Views: 2
ដោយ: ចាន់តូ / ភ្នំពេញ: ជនសង្ស័យលួចម្នាក់ ត្រូវបានកម្លាំងនគរបាលព្រហ្មទណ្ឌ កំរិតស្រាលនៃស្នងការនគរបាលរាជធានីភ្នំពេញស្រាវជ្រាវ ឃាត់ខ្លួន និងកសាងសំនុំរឿងបញ្ជូន ទៅកាន់សាលាដំបូងរាជធានីភ្នំពេញកាលពីព្រឹកថ្ងៃទី១១ ខែ សីហា ឆ្នាំ ២០២២នេះដើម្បីចាត់ការតាមច្បាប់។
ជនសង្ស័យ រូបនោះ ត្រូវបាននគរបាលអោយដឹងថា ឈ្មោះ លាក់ រ័ត្នធា ភេទប្រុសអាយុ ២៥ឆ្នាំ ស្នាក់នៅផ្ទះជួល ផ្លូវលេខ ៨៦ សង្កាត់ស្រះចកខណ្ឌដូនពេញ រាជធានីភ្នំពេញ។
តាមនគរបាលព្រហ្មទណ្ឌកំរិតស្រាល បានអោយដឹងថា ជនសង្ស័យ រូបនោះត្រូវបានកម្លាំងសមត្ថកិច្ច ឃាត់ខ្លួន កាលពីរសៀល ថ្ងៃទី០៩ ខែសីហា ឆ្នាំ២០២២ នៅចំណុចស្តុប បឹងកក់ ផ្លូវលេខ ៧០ សង្កាត់ទួលសង្កែទី១ ខណ្ឌឬស្សីកែវ ពីបទលួច ម៉ូតូម៉ាកហុងដា សេ១២៥ ពណ៌ខ្មៅមួយគ្រឿង ពាក់ស្លាកលេខ ភ្នំពេញ១GZ៧០៨៨ កាលពីរសៀល ថ្ងៃទី៣០ ខែកក្កដា ឆ្នាំ ២០២២នៅចំណុច មុខ ហាងលក់ទូរស័ព្ទដៃតាមផ្លូវបេតុង ក្នុងភូមិ ទួលសង្កែសង្កាត់ទួលសង្កែ១ ខណ្ឌឫស្សីកែវ។
តាមនគរបាលអោយដឹងទៀតថា នៅថ្ងៃកើតហេតុ ជនរងគ្រោះឈ្មោះកេត សុខកែម ភេទប្រុសអាយុ ៣៧ឆ្នាំមុខ របរជាងជួសជុលរថយន្ត បានជិះម៉ូតូមួយគ្រឿង ខាងលើ មកឈប់រួចចូលហាងទូរស័ព្ទ ដោយទុកសោជាប់ម៉ូតូ។ខណះនោះ ស្រាប់តែជនសង្ស័យ ធ្វើដំណើរដោយថ្មើរជើង មកពីសង្កាត់ស្រះចក រួច លួចយកម៉ូតូជិះគេចខ្លួនបាត់។ តាមរយះ កាម៉េរ៉ាសុវត្តិភាព រំលងបានប្រមាណ១០ថ្ងៃសមត្ថកិច្ចនគរបាលព្រហ្មទណ្ឌកំរិតស្រាល ក៍បានស្រាវជ្រាវ ឈានទៅឃាត់ខ្លួនជនសង្ស័យ ព្រមទាំងដកហូតបានម៉ូតូ ប្រគល់អោយម្ចាស់វិញ ហើយ ជនសង្ស័យ ត្រូវបានកសាងសំនុំរឿងបញ្ចូន ទៅកាន់សាលាដំបូងរាជធានីភ្នំពេញដើម្បីចាត់ការតាមច្បាប់នៅពេលនេះ៕
