមបញ្ជាក់ថា ប្រធានាធិបតីអាម៉េរិក និងនាយករដ្ឋមន្ត្រីជប៉ុនបានថ្កោលទោសការបាញ់សាកល្បងកាំជ្រួចរបស់កូរ៉េខាងជើងក្នុងការប្រើសម្តីខ្លាំងៗ ហើយសហភាពអឺរ៉ុបបានហៅវាថាជា«អំពើបង្ករឿងដោយចេតនានិងធ្វេសប្រហែស»មួយ។អគ្គលេខាអង្គការសហប្រជាជាតិក៏បានថ្កោលទោសការបាញ់បង្ហោះកាំជ្រួចផ្លោងពីសំណាក់កូរ៉េខាងជើងនិងថាវារំលោភសេចក្តីសំរេចចិត្តរបស់ក្រុមប្រឹក្សាអង្គការសហប្រជាជាតិ។
សហរដ្ឋអាម៉េរិកបានស្នើសុំក្រុមប្រឹក្សាសន្តិសុខអង្គការសហប្រជាជាតិកោះប្រជុំនៅថ្ងៃពុធស្តីពីកូរ៉េខាងជើង តែពួកអ្នកការទូតបាននិយាយថា ចិននិងរុស្ស៊ីប្រឆាំងការពិភាក្សាជាសាធារណៈណាមួយដោយក្រុមប្រឹក្សាដែលមានសមាជិក១៥ប្រទេសនេះ៕
ទាហានកូរ៉េខាងត្បូងនិងអាម៉េរិកបានធ្វើសមយុទ្ធបាញ់កាំជ្រួចរបស់គេផ្ទាល់ជាការឆ្លើយតបនឹងអំពើរបស់កូរ៉េខាងជើង