Views: 7
ប្រែសម្រួលៈបំណង(ស្ត្រេតថែមស៍)៖ របបយោធាមីយ៉ាន់ម៉ាបានកាត់ទោសប្រហារជីវិតមនុស្សយ៉ាងតិចប្រាំពីរនាក់ទៀតនៅសប្តាហ៍នេះ ដែលធ្វើអោយចំនួនអ្នកទទួលទោសប្រហារជីវិតក្នុងប្រទេសនេះឡើងដល់១៣៩នាក់ នេះបើយោងតាមអង្គការសហប្រជាជាតិ។
អ្នកនាំពាក្យម្នាក់នៃរបបយោធាមិនបានឆ្លើយតបនឹងការហៅទូរស័ព្ទមកពីខាងក្រៅប្រទេសដើម្បីបញ្ជាក់ព័ត៌មានស្តីពីការប្រហារជីវិតនេះទេ។អង្គការសហប្រជាជាតិចោទប្រកាន់អាជ្ញាធរមីយ៉ាន់ម៉ាថាប្រើទោសប្រហារជីវិតដើម្បីជា«ឧបករណ៍បង្ក្រាបក្រុមប្រឆាំង»។
មីយ៉ាន់ម៉ា បានធ្លាក់ចូលក្នុងភាពវឹកវរចាប់តាំងពីរដ្ឋាភិបាលស៊ីវិលមួយត្រូវក្រុមយោធាបណ្តេញចេញពីអំណាចក្នុងរដ្ឋប្រហារយោធាមួយកាលពីខែកុម្ភៈឆ្នាំ២០២១ ។
ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សលោក វ៉ុលគែរ ទឺក(Volker Turk)បាននិយាយនៅក្នុងសេចក្តីថ្លែងការណ៍មួយថា យ៉ាងហោចណាស់និស្សិតសកលវិទ្យាល័យប្រុសប្រាំពីរនាក់ត្រូវបានកាត់ទោសប្រហារជីវិតដោយតុលាការយោធាមួយ ដែលមិនអនុញ្ញាតអោយសាធារណជននិងអ្នកកាសែតចូលស្តាប់ទេកាលពីថ្ងៃពុធ។
ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សលោក វ៉ុលគែរ ទឺក
លោកបាននិយាយថា« ដោយប្រើទោសប្រហារជីវិតជាឧបករណ៍នយោបាយដើម្បីបង្ក្រាបក្រុមប្រឆាំង យោធាកំពុងមងាយកិច្ចខិតខំរបស់អាស៊ាននិងសហគមន៍អន្តរជាតិដើម្បីបញ្ចប់អំពើហិង្សា ហើយបង្កើតលក្ខខណ្ឌសំរាប់ការចរចានយោបាយមួយដើម្បីនាំមីយ៉ាន់ម៉ាចេញពីវិបត្តិសិទ្ធិមនុស្ស បង្កឡើងដោយក្រុមយោធា»។
សារព័ត៌មានក្នុងស្រុកបាននិយាយថា ពួកនិស្សិតសកលវិទ្យាល័យនៅក្រុងយ៉ាងហ្គោនត្រូវបានចាប់ខ្លួនកាលពីខែមេសានិងរងការចោទប្រកាន់ពីបទចូលរួមក្នុងការបាញ់នៅធនាគារមួយ។
ក្រុមនិស្សិតសកលវិទ្យាល័យដាហ្គោន(Dagon)បាននិយាយថា«ការដាក់ទោសប្រហារជីវិតលើនិស្សិតជាអំពើសងសឹកដោយក្រុមយោធា»។
ក្រុមនិស្សិតកាន់ទង់សហភាពនិស្សិតមីយ៉ាន់ម៉ា នាំគ្នាធ្វើបាតុកម្មប្រឆាំងរបបសឹកនៅក្រុងយ៉ាងហ្គោនកាលពីឆ្នាំ២០២១
អង្គការសហប្រជាជាតិកំពុងស៊ើបអង្កេតរបាយការណ៍មួយទៀតដែលថា សកម្មជនវ័យក្មេងបួននាក់ទៀតក៏ត្រូវបានកាត់ទោសប្រហារជីវិតផងដែរកាលពីថ្ងៃព្រហស្បតិ៍។
លោកទឺក បាននិយាយថា«ក្រុមយោធាកំពុងបន្តដំណើរការតុលាការសម្ងាត់ដោយរំលោភគោលការណ៏គ្រឹះស្តីពីសវនាការដោយយុត្តិធម៌និងផ្ទុយពីការធានាយុត្តិធម៌គោលស្តីពីឯករាជ្យភាពនិងភាពមិនលម្អៀង»។បើតាមស្នងការសិទ្ធិមនុស្សរូបនេះ សវនាការខ្លះធ្វើឡើងតែប៉ុន្មាននាទីហើយអ្នកត្រូវចាប់ខ្លួនមិនទទួលបានសិទ្ធិជួបមេធាវីឬក្រុមគ្រួសារទេ។
ការកាត់ទោសប្រហារជីវិតនេះកើតឡើងបន្ទាប់ពីការកាត់ទោសប្រហារជីវិតអ្នកទោសបួននាក់កាលពីខែកក្កដា លើអតីតសមាជិកសភាម្នាក់និងសកម្មជនគាំទ្រលទ្ធិប្រជាធិបតេយ្យម្នាក់។
អាស៊ានដែលបាននិងកំពុងខិតខំដោះស្រាយវិបត្តិមីយ៉ាន់ម៉ាទាំងមិនទទួលបានលទ្ធផលធំដុំ កាលពីខែសីហាបានព្រមានប្រឆាំងការប្រហារជីវិតអ្នកទោសបន្ថែមទៀត៕
