Views: 3
ប្រែសម្រួលៈបំណង(rfi.)៖រដ្ឋមន្ត្រីការពារជាតិអាល្លឺម៉ង់កាលពីថ្ងៃពុធទី១កុម្ភៈ បានធ្វើពិធីលារថក្រោះដែលរដ្ឋាភិបាលទីក្រុងប៊ែរឡាំងត្រូវប្រគល់អោយអ៊ុយក្រែន តែក៏ជាការកត់សំគាល់ការបាត់បង់សំរាប់កងកម្លាំងប្រដាប់អាវុធអាល្លឺម៉ង់ដែលបំពាក់គ្រឿងសព្វាវុធមិនជាធំដុំ។
ការប្រគល់រថក្រោះដែលត្រូវបានប្រកាសកាលពីសប្តាហ៍មុនមានភាពចាំបាច់ដើម្បីអោយ«អ៊ុយក្រែនឈ្នះសង្គ្រាម» នេះបើតាមរដ្ឋមន្ត្រីការពារជាតិបូរីស ពីស្តូរីយូស( Boris Pistorius)បាននិយាយពេលលោកចុះទៅកាន់បន្ទាយយោធាមួយនៅទីក្រុងអរហ្គូសដហ្វ(Augustdorf)។
ជាមួយនឹងទាហាន៥៥០នាក់ប្រចាំការក្នុងបន្ទាយនេះ ការបាត់បង់រថក្រោះខ្លារខិនLeopard 2ចំនួន១៤គ្រឿងធ្វើអោយពួកគេមានអារម្មណ៍ចង់ស្រក់ទឹកភ្នែក នេះបើតាមការបញ្ចេញអោយដឹងពីលោក ពីស្តូរីយូស។លោកបាននិយាយថា«បេះដូងរបស់គេស្ទើរប្រេះដោយសារតែបាត់បង់រថក្រោះទាំងនេះ តែពួកគេយល់ថាផ្លូវទៅអ៊ីចឹងហើយគ្មានអ្វីអាចរារាំងបានទេ។អ៊ុយក្រែនត្រូវការរាល់ការគាំទ្រដែលយើងអាចផ្តល់អោយ។ខ្ញុំមានបេះដូងពីរចំណែក មួយទទួលខុសត្រូវសំរាប់កងទ័ពអាល្លឺម៉ង់និងមួយទៀតសំរាប់កងទ័ពអ៊ុយក្រែន»។
អាល្លឺម៉ង់ឥឡូវមានបំណងប្រគល់រថក្រោះអោយអ៊ុយក្រែននៅចុងខែក្រោយ ឬក៏ដើមខែមេសា ជាផ្នែកមួយនៃការសន្យារបស់ប្រទេសក្នុងសម្ពន្ធមិត្តថានឹងផ្តល់អោយអ៊ុយក្រែននូវរថក្រោះប្រយុទ្ធធុននេះ១២០ទៅ១៤០គ្រឿង។តែមុនពេលពួកវាទៅដល់សមរភូមិ ទាហានអ៊ុយក្រែនត្រូវរៀនប្រើនិងថែទាំជួសជុលរថក្រោះទំនើបបំផុតទាំងនេះជាមុន ហើយការហ្វឹកហាត់ប្រើដ៏ខ្លាំងនឹងចាប់ផ្តើមនៅបីបួនថ្ងៃទៀតនៅក្នុងប្រទេសអាល្លឺម៉ង់៕
ក្រសួងការពារជាតិអាល្លឺម៉ង់សន្យាប្រគល់រថក្រោះLeopardដល់អ៊ុយក្រែនអោយបានលឿន តែទាហានអ៊ុយក្រែនត្រូវរៀនប្រើរថក្រោះទំនើបទាំងនេះជាមុនហើយវាអាចចំណាយពេលប្រាំមួយសប្តាហ៍
រដ្ឋមន្ត្រីការពារជាតិបូរីស ពីស្តូរីយូស ឈរក្បែររថក្រោះLeopard 2
