Views: 1
ដោយៈទេពកង្រី/កំពង់ឆ្នាំងៈ ក្រោយពីធ្វើការពិនិត្យស្ថានភាពលំនៅដ្ឋានរបស់បងប្អូនប្រជាពលរដ្ឋដែលលិចលង់ដោយជំនន់ទឹកភ្លៀងនៅក្នុងភូមិរ៉ា ឃុំត្បែងខ្ពស់ ស្រុកសាមគ្គីមានជ័យ ខេត្តកំពង់ឆ្នាំង នៅរសៀលថ្ងៃទី១៣ ខែមករា ឆ្នាំ២០២៣ ប្រជាពលរដ្ឋចំនួន ៩៣ គ្រួសារស្មើនឹង ៤៥២នាក់ ក៏ត្រូវបានជម្លៀសមកកាន់ទីទួលមានសុវត្ថិភាពនៅក្នុងបរិវេណវត្តត្បែងខ្ពស់។
ប្រតិបត្តិការនេះបានដឹកនាំដោយលោកស្រី កែវ ចាន់មុនីអ្នកតំណាងរាស្ត្រមណ្ឌលខេត្តកំពង់ឆ្នាំង លោក ឈឹម សៅគី រដ្ឋលេខាធិការក្រសួងអភិវឌ្ឍន៍ជនបទ និងជាប្រធានក្រុមការងារថ្នាក់កណ្ដាលចុះជួយមូលដ្ឋានឃុំត្បែងខ្ពស់ អភិបាលខេត្តកំពង់ឆ្នាំងលោក ស៊ុន សុវណ្ណារិទ្ធ ព្រមទាំងកម្លាំងសមត្ថកិច្ច ក្រុមការងារអាជ្ញាធរមូលដ្ឋានកងកម្លាំងទាំងបីប្រភេទ និងកម្លាំងអន្តរាគមន៍របស់កងពលលេខ១ និងប្រជាការពារកម្លាំងយុវជនស.ស.យ.ក។
ក្រោយការជម្លៀសប្រជាពលរដ្ឋមកដល់ទីទួលរសុវត្ថិភាពរួចអ្នកតំណាងរាស្ត្រមណ្ឌលកំពង់ឆ្នាំងលោកជំទាវកែវចាន់មុន្នីឯកឧត្តមគណៈអភិបាលខេត្តកំពង់ឆ្នាំងលោកស៊ុនសុវណ្ណារិទ្ធនិងលោក ឈឹមសៅគី បានធ្វើការអំពាវនាវដល់ប្រជាពលរដ្ឋទាំងអស់សូមថែរក្សាសុខភាពឱ្យបានល្អត្រូវពិសាទឹកស្អាតនិងដាំអោយឆ្អិនដែលមិនបង្កឲ្យកើតមានបញ្ហាផ្សេងៗលើសុខភាព ពិសេសត្រូវមានការប្រុងប្រយ័ត្នចំពោះកូនៗតូចៗកុំឲ្យលេងទឹកក្រែងលង់ទឹកក្នុងប្រការណាមួយជាយក្សថាហេតុ។
លោកអភិបាលខេត្តកំពង់ឆ្នាំង អ្នកតំណាងរាស្ត្រមណ្ឌលកំពង់ឆ្នាំងរដ្ឋលេខាធិការក្រសួងអភិវឌ្ឍន៍ជនបទ ថែមទាំងបានពាំនាំនូវការសាកសួរសុខទុក្ខពីសំណាក់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា សម្ដេចព្រឹកបណ្ឌិតប៊ុនរ៉ានី ហ៊ុន សែន ប្រធានកាកបាទក្រហមកម្ពុជា ជូនចំពោះបងប្អូនប្រជាពលរដ្ឋទាំងអស់ដែលជួបប្រទះនូវគ្រោះធម្មជាតិជំនន់ទឹកភ្លៀងលិចលង់ផ្ទះសំបែងខូចខាតទ្រព្យសម្បត្តិផ្សេងៗក្នុងរដូវប្រាំងនេះ។
នាឱកាសនោះ ក្រុមការងារក៏បានចែកជូនស្បៀងអាហារផ្សេងៗដល់គ្រួសាររងគ្រោះខាងលើក រួមមាន អង្ករ មី ទឹកត្រី ទឹកស៊ីវ ក្រម៉ា និងថ្នាំពេទ្យ ក្នុងនោះអ្នកតំណាងរាស្ត្រមណ្ឌលកំពង់ឆ្នាំងរួម និងអភិបាលខេត្តកំពង់ឆ្នាំងបានឧបត្ថម្ភថវិកាមួយចំនួនដល់កងកម្លាំងអន្តរាគមន៍សង្គ្រោះបន្ទាន់ កងកម្លាំងទាំងបីប្រភេទ និងប្រជាពលរដ្ឋដែលកំពុងជួបគ្រោះធម្មជាតិនោះផងដែរ។
លោក ដោកប៊ុនថុន ប្រធានមន្ទីរធនធានទឹក និងឧុតុនិយមខេត្តកំពង់ឆ្នាំងបានបញ្ជាក់ឲ្យដឹងនៅវេលាម៉ោង ១:២៩ នាទីថ្ងៃទី ១៤ មករា ២០២៣ នេះថាស្ថានភាពទឹកនៅប៉ែកខាងលើផ្លូវជាតិត្រូវបានស្រកចុះមកហើយ តែនៅស្ទឹងជ្រៃបាក់ទឹកកំពុងតែហក់ឡើងវាក៏អាចហូរចុះទៅទន្លេវិញរយៈពេលពីរបីថ្ងៃខាងមុខនេះស្រកអស់ហើយ៕/R
