Views: 1
ប្រែសម្រួល : កញ្ញាដាលីស (ប៊ីប៊ីស៊ី) ៖ អធិការបតីអាល្លឺម៉ង់បានច្រានចោលការបញ្ជូនយន្តហោះចម្បាំងទៅអ៊ុយក្រែន គឺតែប៉ុន្មានថ្ងៃបន្ទាប់ពីបានសន្យាផ្គត់ផ្គង់រថក្រោះ។
នៅក្នុងបទសម្ភាសន៍ជាមួយកាសែតអាល្លឺម៉ង់ លោក អូឡាហ្វ ស្កូល បានព្រមានប្រឆាំងនឹងសង្គ្រាមដេញថ្លៃអាវុធ។
ប៉ុន្តែអ៊ុយក្រែនបានស្នើឱ្យប្រទេសសម្ពន្ធមិត្តបង្កើត “សម្ពន្ធយន្តហោះចម្បាំង” ដើម្បីពង្រឹងសមត្ថភាពរបស់ពួកគេ។
សហរដ្ឋអាម៉េរិកបាននិយាយថា ខ្លួននឹងពិភាក្សាអំពីគំនិតនៃការផ្គត់ផ្គង់យន្តហោះ “ដោយប្រុងប្រយ័ត្ន” ជាមួយរដ្ឋាភិបាលក្រុងគៀវនៅថ្ងៃព្រហស្បតិ៍ខាងមុខ។
នៅក្នុងបទសម្ភាសន៍ជាមួយកាសែតតាហ្សេសស្ពីហ្គែល( Tagesspiegel) លោកស្កូលបាននិយាយថា ការផ្តោតសំខាន់របស់គាត់គឺទៅលើការចែកចាយរថក្រោះ Leopard 2ដែលផលិតដោយអាល្លឺម៉ង់។
លោកបាននិយាយថា “ការពិតយើងទើបតែធ្វើការសម្រេចចិត្ត [លើការបញ្ជូនរថក្រោះ] ហើយស្រាប់តែការជជែកដេញដោលថ្មីកំពុងផ្ទុះឡើងនៅក្នុងប្រទេសអាល្លឺម៉ង់ ដែលវាហាក់មិនសមហេតុផលសោះ”។
កាលពីថ្ងៃពុធ អាល្លឺម៉ង់បានប្តេជ្ញាផ្គត់ផ្គង់រថក្រោះ Leopard 2ចំនួន ១៤ គ្រឿងដល់អ៊ុយក្រែន បន្ទាប់ពីរងសម្ពាធជាច្រើនសប្តាហ៍ពីសម្ពន្ធមិត្ត។
បន្ទាប់ពីការប្តេជ្ញាចិត្តរបស់អាល្លឺម៉ង់ក្នុងការបញ្ជូនរថក្រោះ អាម៉េរិកបាននិយាយថា ខ្លួននឹងផ្តល់ឱ្យអ៊ុយក្រែននូវរថក្រោះ M1 Abrams របស់ខ្លួន។
អនុរដ្ឋមន្ត្រីការបរទេសអ៊ុយក្រែន លោក អង់ឌ្រី មែលនីក (Andrii Melnyk) បានអំពាវនាវឱ្យបង្កើត “សម្ពន្ធយន្តហោះចម្បាំង” ដែលនឹងផ្តល់ឱ្យអ៊ុយក្រែននូវយន្តហោះចម្បាំង F-16 និង F-35 របស់អាម៉េរិក យន្តហោះចម្បាំង Eurofighter យន្តហោះចម្បាំង Tornado យន្តហោះចម្បាំង Rafale របស់បារាំង និងយន្តហោះចម្បាំង Gripen របស់ស៊ុយអែត។
ទីប្រឹក្សាប្រធានាធិបតីអ៊ុយក្រែនបានប្រាប់បណ្តាញទូរទស្សន៍ Freedom Television របស់អ៊ុយក្រែនថា ពួកគេក៏ត្រូវការមីស៊ីលផងដែរដើម្បីកាត់បន្ថយអាវុធសំខាន់ៗរបស់កងទ័ពរុស្ស៊ី។
ហើយប្រធានាធិបតីអ៊ុយក្រែនលោក វ៉ូឡូឌីមៀ ហ្សេលេនស្គី បានបន្ទរតាមនៅក្នុងសុន្ទរកថាជាវីដេអូប្រចាំថ្ងៃ ដែលក្នុងនោះលោកបាននិយាយថា ប្រទេសនេះត្រូវការមីស៊ីល ATACMSផលិតដោយអាម៉េរិក ដែលមានរយៈចម្ងាយ ២៩៧ គីឡូម៉ែត្រ។
លោកបាននិយាយថា មីស៊ីលនេះនឹងជួយអ៊ុយក្រែនប្រមើលមើលការវាយប្រហាររបស់រុស្ស៊ីលើតំបន់ទីក្រុងនិងជនស៊ីវិល៕
អធិការបតីអាល្លឺម៉ង់ លោក អូឡាហ្វ ស្កូល ចាត់ទុកជារឿងមិនទំនងទាល់តែសោះដែលអាល្លឺម៉ង់សន្យាផ្តល់រថក្រោះមិនទាន់ទាំងបានប្រគល់ផង ស្រាប់តែនិយាយរឿងយន្តហោះទៀត
