Views: 5
ប្រែសម្រួល : កញ្ញាដាលីស (ដេល្លីម៉េល) ៖ រដ្ឋមន្ត្រីការបរទេសអាម៉េរិក លោក អ៊ែនថូនី ប្លីងកិន កាលពីថ្ងៃអង្គារទី២៧កញ្ញា បាននិយាយការពារការលក់ឧបករណ៍យោធាឱ្យទៅប៉ាគីស្ថានបន្ទាប់ពីទទួលរងការរិះគន់ខ្លាំងឡើងពីដៃគូអាម៉េរិកគឺឥណ្ឌា ដែលចាត់ទុកខ្លួនឯងជាគោលដៅនៃយន្តហោះ F-16 របស់រដ្ឋាភិបាលក្រុងអ៊ីស្លាម៉ាបាដ។
លោកប្លីងកិនបានជួបជាមួយរដ្ឋមន្ត្រីការបរទេសឥណ្ឌាក្នុងរដ្ឋធានីរបស់អាម៉េរិក ពោលគឺមួយថ្ងៃគត់បន្ទាប់ពីកិច្ចពិភាក្សាដាច់ដោយឡែកជាមួយសមភាគីរបស់គាត់ពីប៉ាគីស្ថាន។
សម្ពន្ធភាពអាមេរិក-ប៉ាគីស្ថាន ដែលកើតចេញពីសង្គ្រាមត្រជាក់ បានថមថយជុំវិញទំនាក់ទំនងរបស់រដ្ឋាភិបាលក្រុងអ៊ីស្លាម៉ាបាដជាមួយនឹងរបបតាលីបង់ នៅអាហ្វហ្គានីស្ថាន។
អ្នកការទូតកំពូលរបស់អាម៉េរិករូបនេះបាននិយាយការពារកិច្ចព្រមព្រៀងលក់យន្តហោះ F-16 តម្លៃ ៤៥០ លានដុល្លារសម្រាប់ប៉ាគីស្ថានដែលត្រូវបានអនុម័តកាលពីដើមខែកញ្ញា ដោយនិយាយថា កញ្ចប់នេះគឺសម្រាប់ការថែទាំកងយន្តហោះដែលមានស្រាប់របស់ប៉ាគីស្ថានប៉ុណ្ណោះ។់
លោកប្លីងកិនបានប្រាប់សន្និសីទសារព័ត៌មានជាមួយសមភាគីឥណ្ឌាលោក ស៊ូប្រាម៉ានយ៉ាម ចៃសានកា (Subrahmanyam Jaishankar) ថា “ទាំងនេះមិនមែនជាយន្តហោះថ្មី ប្រព័ន្ធថ្មី អាវុធថ្មីទេ។ វាទ្រទ្រង់នូវអ្វីដែលពួកគេមាន”។
លោកប្លីងកិននិយាយថា “កម្មវិធីរបស់ប៉ាគីស្ថានគឺជួយពង្រឹងសមត្ថភាពរបស់ខ្លួនក្នុងការដោះស្រាយជាមួយនឹងការគំរាមកំហែងពីពួកភេរវករដែលចេញមកពីប៉ាគីស្ថានឬពីតំបន់។វាមិនផ្តល់ផលប្រយោជន៍ដល់នរណាទាំងអស់ ដែលការគំរាមកំហែងទាំងនោះអាចបន្តទៅមុខដោយនិទណ្ឌភាព”។
លោកចៃសានកាមិនបានរិះគន់លោកប្លីងកិនជាសាធារណៈទេ។ ប៉ុន្តែកាលពីថ្ងៃអាទិត្យដោយនិយាយនៅឯពិធីជួបជុំសហគមន៍ឥណ្ឌានៅសហរដ្ឋអាម៉េរិកលោកចៃសានកាបាននិយាយអំពីជំហររបស់អាម៉េរិកថា “អ្នកមិនបានបោកបញ្ឆោតនរណាម្នាក់ទេ”។
លោកបាននិយាយថា “សម្រាប់មនុស្សម្នាក់ដែលនិយាយថា ខ្ញុំកំពុងធ្វើរឿងនេះ ព្រោះវាសម្រាប់ប្រឆាំងភេរវកម្ម នៅពេលដែលអ្នកនិយាយអំពីយន្តហោះដូចជាសមត្ថភាពរបស់ F-16អ្នករាល់គ្នាដឹងច្បាស់ថា ពួកវាត្រូវបានដាក់ពង្រាយនៅឯណា” ដោយសំដៅលើទីតាំងសម្រាប់ប្រឆាំងនឹងឥណ្ឌា។
លោកបាននិយាយថា “និយាយដោយស្មោះត្រង់ វាជាទំនាក់ទំនងដែលទីបំផុតនឹងមិនបម្រើដល់ប៉ាគីស្ថានឬបម្រើផលប្រយោជន៍របស់អាម៉េរិកនោះទេ”។
យោធាប៉ាគីស្ថានពឹងផ្អែកលើបរិក្ខារយោធារបស់អាម៉េរិក ប៉ុន្តែទំនាក់ទំនងកាន់តែជូរចត់ក្នុងអំឡុងសង្គ្រាមអាម៉េរិករយៈពេលពីរទសវត្សរ៍នៅអាហ្វហ្គានីស្ថាន ដោយរដ្ឋាភិបាលក្រុងវ៉ាស៊ីនតោនជឿថា មនុស្សនៅក្នុងទីក្រុងអ៊ីស្លាម៉ាបាដមិនដែលផ្តាច់ការគាំទ្រដល់ក្រុមតាលីបង់ ដែលបានដណ្តើមអំណាចមកវិញកាលពីឆ្នាំមុននោះទេ។
ឥណ្ឌាបានទិញឧបករណ៍យោធាជាប្រវត្តិសាស្ត្រពីរដ្ឋាភិបាលក្រុងមូស្គូ ហើយបានជំរុញសហរដ្ឋអាម៉េរិកឱ្យលើកលែងទណ្ឌកម្មដែលតម្រូវនៅក្រោមច្បាប់ឆ្នាំ ២០១៧ សម្រាប់ប្រទេសណាដែលទិញយោធូបករណ៍ “សំខាន់” ពីប្រទេសរុស្ស៊ី។
ថ្លែងនៅក្បែរលោកប្លីងកិន លោកចៃសានកាបានកត់សម្គាល់ថា ឥណ្ឌាក្នុងប៉ុន្មានឆ្នាំថ្មីៗនេះក៏បានបញ្ជាទិញធំៗពីសហរដ្ឋអាម៉េរិក បារាំង និងអ៊ីស្រាអែលផងដែរ។
លោកបាននិយាយថា ឥណ្ឌាវាយតម្លៃគុណភាពនិងលក្ខខណ្ឌទិញ ហើយ “យើងអនុវត្តជម្រើសដែលយើងជឿថាជាផលប្រយោជន៍ជាតិរបស់យើង” ដោយបដិសេធរាល់ការផ្លាស់ប្តូរណាមួយដោយសារតែ “ភាពតានតឹងខាងភូមិសាស្ត្រនយោបាយ”៕
លោកប្លីងកិន (ស្តាំ) និងលោកចៃសានកាជួបពិភាក្សាគ្នានៅទីក្រុងវ៉ាស៊ីនតោនកាលពីថ្ងៃអង្គារ
