Views: 1
នាយឧត្តមសេនីយ៍ សៅ សុខា បញ្ជាឲ្យឃាត់ខ្លួនមន្ត្រីអាវុធហត្ថខេត្តកំពង់ធំ ដែលធ្វើឱ្យ ពលរដ្ឋម្នាក់ស្លាប់ នៅពេលចុះបង្ក្រាបទីតាំង ហាងកាហ្វេ ជល់មាន់ អនឡាញ
ដោយៈ មុនី រ័ត្ន / ភ្នំពេញៈ នាយឧត្តមសេនីយ៍ សៅ សុខា មេបញ្ជាការ កងរាជអាវុធហត្ថ លើផ្ទៃប្រទេស បានបញ្ជាឲ្យស្នងការ ស្នងការដ្ឋានស្រាវជ្រាវ និងបង្ក្រាបបទល្មើស ចុះទៅធ្វើ អធិការកិច្ច ត្រួតពិនិត្យ រកឲ្យឃើញអំពីមូលហេតុពិត ដែលកងរាជអាវុធហត្ថខេត្តកំពង់ធំ បានធ្វើឱ្យប្រជាពលរដ្ឋម្នាក់ស្លាប់ នៅពេលចុះបង្ក្រាបទីតាំងហាង កាហ្វេជល់មាន់ អនឡាញ។
ការបញ្ជាបែបនេះ បានត្រូវធ្វើឡើង នៅថ្ងៃទី៩ ខែសីហា ឆ្នាំ២០២២ នេះ បន្ទាប់ពីមានសារព័ត៌មាន និងក្រុមគ្រួសារជនរងគ្រោះ បានផ្សព្វផ្សាយ អំពីករណីកម្លាំងអាវុធហត្ថខេត្តកំពង់ធំ ចុះបង្ក្រាបទីតាំងហាងកាហ្វេ ជល់មាន់ អនឡាញ មួយកន្លែង ស្ថិតនៅភូមិរូង ឃុំក្រវ៉ា ស្រុកបារាយណ៍ ខេត្តកំពង់ធំ កាលពីល្ងាចថ្ងៃទី៧ ខែសីហា ឆ្នាំ២០២២ ហើយបានឃាត់ខ្លួនជនរងគ្រោះ ចាប់ដាក់រថយន្ត យកទៅទីបញ្ជាការដ្ឋាន កងរាជអាវុធហត្ថខេត្តកំពង់ធំ ប៉ុន្តែពេលធ្វើដំណើរតាមផ្លូវ ជនរងគ្រោះ មានអាការៈមិនស្រួលខ្លួន ក៏បានបណ្តាលឲ្យស្លាប់តែម្តង។