Views: 8
ដោយៈ ប.ខុន / ភ្នំពេញៈ មន្ទីរធនធានទឹក និងឧតុនិយម ខេត្តបន្ទាយមានជ័យ បញ្ចេញគ្រឿងចក្រ ចុះជីកកាយបើកផ្លូវទឹក ចំនួន ៣ កន្លែង ដែលគេបានចាក់ដីលប់ នាំឱ្យរាំងស្ទះចរន្តទឹក បណ្តាលឱ្យមាន ការជន់លិចច្រើនថ្ងៃ នៅឃុំលៀប ស្រុកព្រះនេត្រព្រះ ហើយពេលនេះ ក្រុមការងារ កំពុងបន្តចុះពិនិត្យផ្លូវទឹក ដែលរាំងស្ទះ ដោយសារគេចាក់ដីលប់ ដើម្បីបើកផ្លូវទឹក ជាបន្ត។
លោក យឹម ប៊ុនរ៉ុម ប្រធានមន្ទីរធនធានទឹក និងឧតុនិយម ខេត្តបន្ទាយជ័យ បានប្រាប់ឱ្យ រស្មីកម្ពុជាដឹង នៅព្រឹកថ្ងៃទី៥ ខែតុលា ឆ្នាំ២០២២ថាៈ ក្រោយពីបានដាក់គ្រឿងចក្រ ចុះជីកកាយផ្លូវទឹក ដែលគេបានចាក់លប់ចំនួនបីកន្លែង នៅក្នុងឃុំភ្នំលៀប ស្រុកព្រះនេត្រព្រះ កាលពីយប់ថ្ងៃទី៤ ខែតុលា រួចមក ឃើញថា ចន្តទឹកហូរចុះទៅកាន់បឹងទន្លេសាប នៅព្រឹក ថ្ងៃទី៥ តុលា មានល្បឿនលឿន ធ្វើឱ្យទឹកដែលបានជន់លិច នៅផ្នែកខាងលើផ្លូវជាតិលេខ៦ ច្រើនថ្ងៃមកហើយ ចាប់ផ្តើមស្រកលឿន។
លោកប្រធានមន្ទីរធនធានទឹកខេត្ត ខាងលើ បាននិយាយឱ្យដឹងទៀតថាៈ ទឹកជំនន់នៅប៉ែក ខាងលើផ្លូវជាតិលេខ៦ លិចខ្លាំង និងស្រកចុះយឺតនេះ ដោយសារផ្លូវទឹកឆ្លងកាត់ផ្លូវជាតិ លេខ៦ ចូលទៅបឹងទន្លេសាប មានកម្រិត ធ្វើឱ្យដោះទឹកមិនទាន់ពេល មានភ្លៀងធ្លាក់ច្រើន ជាបន្តបន្ទាប់ ដូចពេលកន្លងទៅនេះ ។ ក្រៅពីផ្លូវដោះទឹក មានកម្រិត ផ្លូវទឹកមួយចំនួនទៀត ត្រូវបានគេចាក់ដីលប់ ធ្វើឱ្យទឹកហូរចុះទៅកាន់បឹងទន្លេសាប កាន់តែយឺតថែមទៀត។
លោក យឹម ប៊ុនរ៉ុម បានបញ្ជាក់ថាៈ ពេលនេះ ក្រុមការងារ កំពុងបន្តពិនិត្យមើលផ្លូវទឹក ចុះទៅកាន់បឹងទន្លេសាប ទាំងផ្នែកខាងលើផ្លូវជាតិ ក៏ដូចជាផ្នែកខាងក្រោមផ្លូវជាតិ ដើម្បីជីកកាយបើកសម្រួលផ្លូវទឹកឡើងវិញ នៅកន្លែងណាដែលគេបានចាក់ដីលប់ ឱ្យទឹកហូរបានលឿន។ ចំពោះស្ថានភាពទឹកជំនន់ទូទៅ នៅក្នុនខេត្តបន្ទាយមានជ័យ បន្ទាប់ពីមានភ្លៀងធ្លាក់ច្រើនជាប់ៗគ្នា មានទឹកច្រើន នៅវាលសែសិន ក្រុងសិរីសោភ័ណ និងមានទឹកលិចផ្លូវលំ ក្នុងភូមិ តែពេលនេះ ទឹកបានស្រកចុះបណ្តើៗ ទាំងនៅតាមផ្លូវជាតិលេខ៦ ផងដែរ៕ V / N