Views: 1
ប្រែសម្រួល : កញ្ញាដាលីស (ដេល្លីម៉េល) ៖ អ្នកនឹងពិបាកស្វែងរកប្រទេសណាដែលមានមោទនភាពខ្លាំងចំពោះអាហារនិងវប្បធម៌របស់ខ្លួនជាងបារាំងនោះឡើយ។កាលពីថ្ងៃទី៣០វិច្ឆិកា ពួកគេមានហេតុផលគ្រប់យ៉ាងចំពោះមោទនភាពនេះ បន្ទាប់ពីនំប៉័ងបារាំងត្រូវបានផ្តល់ឋានៈជាសម្បត្តិបេតិកភណ្ឌពិសេសរបស់អង្គការយូណេស្កូ។
នំប៉័ងបារាំង ដែលមានន័យត្រង់ថា Wand (នំប៉័ងវែង) និងត្រូវបានប្រសិទ្ធនាមថា “២៥០ ក្រាមនៃវេទមន្តនិងភាពល្អឥតខ្ចោះ” ដោយលោក អេមម៉ានុយអែល ម៉ាក្រុងគឺជានិមិត្តរូបមួយតំណាងឱ្យប្រទេសបារាំង។
ហើយពួកអ្នកជំនាញដែលប្រមូលផ្តុំគ្នានៅប្រទេសម៉ារ៉ុកក្នុងសប្តាហ៍នេះបានសម្រេចថា នំប៉័ងបារាំងដ៏សាមញ្ញ ដែលផលិតចេញតែពីម្សៅ ទឹក អំបិល និងមេសមនឹងទទួលបានការទទួលស្គាល់ពីអង្គការសហប្រជាជាតិ។
អង្គការយូណេស្កូបានបោះឆ្នោតដើម្បីបញ្ចូល “ចំណេះធ្វើនៃសិល្បៈនិងវប្បធម៌នំបុ័ងបារាំង” នៅក្នុងបញ្ជីបេតិកភណ្ឌវប្បធម៌អរូបី ដែលរួមបញ្ចូលប្រពៃណីប្រហែល ៦០០ រួចហើយពីជាង ១៣០ ប្រទេស។
ឋានៈនេះមិនមានលទ្ធភាពការពារពិសេសណាមួយចំពោះនំប៉័ងបារាំងទេ ប៉ុន្តែត្រូវបានបញ្ចូលទៅក្នុងបញ្ជីដើម្បី”ជួយបង្ហាញពីភាពចម្រុះនៃបេតិកភណ្ឌនិងលើកកម្ពស់ការយល់ដឹងអំពីសារៈសំខាន់របស់វា”។
បារាំងបានសម្រេចចិត្តដាក់នំប៉័ងទៅគណៈកម្មការយូណេស្កូ បន្ទាប់ពីបានឃើញភីហ្សាពីទីក្រុងនេផល (Naples) ទទួលបានឋានៈពិសេសដោយលោកម៉ាក្រុងបានប្រកាសថា”នំប៉័ងវែងធ្វើឱ្យពិភពលោកទាំងមូលច្រណែន”។
លោកបានបន្ថែមថា “ឧត្តមភាពនិងជំនាញត្រូវតែរក្សាទុក ហើយនោះជាមូលហេតុដែលវាគួរតែត្រូវបានចុះបញ្ជីបេតិកភណ្ឌ”។
ប្រធានអង្គការយូណេស្កូ លោក អូឌ្រេ អាហ្ស៊ូឡាយ (Audrey Azoulay) បាននិយាយថា “ខ្លួនសាទររបៀបរស់នៅរបស់ជនជាតិបារាំង ៖ នំប៉័ងគឺជាពិធីប្រចាំថ្ងៃដែលជាធាតុផ្សំនៃរចនាសម្ពន្ធនៃអាហារ ដែលមានន័យដូចគ្នាទៅនឹងការចែករំលែកនិងការរស់រានមានជីវិត”។
“វាមានសារៈសំខាន់ដែលជំនាញនិងទម្លាប់សង្គមទាំងនេះបន្តកើតមាននាពេលអនាគត”។
នំប៉័ងបារាំង ដែលមានរាងវែងរលើបរលោងប្រហោងក្នុង សំបកក្រាស់តែស្រួយ គឺជាផ្នែកដ៏សំខាន់នៃរបបអាហាររបស់បារាំងយ៉ាងហោចណាស់ ១០០ ឆ្នាំរួចមកហើយ ទោះបីជាអ្នកខ្លះជឿថានំប៉័ងមានអាយុកាលយូរជាងនេះក៏ដោយ៕
នំប៉័ងបារាំងជាប់ជាសម្បត្តិបេតិកភណ្ឌវប្បធម៌អរូបី
