Views: 1
ប្រែសម្រួល : កញ្ញាដាលីស (ដេល្លីម៉េល) ៖ មេដឹកនាំកំពូលរបស់អ៊ីរ៉ង់ លោក អាយ៉ាតូលឡា អាលី ខាមេនី (Ayatollah Ali Khamenei)បានឆ្លើយតបជាសាធារណៈកាលពីថ្ងៃចន្ទទី៣តុលាចំពោះការតវ៉ាដ៏ធំបំផុតនៅក្នុងប្រទេសអ៊ីរ៉ង់ក្នុងរយៈពេលជាច្រើនឆ្នាំ ដោយបំបែកភាពស្ងៀមស្ងាត់ជាច្រើនសប្តាហ៍ដើម្បីថ្កោលទោសនូវអ្វីដែលលោកហៅថា “កុបកម្ម”និងចោទប្រកាន់សហរដ្ឋអាម៉េរិកនិងអ៊ីស្រាអែលថាបានរៀបចំផែនការធ្វើបាតុកម្មនេះ។
ភាពចលាចល ដែលបានបញ្ឆេះដោយការស្លាប់របស់នារីវ័យក្មេងម្នាក់នៅក្នុងការឃុំឃាំងរបស់ប៉ូលិសសីលធម៌របស់អ៊ីរ៉ង់ កំពុងផ្ទុះឡើងនៅទូទាំងប្រទេសសម្រាប់សប្តាហ៍ទីបីបើទោះបីជាមានកិច្ចខិតខំប្រឹងប្រែងរបស់រដ្ឋាភិបាលក្នុងការបង្ក្រាបក៏ដោយ។
កាលពីថ្ងៃចន្ទ អ៊ីរ៉ង់បានបិទសាកលវិទ្យាល័យបច្ចេកវិជ្ជាកំពូលរបស់ខ្លួនបន្ទាប់ពីការប្រឈមមុខដាក់គ្នាអស់ជាច្រើនម៉ោងរវាងនិស្សិតនិងប៉ូលិសដែលបានប្រែក្លាយស្ថាប័នដ៏មានកិត្យានុភាពមួយនេះទៅជាចំណុចចុងក្រោយនៃការតវ៉ា ហើយបានបញ្ចប់ដោយមនុស្សវ័យក្មេងរាប់រយនាក់ត្រូវបានចាប់ខ្លួន។
ថ្លែងទៅកាន់កម្មាភិបាលនិស្សិតប៉ូលិសនៅទីក្រុងតេហេរ៉ង់ លោកខាមេនីបាននិយាយថា គាត់មានការខូចចិត្តយ៉ាងខ្លាំងចំពោះការស្លាប់របស់នាង ម៉ាសា អាមីនី (Mahsa Amini) អាយុ ២២ ឆ្នាំនៅក្នុងមន្ទីរឃុំឃាំងរបស់ប៉ូលិស ដោយហៅវាថាជា “ឧបទ្ទវហេតុសោកនាដកម្ម”។ ទោះយ៉ាងណា លោកបានថ្កោលទោសការតវ៉ានេះថាជាផែនការបរទេសដើម្បីធ្វើឱ្យអស្ថិរភាពអ៊ីរ៉ង់ដោយបន្ទរតាមមតិយោបល់ពីមុនៗរបស់អាជ្ញាធរ។
លោកបាននិយាយថា “កុបកម្មនេះត្រូវបានគ្រោងទុក។ កុបកម្មនិងអសន្តិសុខទាំងនេះត្រូវបានរៀបចំឡើងដោយអាម៉េរិកនិងរបបអ៊ីស្រាអែល និងបុគ្គលិករបស់ពួកគេ”។
ទន្ទឹមនឹងនេះដែរ សាកលវិទ្យាល័យបច្ចេកវិជ្ជាសារីហ្វ (Sharif University of Technology) ក្នុងទីក្រុងតេអេរ៉ង់បានប្រកាសថាមានតែនិស្សិតថ្នាក់បណ្ឌិតប៉ុណ្ណោះនឹងត្រូវបានអនុញ្ញាតនៅក្នុងបរិវេណសាលា រហូតដល់មានការជូនដំណឹងបន្ថែម បន្ទាប់ពីមានភាពចលាចលជាច្រើនម៉ោងកាលពីថ្ងៃអាទិត្យ នៅពេលដែលសាក្សីនិយាយថាក្រុមអ្នកតវ៉ាប្រឆាំងរដ្ឋាភិបាលបានប៉ះទង្គិចជាមួយនិស្សិតដែលគាំទ្ររដ្ឋាភិបាល៕
មេដឹកនាំកំពូលរបស់អ៊ីរ៉ង់ លោក អាយ៉ាតូលឡា អាលី ខាមេនី ថ្លែងទៅកាន់កម្មាភិបាលនិស្សិតប៉ូលិសនៅទីក្រុងតេហេរ៉ង់កាលពីថ្ងៃចន្ទ