Views: 11
ប្រែសម្រួល : កញ្ញាដាលីស (ដេល្លីម៉េល) ៖ ក្នុងពេលឆាប់ៗនេះ សហរដ្ឋអាម៉េរិកនឹងប្រគល់ប្រព័ន្ធរ៉ុក្កែតទំនើបចំនួនបួនបន្ថែមទៀតដល់អ៊ុយក្រែន ដែលគេសរសើរថាបានជួយយោធារបស់ប្រទេសនេះក្នុងការទទួលបានសន្ទុះឈ្នះក្នុងសង្គ្រាមជាមួយរុស្ស៊ី។
យោងតាមមន្ត្រីអាម៉េរិក ប្រព័ន្ធរ៉ុក្កែត HIMARS នឹងក្លាយជាផ្នែកមួយនៃកញ្ចប់ជំនួយថ្មីតម្លៃ ៦២៥ លានដុល្លារ ដែលរំពឹងប្រកាសនៅថ្ងៃអង្គារនេះ។
ការសម្រេចចិត្តនេះគឺជាលើកទីមួយហើយដែលសហរដ្ឋអាម៉េរិកបានបញ្ជូនប្រព័ន្ធរ៉ុក្កែត HIMARS បន្ថែមទៀតទៅកាន់អ៊ុយក្រែនចាប់តាំងពីចុងខែកក្កដាហើយវានឹងធ្វើឱ្យចំនួនសរុបដែលបានបញ្ជូនទៅមកទល់ពេលនេះកើនដល់ ២០គ្រឿង។ ប្រព័ន្ធទាំងនេះបានក្លាយជាឧបករណ៍សំខាន់នៅក្នុងសមត្ថភាពរបស់អ៊ុយក្រែនក្នុងការវាយលុកស្ពានដែលរុស្ស៊ីបានប្រើប្រាស់ដើម្បីផ្គត់ផ្គង់កងទ័ពរបស់ខ្លួន ដោយអនុញ្ញាតឱ្យកងកម្លាំងអ៊ុយក្រែនធ្វើដំណើរតាមផ្លូវចូលទៅក្នុងតំបន់ដែលគ្រប់គ្រងដោយរុស្ស៊ី។
សហរដ្ឋអាម៉េរិកក្នុងប៉ុន្មានសប្តាហ៍ថ្មីៗនេះក៏បានផ្តល់មូលនិធិតាមរយៈកម្មវិធីដាច់ដោយឡែកមួយផងដែរ គឺ គំនិតផ្តួចផ្តើមជំនួយសន្តិសុខអ៊ុយក្រែន (USAI)ដូច្នេះប្រព័ន្ធរ៉ុក្កែត HIMARS ចំនួន ១៨ ផ្សេងទៀតអាចត្រូវបានទិញតាមរយៈកិច្ចសន្យារយៈពេលវែង។ មូលនិធិ USAI កំពុងត្រូវបានប្រើប្រាស់ជាផ្នែកនៃកិច្ចខិតខំប្រឹងប្រែងដោយសហរដ្ឋអាម៉េរិកនិងសម្ពន្ធមិត្តលោកខាងលិចដើម្បីធានាថាកងកម្លាំងរបស់អ៊ុយក្រែនត្រូវបានបណ្តុះបណ្តាលនិងបំពាក់អាវុធដើម្បីការពារប្រទេសរបស់ពួកគេក្នុងឆ្នាំខាងមុខ។ ប៉ុន្តែកិច្ចសន្យាទាំងនោះនឹងចំណាយពេលច្រើនឆ្នាំដើម្បីបំពេញ។
កញ្ចប់ជំនួយចុងក្រោយនេះក៏ត្រូវគេរំពឹងដែរថានឹងរួមបញ្ចូលគ្រាប់យុទ្ធភណ្ឌនិងឧបករណ៍ផ្សេងទៀតសម្រាប់កងទ័ពអ៊ុយក្រែន។ មន្ត្រីអាម៉េរិកជាច្រើននាក់បាននិយាយក្នុងលក្ខខណ្ឌអនាមិកដើម្បីផ្តល់ព័ត៌មានលម្អិតនៃកញ្ចប់ជំនួយនេះមុនពេលប្រកាសផ្លូវការ។ នេះជាជំនួយដំបូងរបស់អាម៉េរិក ដែលបានផ្តល់ជូនក្នុងឆ្នាំសារពើពន្ធថ្មី ដែលបានចាប់ផ្តើមពីថ្ងៃទី ១ ខែតុលា៕
ទាហានកំពុងលើកប្រព័ន្ធរ៉ុក្កែត HIMARS ចុះពីយន្តហោះអាម៉េរិក MC-130J នៅប្រទេសឡេតូនីកាលពីថ្ងៃទី២៦ កញ្ញា ឆ្នាំ២០២២