Views: 4
ប្រែសម្រួលៈបំណង(ដេល្លីម៉េល)៖ រុស្ស៊ីកាលពីថ្ងៃចន្ទបានបាញ់ស្រោចកាំជ្រួចចម្ងាយឆ្ងាយលើទីតាំងនានាក្នុងប្រទេសអ៊ុយក្រែន ដោយសម្លាប់មនុស្សយ៉ាងតិចប្រាំនាក់ បំផ្លាញផ្ទះនិងបង្កការដាច់ភ្លើងតែរដ្ឋាភិបាលទីក្រុងគៀវអួតថា ក្រុមការពារដែនអាកាសរបស់ខ្លួនបានកំហិតការខូចខាត។
សម្លេងសឺរ៉ែនព្រមានអំពីការវាយប្រហារតាមអាកាសត្រូវបានបន្លឺឡើងពាសពេញប្រទេសនិងប្រជាជននាំគ្នាចូលទៅក្នុងប្រព័ន្ធផ្លូវរថភ្លើងក្រោមដីក្នុងរដ្ឋធានីគៀវដើម្បីជ្រកលាក់ខ្លួនពីការវាយប្រហារមួយប្រាវចុងក្រោយ។
កងកម្លាំងរបស់រដ្ឋាភិបាលទីក្រុងមូស្គូ បាននិងកំពុងផ្តោតការវាយប្រហារលើបណ្តាញផ្គត់ផ្គង់និងចែកចាយចរន្តអគ្គិសនីក្នុងការវាយប្រហារតាមផ្លូវអាកាសដ៏ខ្លាំងរបស់ខ្លួនចាប់តាំងពីខែតុលាមក និងក្រុមហ៊ុនថាមពលរដ្ឋយូក្រែននឺក្រូ(Ukrenergo)បាននិយាយថា ហេដ្ឋារចនាសម្ពន្ធថាមពលរបស់ប្រទេសច្រើនទៀតរងការបំផ្លាញ។
នាយករដ្ឋមន្ត្រីអ៊ុយក្រែនលោក ដេនីស ស្មីហាល់ ( Denys Shmyhal)ក្រោយមកបាននិយាយថាទីតាំងថាមពលរងការវាយប្រហារនៅតំបន់គៀវ វីននីត្យា(Vinnytsia)និងអូដេសា(Odesa)តែប្រព័ន្ធថាមពលអ៊ុយក្រែននៅដំណើរការ។
បើតាមមន្ត្រីអ៊ុយក្រែន កងទ័ពអាកាសអ៊ុយក្រែនបានបាញ់ទម្លាក់កាំជ្រួចរុស្ស៊ីប្រមាណ៧០ដើមកាលពីថ្ងៃចន្ទ។
ទីក្រុងគៀវ ដែលមានមនុស្សរស់នៅប្រមាណ៣លាននាក់ ទំនងជាបានគេចផុតពីការខូចខាតធ្ងន់ធ្ងរ ទោះជាអភិបាលតំបន់គៀវបាននិយាយថា អ្នកស្រុកក្នុងតំបន់នេះប្រមាណ៤០ភាគរយអត់មានអគ្គិសនីប្រើក្រោយហេដ្ឋារចនាសម្ពន្ធអគ្គិសនីរងការវាយប្រហារ។
ក្រោយសឺរ៉ែនបានបន្លឺឡើងអស់មួយម៉ោង ប្រធានាធិបតីហ្សេឡេនស្គី បានប្រាប់ជនរួមជាតិអ៊ុយក្រែនរបស់លោកថា កងការពារដែនអាកាសអ៊ុយក្រែនបាន«បាញ់ទម្លាក់កាំជ្រួចរបស់រុស្ស៊ីស្ទើរទាំងអស់»នៅពេលមន្ត្រីទីក្រុងគៀវបាននិយាយថា កាំជ្រួចប្រាំបួនគ្រាប់ក្នុងចំណោមដប់គ្រាប់ដែលរុស្ស៊ីបាញ់ចូលទីក្រុង ត្រូវបានបាញ់ទម្លាក់៕
មន្រ្តីអ៊ុយក្រែនបាននិយាយថា កាំជ្រួចបានធ្លាក់ចំអាគារមនុស្សរស់នៅក្នុងទីក្រុងហ្សាប៉ូរីសហ្សៀ ដោយបំផ្លាញផ្ទះជាច្រើននិងសម្លាប់មនុស្សពីរនាក់
ការវាយប្រហារនេះត្រូវបានរំពឹងទុកជាមុន និងកងកម្លាំងការពារដែនអាកាសអ៊ុយក្រែនបានត្រៀមទប់ទល់ជាស្រេច
