Views: 6
ប្រែសម្រួលៈបំណង(ដេល្លីម៉េល)៖ នាវាដឹកគ្រាប់ពោតរាប់ពាន់តោនចំនួនបីគ្រឿងបានចាកចេញពីកំពង់ផែអ៊ុយក្រែន នេះបើតាមការបញ្ជាក់ពីមន្ត្រីកាលពីថ្ងៃសុក្រ នៅក្នុងសញ្ញាចុងក្រោយមួយដែលបង្ហាញថាកិច្ចព្រមព្រៀងមួយដែលសម្របសម្រួលឡើងដោយអង្គការសហប្រជាតិសំរាប់នាំចេញគ្រាប់ធញ្ញជាតិដែលជាប់ក្នុងប្រទេសពីអ៊ុយក្រែនចាប់តាំងពីរុស្ស៊ីបើកប្រតិបត្តិការយោធាចូលក្នុងប្រទេសនេះកាលពីជិត៦ខែមុនកំពុងលេចចេញជារូបរាងបណ្តើរៗ។
តែឧបសគ្គធំៗនៅរង់ចាំមុនស្បៀងទាំងនេះទៅដល់ប្រទេសដែលត្រូវការវាបំផុត។
នាវាដឹកពោតទាំងនេះធ្វើដំណើរទៅកាន់អៀងឡង់ អង់គ្លេសនិងតួកគី ក្រោយនាវាដឹកជញ្ជូនគ្រាប់ធញ្ញជាតិទីមួយបានឆ្លងកាត់សមុទ្រខ្មៅចាប់តាំងពីពេលចាប់ផ្តើមសង្គ្រាម។នាវាធ្វើដំណើរទីលីបង់នេះជានាវាទីមួយដែលបានឆ្លងកាត់ការត្រួតពិនិត្យជាច្រើនក្រោមកិច្ចព្រមព្រៀងសម្របសម្រួលដោយអង្គការសហប្រជាជាតិ និងតួកគី ជាមួយរុស្ស៊ីនិងអ៊ុយក្រែន។
តំបន់សមុទ្រខ្មៅនេះត្រូវបានគេផ្តល់ងារជាកន្ត្រកនំប៉័ងរបស់ពិភពលោក ដោយសាររុស្ស៊ីនិងអ៊ុយក្រែនជាអ្នកផ្គត់ផ្គង់ស្រូវសាឡី ពោត ស្រូវបាឡេនិងប្រេងឆាធ្វើពីផ្កាឈូករ័ត្នដ៏សំខាន់លើលោកដែលប្រជាជនក្រីក្ររាប់លាននាក់នៅអាហ្វ្រិក មជ្ឈិមបូព៌ានិងផ្នែកខ្លះនៃអាស៊ីត្រូវការវាដើម្បីរស់។
នាវាដឹកគ្រាប់ធញ្ញជាតិ Razoniឆ្លងកាត់ច្រកសមុទ្របូសហ្វ័ររូសនៅទីក្រុងអ៊ីស្តាន់ប៊ុលកាលពីថ្ងៃ៣សីហា ។វាជានាវាដឹកគ្រាប់ធញ្ញជាតិដំបូងដែលបានចាកចេញពីកំពង់ផែអ៊ុយក្រែនចាប់តាំងពីរុស្ស៊ីបើកការវាយលុកចូលអ៊ុយក្រែនកាលពីជិត៦ខែមុន
គ្រាប់ពោតជាង៥៨.០០០តោនដឹកតាមនាវាបីដែលបានចេញដំណើរកាលពីថ្ងៃសុក្រ ជាផ្នែកមួយនៃគ្រាប់ធញ្ញជាតិប្រមាណ២០តោនដែលអ៊ុយក្រែនអះអាងថាជាប់នៅតាមកំពង់ផែរបស់ខ្លួនដោយសារតែសង្គ្រាមរបស់រុស្ស៊ី។គ្រាប់ធញ្ញជាតិដែលជាប់នៅកំពង់ផែប្រមាណ៦លានតោនជាស្រូវសាឡី តែត្រឹមពាក់កណ្តាលប៉ុណ្ណោះសំរាប់មនុស្សប្រើប្រាស់ជាអាហារ។
សូមបញ្ជាក់ថា ថ្លៃស្បៀងនៅលើពិភពលោកបានកើនឡើងដោយសារតែសង្គ្រាមនៅអ៊ុយក្រែន ។ពោតបានឡើងជាង៧០ភាគរយ និងស្រូវសាឡីឡើងប្រមាណ៦០ភាគរយធៀបនឹងថ្លៃកាលពីខែកុម្ភៈឆ្នាំ២០២០។ហេតុផលមួយទៀតនាំអោយគ្រាប់ធញ្ញជាតិឡើងថ្លៃគឺ ការរាំងស្ងួតប៉ះពាល់ការធ្វើកសិកម្មនៅអាម៉េរិកខាងជើង ចិននិងតំបន់ដទៃទៀត ព្រមទាំងការឡើងថ្លៃជីរគីមីដែលត្រូវការសំរាប់កសិកម្ម៕
នាវាNavi-Star ដឹកគ្រាប់ពោតចេញពីកំពង់ផែអូដេសា របស់អ៊ុយក្រែនកាលពីថ្ងៃសុក្រទី៥សីហា
