Views: 6
ដោយៈ ទេពកង្រី / កំពង់ឆ្នាំងៈ នៅវេលាយប់ ថ្ងៃទី២៤ ខែកញ្ញា ឆ្នាំ២០២២ ស្ពានឈើមួយកន្លែង នៅតំបន់ចាក់ទឹម បានរងបាក់ស្រុត ដោយសារទឹកជំនន់ទឹកភ្លៀង ហូរបុកស្ពាន ធ្វើឲ្យអ្នកដំណើរ និងរថយន្ត ឆ្លងកាត់ ជាប់គាំង ។ ដោយឡែក ផ្លូវលំ ក្រាលក្រួសក្រហម មួយខ្សែ ប្រមាណជាង ៣០ គីឡូម៉ែត្រ រងការខូចខាតស្ទើរតែ ទាំងស្រុង និងពិបាក ក្នុងកាធ្ចើដំណើរចូលទីកម្សាន្ត ក្នុងតំបន់រមណីយដ្ឋានធម្មជាតិ ទឹកធ្លាក់ថ្មក្រាល ។ ផ្លូវទៅកាន់តំបន់ទឹកធ្លាក់ ថ្មក្រាលនោះ ស្ថិតក្នុងភូមិកោះខ្ទម្ព ឃុំជៀប ស្រុកទឹកផុស ។
ដោយមានការយកចិត្តទុកដាក់ ចំពោះសុខទុក្ខលំបាករបស់បងប្អូនប្រជាពលរដ្ឋ ដែលចូលមកលេងកម្សាន្ត នៅតំបន់ទេសចរណ៍ទឹកធ្លាក់ថ្មក្រាលនេះ លោក ស៊ុន សុវណ្ណារិទ្ធិ អភិបាលខេត្តកំពង់ឆ្នាំង និងលោកស្រី កែ ច័ន្ទមុនី តំណាងរាស្ត្រមណ្ឌល កំពង់ឆ្នាំង រួមដំណើដោយមន្ត្រីជាច្រើនរូប បានចុះមកពិនិត្យមើលស្ថានភាពជាក់ស្ដែង នៅចំណុចទំនប់ទឹកចាក់ទឹម ដែលកំពុងសាងសង់ ដោយក្រសួងធនធានទឹក និងឧតុនិយម ។
ភ្លាមៗនោះ លោក ស៊ុន សុវណ្ណារិទ្ធ បានជំរុញឱ្យក្រុមការងារ ធ្វើការដោះស្រាយបន្ទាន់ ដើម្បីឲ្យស្ពានឈើបណ្ដោះអាសន្នមួយនេះ ដំណើរការបានឡើងវិញ ជាប្រក្រតី និងបានជួយសម្រួលចរាចរណ៍ ជូនបងប្អូនប្រជាពលរដ្ឋ ឆ្លងកាត់ស្ពានឈើនេះ ដោយសុខសុវត្ថិភាពទាំងអស់គ្នា ដោយមិនបណ្ដោយទុកឲ្យរងគ្រោះ ដល់បងប្អូន ប្រជាពលរដ្ឋ ជាអ្នកដំណើរឆ្លងកាត់នោះឡើយ។
បើយោងតាមរបាយការណ៍ ដែលរស្មីកម្ពុជា ទទួលបាននៅថ្ហៃទី២៥ កញ្ញានេះថា យប់ម្សិលមិញនេះ លោកអភិបាលខេត្ត បានបញ្ជាឱ្យកក់បន្ទប់ចំនួន ៣០ បន្ទប់ សម្រាប់បងប្អូនភ្ញៀវទេសចរ ស្នាក់នៅ នៅពេលស្ពានឈើ ដែលរងការបាក់ស្រុត មិនទាន់អាចធ្វើដំណើរទៅមកបាននោះ។
ក៏ប៉ុន្តែ ដោយមានការអន្តរាគមន៍ពីលោកអភិបាលខេត្តកំពង់ឆ្នាំង ក្រុមការងារ និងសមត្ថកិច្ចជំនាញទាំងអស់ បានខិតខំប្រឹងប្រែងជួសជុល កែសម្រួលឱ្យស្ពានមួយ កំណាត់នេះ ធ្វើការឆ្លងកាត់ទៅមក បានឡើងវិញជាប្រក្រតី នៅវេលាម៉ោង ៦ ល្ងាច នាថ្ងៃនោះ។
ជាមួយនឹងការថ្លែងអំណរគុណ ចំពោះការអន្តរាគមន៍ ក្នុងការជួសជុលស្ពានឈើនេះ អ្នកទេសចរមួយចំនួន ក៏បានសំណូមពរដល់លោកអភិបាលខេត្តកំពង់ឆ្នាំង ក៏ដូចជា ក្រុមការងារទាំងអស់ សូមមេត្តាជួសជុលកែលម្អផ្លូវមួយខ្សែ ប្រវែងប្រមាណជា ៣០ គីឡូម៉ែត្រ ទៅដល់រមណីយដ្ឋានទឹកធ្លាក់ថ្មក្រាល ដើម្បីងាយស្រួលក្នុងការធ្វើដំណើរទៅមក របស់ប្រជាពលរដ្ឋក្នុងតំបន់ ជាពិសេស របស់ភ្ញៀវទេសចរ ដែលចង់មកលេង កម្សាន្ត នៅតំបន់រមណីយដ្ឋានទឹកធ្លាក់ថ្មក្រាល៕/V
