Views: 2
ប្រែសម្រួល : កញ្ញាដាលីស (ដេល្លីម៉េល) ៖ ជនជាតិប្រេស៊ីលម្នាក់ដែលអះអាងថាជាបុរសចាស់ជាងគេបំផុតរបស់ពិភពលោកបានប្រារព្ធខួបគម្រប់អាយុ ១២២ របស់គាត់គឺមួយឆ្នាំគត់បន្ទាប់ពីបានយកឈ្នះលើកូវីដ១៩ ហើយគ្រួសាររបស់គាត់និយាយថាគាត់ “នៅតែមាំមួន”។
លោក អង់ដ្រេលីណូ វីរ៉ា ដា ស៊ីលវ៉ា (Andrelino Vieira da Silva) ដែលរស់នៅក្នុងទីក្រុងអាផារីស៊ីដាដេហ្គោយ៉ានៀ (Aparecida de Goiania) ក្នុងរដ្ឋហ្គោយ៉ាស (Goias) ប្រទេសប្រេស៊ីល កើតនៅថ្ងៃទី ៣ ខែកុម្ភៈ ឆ្នាំ ១៩០១ នេះបើយោងតាមអត្តសញ្ញាណប័ណ្ណរបស់គាត់។
និវត្តជន ដែលមានចៅ ១៣ នាក់ ចៅទួត ១៦ នាក់ និងចៅលួតម្នាក់ បានប្រារព្ធខួបកំណើតដ៏សំខាន់បំផុតរបស់គាត់កាលពីដើមខែនេះ។
ប្រសិនបើអត្តសញ្ញាណប័ណ្ណរបស់គាត់គឺជាការពិត នោះមានន័យថាគាត់មានអាយុ ១២២ ឆ្នាំ ដែលធ្វើឱ្យគាត់ក្លាយជាមនុស្សចាស់ជាងគេក្នុងពិភពលោក។ ទោះយ៉ាងណាលោកស៊ីលវ៉ាមិនបានព្យាយាមផ្ទៀងផ្ទាត់អាយុរបស់គាត់ជាមួយនឹងអង្គការកំណត់ត្រាពិភពលោកហ្គីនណេសនោះទេ។
កំណត់ត្រាផ្លូវការបច្ចុប្បន្នត្រូវបានរក្សាដោយលោកយាយ ម៉ារៀ ប្រានយ៉ាស ម៉ូរេរ៉ា (Maria Branyas Morera) កើតនៅសាន់ហ្វ្រាន់ស៊ីស្កូ អាយុ ១១៥ ឆ្នាំ ដែលបានទទួលងារនេះ បន្ទាប់ពីដូនជីជនជាតិបារាំងឈ្មោះ អង់ដ្រេ (André) អាយុ ១១៨ ឆ្នាំបានស្លាប់កាលពីដើមឆ្នាំនេះ៕
លោក អង់ដ្រេលីណូ វីរ៉ា ដា ស៊ីលវ៉ា អបអរខួបកំណើតគម្រប់ ១២២ ឆ្នាំរបស់គាត់កាលពីថ្ងៃទី០១ កុម្ភៈ ឆ្នាំ២០២៣