Views: 1
ប្រែសម្រួល : កញ្ញាដាលីស (ដេល្លីម៉េល) ៖ អ៊ីស្រាអែលនិងក្រុមសកម្មប្រយុទ្ធជីហាតអ៊ីស្លាមកាលពីថ្ងៃអាទិត្យទី៧សីហាបានចាប់ផ្តើមបទឈប់បាញ់ដែលសម្របសម្រួលដោយអេហ្ស៊ីបដោយសង្ឃឹមថានឹងបញ្ចប់ជម្លោះដ៏តានតឹងរយៈពេលបីថ្ងៃនៅក្នុងតំបន់ហ្គាហ្សា ដែលបានបណ្តាលឱ្យប្រជាជនប៉ាឡេស្ទីនយ៉ាងហោចណាស់ ៤៤ នាក់ស្លាប់ ក្នុងនោះមានកុមារ ១៥ នាក់។
បទឈប់បាញ់ ដែលបានចាប់ផ្តើមជាផ្លូវការនៅម៉ោង ១១៖៣០ យប់ មានគោលបំណងទប់ស្កាត់ការប្រយុទ្ធដ៏អាក្រក់បំផុតនៅក្នុងតំបន់ហ្គាហ្សា ចាប់តាំងពីសង្គ្រាមរយៈពេល ១១ ថ្ងៃកាលពីឆ្នាំមុន ដែលបានបំផ្លិចបំផ្លាញដែនដីឆ្នេរប៉ាឡេស្ទីនមួយនេះ។
ប៉ុន្តែការវាយលុកនិងការវាយប្រហារដោយគ្រាប់រ៉ុក្កែតបានកើតឡើងនៅក្នុងដំណើរឆ្ពោះទៅរកបទឈប់បាញ់ ដោយសំឡេងស៊ីរ៉ែនបានបន្លឺឡើងនៅភាគខាងត្បូងប្រទេសអ៊ីស្រាអែលនៅមុននិងក្រោយកាលបរិច្ឆេទកំណត់ចូលមកដល់។
នៅក្នុងសេចក្តីថ្លែងការណ៍មួយដែលបានផ្ញើរយៈពេលបីនាទីបន្ទាប់ពីបទឈប់បាញ់បានចាប់ផ្តើម កងទ័ពអ៊ីស្រាអែលបាននិយាយថា”ជាការឆ្លើយតបទៅនឹងគ្រាប់រ៉ុក្កែតដែលបានបាញ់ស្រោចទៅលើទឹកដីអ៊ីស្រាអែល បច្ចុប្បន្ន (យោធា) កំពុងវាយលុកលើគោលដៅជាច្រើន” ដែលជាកម្មសិទ្ធិរបស់ក្រុមជីហាតអ៊ីស្លាមនៅហ្គាហ្សា។
នៅក្នុងសេចក្តីថ្លែងការណ៍ជាបន្តបន្ទាប់ កងទ័ពបាននិយាយថា ការវាយប្រហារចុងក្រោយរបស់ខ្លួនបានកើតឡើងនៅម៉ោង ១១៖២៥ យប់។
ខណៈភាគីទាំងពីរបានយល់ព្រមលើបទឈប់បាញ់នោះ ម្នាក់ៗបានព្រមានគ្នាទៅវិញទៅមកថា ខ្លួននឹងឆ្លើយតបដោយកម្លាំងចំពោះអំពើហិង្សាណាមួយ។
បេសកជនសន្តិភាពមជ្ឈិមបូព៌ារបស់អង្គការសហប្រជាជាតិ លោក ថ័រ វេនណេសលែន (Tor Wennesland) បាននិយាយនៅក្នុងសេចក្តីថ្លែងការណ៍ថា “ស្ថានការណ៍នៅតែផុយស្រួយខ្លាំងហើយខ្ញុំជំរុញឱ្យភាគីទាំងអស់គោរពបទឈប់បាញ់”៕
គ្រាប់រ៉ុក្កែតបាញ់ពីហ្គាហ្សាចូលទឹកដីអ៊ីស្រាអែល
